Nam khat society khat machal theina dingin leadership kisuh tah angaije tichu velseilou hel’a ihetsao ahitai. Leadership thu isei tengleh nam khat sunga leader jat chom chom lamchom chom a lamkai hina nei tampi umthei ahi. Ahin tunia keima min phah leader ho chu MP,MLA & MDC ho ahiuve.
MP, MLA, MDC hohi leader dihtah ahiuve. Amaho hi Govt. Jong ahiuvin, eiho (mipi) thalhenga Govt. na
part la ahiuvin, athanei nau athunei nau khu mipia kon ahin, ajeh chu mipin eimaho thalhenga thusei leh natong dinga iki lhendoh u ahi. Democracy kivaipoh nahi mipi kivai hopna ahi kiti lona pen tah chu eima ho thalhengdingmiikilhentheilaitahuhikiseinaahi. Mipha, gamsung ngailu khantou machal ngailu ikilhen khah uleh apha ilhen khel uleh avangse ihimai tauve.
Social organisation leader hohi leader akiti thou nai, hinlah amahohi thanei thunei na neilou ahiuve. Thanei thunei na bulhingsetna nei leader hochu chunga kiminphah ho hi ahiuve. Nam sung society sung khantou machal nading jong amaho khutna um ahi. gamsunga chamna le lungmon um nading jong amaho khutna um ahi. Ajeh chu amaho government kitichu ahitauvin, Government phatseh a khantou machal na tohgon aneijing ho phatecha achelhah achelhah lou jong amaho khutna um ahi.
Hitobang thanei thunei ima thalhenga government na part lathei leader chu asihtoi khah leh alonaje umlou ding ahi. Amachun agam sung anam mite ngailut tah beh a angailut louleh vangset umtah hiding ahi. Ajeh chu anung jui (a worker) mi themkhat toh kithutoh a gamsung sem nadinga hung kisol paisa jouse aneh chaitheiahi.
Vaicha genthei thinglhang mite ding scheme jat chom chom ho jong aneh chai thei ahi. Complaint bolthei miho chu paisa themkhat ham or housing scheme khat touva alunglhai pouleh koimacha ima seipoh umtalou ding ahi. Langkhatna mipin aningleh akah imajouse kihe jou lou ahin, MLA pun khatvei tou ngainom umtah leh kinep umtah a mipi dinga phachom tohding bolding tampi asim lhah jiho khu kinem tah a inga nga jiu ahin, hitia inga-nga nung uvin MLA term kum 5 akichai doh jitan, akum kit leh abul la ikipan kit uvin abepbep in akichai kit jiuvin machalna mong mong umthei louvin abep abep ihijing jeng uve.
MLA/MP/MDC candidate ho election kibol lai leh mieh buh theh ngim ding hijongleh bol ngam jeng dingin phat lhem abollun, paisa jong agana phung nei bangin vat lou hellin ahom hom jeng theijun mipi dinga phachom tohding bolding ho thusoh sim hobangin asim lha lha jing uvin, ima gel beh sehlou mipi alhem chavaijun, lhep chatvai thei lou haosa upa thil hethem dom ho chu sum le pai jin achodoh uvin hitichun ahung chal tou tou vun achai naleh elected member khat ahung hi teng uleh itobang mi ahiu ahung ki muchen in hinlah alonaje umthei lou nung ahijitai.
Hijeh chun tunin Kuki mipin mipengthah tahbeh leader ngaichat ahitai. Tumasang achesa kum 40 tobang sunga leader ho tobang hilouva mipeng thah tahbeh leader tilou panna beihel ahitai. Mipeng thah kati hi lhagao lama pengthah a Pathen thu seija vahle le ho beh seh kaseina ahipon, lungthim luipa kheldoh ding katina joh ahi. Lungthim luipa tunichanna ileader houvin achepiu, nam le gam sung min’a ama inchen louchen kisem a nikhang lhakhang bangjeng ho umdan leh hindan dalhah ding kati ahi.
Hitobanga leader ho lah a kithah aumna leh lungkhel na aum louleh Kukite din mun ding vang chu kinepna ding mong mong aumpoi.
Kukiten gam kinei ahin, kho le veng kichehtah a khosa ihiuvin, population jong tamtah ihipouvin, Government officer lentah tah phabep setpi ium un ahin, hicheho jouse chunga government a-jong part ilah u ahi. Achuti leh hoilai tah or ipi nehmo jeh a khangtou thei lou ihiu ham? Kukite dinga khantou louna ding imacha umlou ahi. Bailam tah a khantou thei ahi. Eiho ding khantou louna ding umtheilou hel ahi.
Eimaho representative ihin neikal u kum 40 lhing koncha ahitai. Kum 40 sunga hichan bep iphah nah laiju leh ipi kinepna ding inei nah laiju ham? Khantou machalna hin polut dinga iki lhendoh mihon jong (Monkey) louhon athou ahitan aban ipi iseibe ding hitam? MLA, MP hung kaidoh hobou a inchen akhantouva midang ajao phah lou helleh iti vangset um hitam? Ami jouse la MLA, MP kihi theipon tin, iba ilo diu hitam? Abailam pen chu eima ho thalhenga iki lhendoh hou apenthah lou u thil khoh chungnung ahitai.
Achuti louleh avaicha genthei ding mong mong a Pathenin ahin semloi umdoh ding ahitai.
