Hiche themjil Inpi thah khat hung kigong hi gamsung'a chapangho leh gamsung khonung ding gelkhohna a hung kigong ahin, chuleh leiset a themjil dan sangpenho leh aphapenho gamsung'a pohlut ding ti ngaikhoh najalla hung kipan ahi tin Village Education Society Board thuthot chun asei in ahi. Aseibe na achun, igamsung'a lekha kihildan hi chapang simlai hon ipi asim uham ti helou hella Class sangtah aphah gei u kiumsah ahi, chule asim uchu nitin hinkho toh loimat dingdan kihil lou ahin, hichu Village School in kikhel ding ahi atin ahi. Tekahnan, Jan malup'a, jingkah matho chun mihemkhat damtheina leh lunggel kisuhna chule khosahtheina apei tichu English paova ipi seina ahi jong hellou hella chapang in asimchu, themvetna a dihtah in seithei henlang, sunthei jong leh amading'a aphatchomna pipen akimu dohlou ahin, Village School simlai chapangho thepvetna'a poimo pen'a kikoi dingchu chapang chun Jan a matah'a lup'a, Jingkah matho chu apha ahi ti ahet ban'a ipijeh'a pha ham tijong dohna aneithei'a, ajehjong ahetchet dingchu hung hiding ahin chuleh hichu English paova iti chomkim tah'a kisei am akiti leh 'Early to Bed and Early to rise, makes a man healthy, wealthy and wise' tia apao kijilna joh'a amandiu ahi tin thuphon chun aseiyin ahi. Hichetoh kilhona chu School Logo a "d" sung'a "?" leh "kikoi khun chapang lungthim'a thudoh, hetchen nomna suhthou ding hicheía konía chu hetchenna leh donbutna amuding ti avetsah ahi. Themjil bulhing kitichu simlai khatchun ahinkho sungía hetnomna lungthim leh
ahetchen ho ahinkho a manchah leh phatchompi a aneithei a, hiche chungchonía chu mi hepina lungthim leh ngailutna amihina a aneidoh ding chu ahin, Village School in chapangho akhoukhah dingdan chu hiche bidoi lampi a chu ahin khoukhah ding ahi atin ahi.
Achaina a thulhut in aseina ah, Village School hin atup pipen chu hichemun bouva chapang kihildan khelding ahipon, apha chu pohlut'a themjil Inpi (School) dangdang honjong chapang khoukhah dan hi aphajo cheh'a ahin semhoi uva, themjil in hojouse hi sum muna phatah dan'a bolmaimai hilouva, chapang hinkho semna leh gamsung semna mun ahung hichehding kinepna leh bidoi ahi atin ahi. Hiche kin-gon sung achun Rev. Dr. Khaizakham, Principal ECT in Pathen thu a mipi ho tilkhou na aneiyin, chutoh kilhon chun- school teaching le non-teaching staff, Board members hole akai ding chapangho, chuleh, nu le pa tedin Pathen henga lungmon um tah taona aneiyin ahi. Aman aseina achun adeh in hiche school hi churachandpur sunga private school 29 laha aum khalou aki bol kha lou beh igam sung uva hung um hi kithang at aum-lheh in, hitobang a lunggel thuhtah hin nei, board members ho chunga jong kipa thu aseiyin ahi. Miss Nengboi in school vision, mission le philosophy kicheh tah in hilchetna aneiyin ahi. Milun Thangkhopao (Vaiphei veng) haosapun jong veng sunga hito bang school hi churaachandpur gamkai a din khatna ahi tin phondohna aneitoh kilhon in akai thei ding chapang ho kaisah tei ding in nule pate tepna aneiyin ahi. Dr.Thangkhum, School doctor in jong chapang khou khah amanlut dan aseiyin ahi. Mr. Benjamin Mate in ahung khom mipi, jin-gun ho leh kin thempupa chunga kipa thuseina aneitoh kilhon in Kin thempu Rev. Dr. Khaizakham in pathien henga taona aneiyin programme chai ahitai. Chuleh programme chai toh kilhon in mipin class room, art work, educational toys leh uniform display kibol ho vetlhah na anei-uvin ahi.
Village school a mopohna neiho chu ahile Teaching staff; Mrs K. Chochoi (Headmistress), Miss Sawmmi, Miss Belin- da Kimneilhing chule Mrs Khamhoihching ahiuvin Non-teaching staff hochu ahile Mrs Vavah ( School mother), Mrs Tainu ( School mother), Mr Lunzalien (Office Assistant), Mr Piangkhanlian (Furniture Manager) chule Dr Thangkhum (Medical Advisor) ahiuve.
