hochu Kuwait mun'a aum tauve, tun Iraq a US sepai 6,000 apat 7,000 chan aum uve ati.
Iraq akon US sepai kitoldoh hi official toh in White House ahilou leh State Department akon phondohna imacha umlou ahi. Hiche chung chang thua president Barack Obama in lha kichai lam teng phondohna anei maithei ahi. TV channel MSNBC in aseina a combatsepai ho chu akitol doh un chuleh tua hi operation New Dawn ahung lhung ding Lhalam 1 teng kipan ngal ding ahiati. Hiche channel in aseina a Iraq a um US sepai lah-a spokesman chuleh Major General Stephen Lamza in Iraq a US galkon sepai akitol doh tai tin aseiye.
China in aphatsah to lhon’a N Korea kihoupi ding nom
Seoul, Lhajing 20 : China in aphatsah to lhon in North Korea in nuclear galmanchah thua gam 6 kihou ding anom tan ahi. China special envoy Wu Dawei in Pyongyang akholjin pet a chu Korea peninsula hi nuclear
galmanchah umsah lou dinga kihouna ananei u ahi tin North Korean central News Agency chun aseiyin ahi.
Hiche kihouna a chun ima jouse seikhom ding anom uve tin agency thulhut chun aseibe in ahi. Achesa Sempatni a chu Wu in North Korea khopi agavil ahi. China in gam 6 kihouna aum loina dinga pan alah jeh-a kihou ding chu Korea in jong aphatsah ahi. Achesa Lhatun 2009 kum chun UN sanction athah beh a ana um jeh in North Korea chu kihouna a ana pang lou ahi atai. Lhamul lha chun China, US, South Korea, Japan chuleh Russia pan'a a kihou ding chu North Korea ana nom in ahi. Hinla kitepna mong mong anei hih laiye. Lha 4 masang chun South Korean warship akibulu in mi 46 anathi in South Korea leh Washington in Pyongyang angoh lhon in ahi. South Korea leh US in gam 6 kihouna aum masanga North Korea in Warship alhum sah chu mopohna kilah masat hen atil lhone. Hinla North Korea in hiche warship bulu na a imacha kahe phapoi ati in ahi.
New Zealand twipanga ngapi (Whales) 60 tobang thi
Wellington, Lhajing 20 : Tuni chun New Zealand twipi panga ngapi 60 tobang ho chu twi adong laiya ahung vah lut un hijeh chun pot doh thei louvin athi tauve tin conservation official hon asei uve. Tuni jing kah chun ngapi 73 tobang aum uve tin Department of Conservation a Carolyn Smith in aseiye. Hiche jeh chun huhdoh natoh ache lhah masangin atamjo ana thi tai ati.
New Zealand sahlam kaitaia beach mun'a go hat tah aju in hiche jeh chun Ngapi a oh-den ho phabep chu ahingdoh uve hinla go aha juh jeh in huhdoh natoh ache ka vah thei poi tin Smith in aseiye. Ngapi khat huhdoh na ding chun mi 5 alhom pen in ngaichat ahi. Ajeh chu Ngapi khat chu 1.5 tonnes a gih ahi ati. New Zealand gam'a Ngapi beach munía thi hi aum jingin, ningkum Ollha jong chun pilot Whatles 100 tobang athi uve ati.
Twilet na mun hoa galguh bol ho athah beh a aum hi Pak le leiset pumpi dia kichat um ahi
Los Angeles, Lhajing 20 : Pakistan a twilet in atoh khah ho chunga galguh bol hon mi asang a sim ho lungthim a muchi phalou atu din anikho ama chal dung juiyin akilang cheh cheh in ahi. Tun vang hiche thu hi ministers leh officials hon lhang phong tah in asei doh tauve. Hiche jeha chu galguh bol ho ahung hat doh diu hi Pakistan gam ding bouseh hilouva vannoi pumpi dinga kichat umtah ahi akiti e.
Khyber Pakhtunkhwa Information Minister Iftikhar Hussain in hiche gam'a hin galguh bol ho akisu khom
pan kit tauve tin gihna thu aseiyin ahi. Khyber mun'a galguh bol mi 200 val aum in amaho hi Taliban ho kithopina jal'a hung umdoh ahiuve ati. Khyber province ahi Taliban ho mi tampi kiselna mun ahi. Amaho hi aphatseh leh security forces ho toh kikapto jing ahiuve. Hijeh a chu provincial sorkar in kithopina amu vah louva ahileh galguh bol ho hi athah beh-a hung hatdoh kit diu ahi tin thuso miho kom'a Hussain in aseiye.
Hussain in aseibe na a twilet na thil tampi toh ding aumna chung chonna galguh bolho douding vang ahahsa e ati. President Asif Ali Zardari in US Senator John Kerry toh twi let na mun ahung vil lhon chun galguh bol ho ahung hat doh kit ding akichatna ana phongdoh in ahi. Hiche gam'a chanpang nule pa neilou ho chu camp a aum sah un galguh bol din kichuhna apeuvin khonung teng boina sem in ahung pang jiuve tin Zardari in Kerry toh press conference anei khom na lhonía aseidoh ahi.
