Tulai kipa golnop kumhei umlai jong ahin, hinlah mobile service lencheh gup (6) tobang atohkhah jeh in mobile phone mang mihem lakh val asuboi tan ahi. Alang khat a , hiche boina aumlai tah in Centre in mobile phone tower hoa konna potdoh mihem tahsa suhkha thei vah phalou (radiation) ho vetlha ding angaito kit in, Manipur a um mipi ho alung dong tauvin, koi ‘vah phalou’ kholchil malah aheng akom asopi to jong kihoumat theilou vin aum gam tauvin ahi.
Economic blockade leh bandh, alangkhat a lampi hoilou leh munchim ho jeh in achesa lha ijat ham khat a pat chun Manipur gamsung ah thaotui nasa tah in amu hah lheh in ahi. Hiche jeh achun thil man hatah in akal in, nitin a hinna dinga ngaicha thil le lo ho jong akimujou jipon chuleh mipi ho nitin hinkho kimanchah dan asuboi lheh in hiche thu hi niseh leh gamsung miho houlimna thu khoh pen in akisei jing jengin ahi.
Mobile phone network hoilou jeh in mi tamtah Aircel, Airtel, Idea, Reliance, Tata Indicom chuleh Vodafone ho office mai dunga adim dim in akigol uvin hinlah amahon jong seiding ahepouvin phat kituplou angoh jitauvin ahi.
Aboinapen leh boina kilhap lhah theina pen chu diesel thaotui ngaichat banga mutheiya aumding hi pen in ahi. Ajeh chu, mobile phone tower ho hi tanglouva achelhah theina dinga generat/ thaotui angaichat jing ahi. Hinlah, vangset umtah dinmun chu aphat seh leh “thaotui aumpoi” kiti hin tuni chan geiyin hiche boina hi asutang thei hih laijin ahi. Mobile phone mangcha mipiho mobile service company ho komma aga kiphin uva a service hoilou thu hou aga kholji vang uvin, imajouse hi gamsung boina leh dinmun jeh ahi ti amudoh tenguleh alaiyu ana jin ahi. Ahin boina vang hi tuni geiyin apha chom deh pon, aphat dom ding jong kinepna aumhih laiyin ahi. Mobile phone service pedoh hon asenior officer hou akou uva boina gangtah a asemphat diu thupeh aum vangin, mipiho lungsunga kinepna aumdeh poi.
Indira Gandhi thi kal kum 26 lhinna kimang ta
Imphal, Ellha 31: Indian Prime Minister anahi Nulun Indira Gandhi thi kal kum 26 lhinna Rashtriya Sankalp Diwas (National Re-dedication Day) chu lolhing tah in tunin Imphal khopi mun 1st Bn. Manipur Rifles Parade Ground a milun O. Ibobi Jin-gun hina leh milun Phungzathang Tonsing Kin-neipa hinan ana kimang tan ahi.
Hitobang kingon na Manipur Chief Minister in aseina achun Nulun Indira Gandhi hi lamkai dihchet ana hijeh in gamsung’a kikhel na tampi anabol doh in ahi, chuleh aman genthei chaga ana khohsah naleh akithopi nacheng tuni chan’in vetjui theiyin aum in ahi tin tulai a lamkai tampin kilung khat tah a khohsah pum’a Indira Gandhi lunggel phatah hi juidin temna ananei yin ahi. Hitichun hiche kingon achun MLAs, Minister chuleh state official tampi jong anapang in ahi.
Alang khat a hitobang kingon chu Manipur Pradesh Congress Committee (MPCC) in jong milun Gaikhanngam lamkai nan Congress Bhavan ah loupi tah in ana mang uvin ahi.
Gari toset tojeh’a mi 3 ana mollem
Imphal, Ellha 31 : Achesa ni 2 sungchun munchom chom’a gari toset (accident) tojeh in mi 3 hinkho ana beitan ahi. Amasa penin tuni nilhahlam chun NH-150 lamlen Khuman Lampak le North AOC kipel tona achun truck gari 1 in rickshaw 1 ana phut kha’n, rickshaw chung’a tou Imphal West commando’a pang Havildar Bijoy Tarao kiti Tarao kho, Chandel district sung’a cheng tutua Hatta Soibam Leikai, Imphal East mun’a in-bhara a cheng mipa chu apetpet in ana thitan ahi. Hiti chun truck No. MNO4/A2854 le atolpa mat ahi tolhonin FIR anakibol khum tan ahi. Hetthei khatchu hiche rickshaw tolpa Md. Salaodin vangchu ana kitongkha pon ahi.
Alangkhat’a achesa Ellha nisim 30 nilhah nidan lam 5:30 velchun Maharabi le Tengdongyang kho kikah Sekmai Police Station hopsung achun Activa chung’a hungtou M. Pradeep, kum 21 a upa s/o M. Pishak
chule Kh. Bronson, kum 23, s/o Babu Awang Leikenthabi in lampam’a Tata truck gari 1 meivah lou’a ana ki-nga aphutkhah lhonjeh in ahinkho lhon ana beitan ahi. Hiti chun Sekmai Police hon hiche truck tolpa amat utoh lhonin FIR registered abolkhum tauvin ahi, tin thulhut kimu chun aseiyin ahi.
State Kala Academy chung’a KIMACS ho lunglhei lou
Imphal, Ellha 31: Kanglei Indegenous Martial Arts and Cultural Society (KIMACS) akon thuphon kimu dung juijin kum 2010 adia State Kala Academy in KIMACS akon Fellowship leh Scholarship khatcha alhen lou nahi nasatah in lungnop mona ahin neiyin ahi. KIMACS Secy Y. Sanjit in aseina achun Cultural Artist tichu
Thang-Ta kichem khatcha ajaolou nachung’a Kala Academy board a ajaosah lou nahi khentum na um ahin, chuleh KIMACS sung’a umho suh genthei ahi nakah uva dangka 50 kipea kisol doh hi itobang Academy kivaipoh naham tin moso najong ahinnei uvin ahi.
Manipur CM in chavang Kut lemna hinnei
Imphal, Ellha 31: Ahung lhung ding jing nikho a Kuki- Chin-Mizo Lholhun Kut kiman ding tolhon’in Manipur Chief Minister milun O. Ibobi Singh in lemna thuphon ahin neiyin ahi. Aman aseina achun Kut hi malai apat
kum lhung tohga chung’a Pathen heng’a kipa thuseina ahi nachung’a Kuki-Chin-Mizo lung khat thakhat a aumkhom na golnop chu ahin, hijeh chun tuchung Chavang Kut hin Manipur sung’a khentum na beihel in kilung khat naleh Chamna hin polut hen ati nachung’a Culture loupi sahna thupha lhangsam jo tahen tin thuphon chun aseiyin ahi.
Agriculture department in zero tillage pea cultivation panta
Imphal, Ellha 31: Agriculture Dept. in “Zero tillage pea cultivation” kiti chu amasapen di’n Nongdam Lourembam Nongpok Sekmai mun Thoubal district hopsung achun Rural Agriculture le Youth Development Society to kitho’n gam hectre 2 sung’a ana bolpan tauve.
Thuso miho kom’a Dy Director Ph. Rajendra in aseina achun hitobang bechang (pea) tu nahi gam hectre 22 sung’a bolding tohgon kinei ahi’n, hijeh achu amasapen adia kipandoh ahitai, ati. Ama’n aseibena achun hiche bechang (pea) tu nading hin twi angaicha’n ahinla igamsung uva deibang a irrigation aumthei loujeh in ahahsa thou in ahin jingkal dai-twi ho chengse hi changpol mangcha’a khoptup a manchah thei ahi danjong ana seiyin ahi.
Hiti chun Rural Agriculture le Youth Development Society lamkai hon aseinau achun hitobang Agriculture department in tohgon aneihi alolhin na akimu teng hiche kho kimvel honjong lunglutna hin neitau inte ana tiuvin ahi.
ACTSOM lamkai thah kilhen na umtading
Imphal, Ellha 31: All Colleges Tribal Students Organisation Manipur (ACTSOM) akon thuso kimu dungjui in ahung lhungding Phallha (Nov) nisim 6 nile kum 2011-2013 adinga lamkai thah kilhenna umding ahin chule nomination chu Phallha nisim 2 chan kihom ding, ajing nikho Phallha nisim 3 nile thahlut hiding chule Phallha nisim 5 nile scrutiny umding ahi. Hijeh chun Manipur sung a college le secondary school tribal student union lamkai jouse thonlouva Adimjati Complex mun’a hung pang cheh diuvin hetsahna ahin neiyuvin ahi.
Painting le Clay Modeling Competition kichaita
Imphal, Ellha 31: Simlai chapang hodinga Painting le Clay Modelling Competition chu “The spirit of Sharmila” ti thupi mangcha’n tuni in Neo- Gene Contemporary Artists Manipur ho tohgonna noiyin Ima Khunthokhanbi Shanglen, DN College gate, Thangmeiband achun lolhingtah in ana kimang chaitan ahi. Hitobang kingon
achun Saratchand Thiyam (Sahitya Akademi Awardee) chu Jin-gun in ana pang in chule S. Vedeshwor Sharma (Assistant Secretary MSK) chu Kin-neipa’n ana pang lhonin ahi.
