Lhingboi Haokip
Igamsung a Inchen khosah hahsat hi ipijeh ham, chule iti kiledoh ding ham tithu ah chomcha lunggel seikhom uhite. Vetdan chomchom um intin, vetdan jatkhat tunin anavekhom uhite.
Themjil ipi ahi hetchet loujeh/mansahjeh:
Themjil kiti hi ipiham? Thil phachom leh phatchompithei, neh le chah, sil le chen chuleh sumlepai kondoh theina natoh ahilou leh tohgon kituptah le agomlampen, ahoitheipen a boltheina ding kijilna chu themjil vetdan khat ahi. Vetsahnan, khanglui laiya Chapang apat Nungah Gollhang geijin lou natoh dan, louvat a kipat louga lahkhom leh koitup chan gei anu apa nung ajui uva, ahetnaochu themjil khat ahi. Lou vat phat het angaiyin, louvat dingdan het angaiyin, chemcha heicha nolhem dingdan het angaiyin, thing lham dingdan het angaiyin, louhal phat angaiyin, mang sedan het angaiyin, lou kaldan het angaiyin, buh sahdan het angaiyin, muchi boldan het angaiyin, ipi muchi iti tuding ham, itih phat laiya tudingham het angaiyin, muchi kehdoh ho dempum’a hampa louhing –tichu louham lhodan het angaiyin, thogetdan het angaiyin, lou hondan het angaiyin, gasoh chomkhomdan het angaiyin, apohkhom nading beng leh nam sahdan, tengcha leh bem ima sahdan het angaiyin, hiti chun jilding tampi anaum in ahi. Het bouseh hilouva thep cheh ding ngai-ah ahin ahi. Hiche keu hilouvin, khosung kivaihomna, insung kivaihomna a aneo in alen jadan, chonchan pha leh kitahna pachatna phatah ana um in, hichun mihemkhat hinkho semdoh nalam ah nasatah in phatchomna ananeiyin ahi.

Ahileh Missionary ho ahung un, lekhajem simtheina themjil ahinpolut un, lekhajem simthei-sunthei leh English pao hethei-thothei hochu natoh leh tohgon jatchom jep boldin natohna ahin petauvin, chuche khang’a vaihom ahijeh un hitobang natongho jongchu vaihomna lam ah thaneina mong hihih jongle bolthei-seithei phabep ahin neitauvin ahile, eiho themjilna chu themjilna phatah ahilam ihaimil tauvin ahi. English simthei-jihthei chu lekhathem ihinti tauvin, miching in ihin moh gel tauvin, amaho neh holna natoh leh panmun chu thaham olna ahi tin lekhasim itiu jouse hitobang ding chun anu-apan ihin gong tauvin ahi. Lekhasim namun khosung vengsung a um ahilou jeh in khosung kivaihopna leh kipohdan, insung’a upa-naopa kilungset naleh kijato dan hochu lekhasim hochun ol ol in ahin hepha hih chehcheh tauvin ahi. Themjil akon in lekhasim tahbeh, tichu lekhajem boubou sim chu ahin boipi tauvin, hiche a themvetna a pachanna sang mumu chu achingathem in ihin koi tauvin ahi. Ihetkhel u chu ahileh themjilna kitihin lekhasim bouseh abolding dan’a inagel u chu ahi. Tunia lekhasim ban leh simchai mitamtah phatchomna tongdoh theilouva ium uhi themjilna bukimlou ahiuvin ahi.

English pao kisimhi vannoiya mi atamjo in ahetthei pao ahijeh’a mitin toh kihoumat nading’a ngaicha ahijeh khat ahin, hetna pha, chihna thu, thepna bu, ijatham hiche paova kisunsa umho simtheinading toh aphatchomna ahin, adang’a amanna beihel ahibouvin ahi. Hetna, chihna, thepna ijat kisimdoh jongleh manchah thei ahidan geldohna mitvahna chu aumlouleh panna beihel kit ahi. Mihem khat in phatchomna thei neh-le-chah, sil-le-chen, sum-le-pai mutheina ding’a manchah thei’a ahetlouleh, hetna maimai chun ima tohdoh aneitheilou ahi. Loulhou ngai mite ihiuleh lekhasimho chun mihon iti abol um tichu lekha a kisundoh thei loubol thepna hochu hetna dia leh manchah dia a lekha simtheinau chu amanchah diu ahi.

Vetsahnan, Tuilou neihon kumkhat’a Chang aphu uva a-at jouteng uleh tuilou chu kumkit Changphu lai phatkah’a mohseh’a kiumsah ahi. Migamma min iti abol am? Loubol miho chun muchi khat alahchai teng, muchidangdang aphat toh kitoh ho atu kit’ah ahi. Lekhasim hon a lekha simtheinau amanchah dingdan khat kitchu, muchiho lung-lehadang muchi sugamthei, agasoh lhomsah thei chu thepna itobang in avendohna ding asei am, iti manchah dingham, muchi aga atamna ding’a ipipi bolthei lekhabu a hetchenna neihon ajih doh u um
am? tiho chu manchahdia aholdoh thei u ahi.