CCPur, Ellha 30: Kuki National Organisation noiya kikhailha nampi gollhang kiloikhom hon tuni jinglam nidan 11:30 chun Molnom khopimun'a Kuki Chate kipumkhat'a dinkhom theina phat ahinlhut toh kilhon in kin loupi tah aneiyun ahi. Hiche kin ahin K.N.O kiloikhom na noiya Kuki Army Lamkai jousen kin-gon chu ahung oup cheh uvin ahi.

Hiche kinsung chun Pu T.S Haokip, Defence Secy KNO in houlimna aneichun Kuki National Organisation hi kum 22 alhinna ahitan chu in kipun khom akhoh dan akihet doh toh kilhon in 2005 kum in Kuki National Organisation kipumkhat na ahungmachal nan KNF(Z) leh KNF(MC) ahunglut masapen lhon in ahi. Chujouvin tukum 2010 in kipa umcheh in Kuki Army tha lhingset cheh KNF(S), KLO/KLA, chule KRA ama hon ahinbel toh kilhon in tunia hi KNO noiya Kuki Army 15 kiloikhom ahi tah jeh chun hitobang kipumkhat na nikho hi manpat thei ahi tia kigelkhom'a tunia hi kuki unity nikho kimang ahi ati.

Pu PS Haokip in Bible a Psalm sunga kimu bangchun sopi khat chenkhom anop kiseidan bangchun tilkhouna aneiyin ahi. Chutoh kilhonin tua namdang sunga vahmang/vaitham isopi chankhompi Kuki phabepho ahinau hetsah dinga lekhabu ajihdoh a panlahna aneidan hojong atahlang in ahi. Hitobang lunggel bulhitsah a gamsung huhbit nading le gamtum muthei nading hin Kuki Sepai jouse kipunkhom ding angaidan aseiyin chule KNO hopsunga um nailou UPF sunga nam sepai lamkai ho jengjong banjal a lemna aneijing dan jong aphongdoh in ahi. Kuki State muna dingin houlamkai ahin, mipiho ahin taonan geldoh jeng ute, chuleh pu le pa ten analo nagam jouse chu Kuki state kidel ahi atin ahi. Meilhei letna noiya Kuki chaten imacha imudiu umlou ahi, kuki State inei lou uleh khantouna umlou ding ahi, hetthei khat chu tuchung Census 2011 boina chung'a jong bailam thetía asuhthip thei u ahinlah meilhei letna noiya ium jeh un imacha muding umlou ahi tinjong aphongin ahi.

Pu Jeremy Khongsai, Secy Home KRA in houlim aneina ah, "India govt noiya Home dept. hon naki pumkhom loulai seuva hahsa ding ahi tia aseijing laiyun lunggel thuhtah akineiyin ajonan masangchun kito mona lentah analhunkha jongle lunglen keng in suhmil in akikoiyin mabanding gelnan KNO noiya kikhai khom a panlah khomding phatsahna akineito lhonin akibeltai tin aseiye. Tunia kin-gon kimanhi apatna hiding ahi, group 2 in kikhen nalai jong leuhen datmo ding ahipoi, India te chamlhat kon injong 2 in ana kikhen nai ahin mipi hon aphading pachu ana tosot uve.

Chuma banga chu kiloikhomna 2 kiso jong leuhen mipi tehon KNO atosot diuchu ginchatna kaneiye tin aphong doh in ahi. KNF (S) ahin KLO/KLA a kon ahin houlimna anei uchun kipunkhom apoimo dan atahlang un chule kuki nampi dinga phatnan ahin lonvuh tahding kinepna ahidan aphongun chule KNO in nikhat tengle nampi ngaichat chu ahinlhut diu kinepna aneidan ho aphong uvin ahi.