Hiche hi Union Cabinet toukhom uva hopthum a lhalo tamsah be dinghi phatsahna um ahi. Langkhat a parliamentary committee hochun MP ho lhalo hi dangka 80001 hisah ding, govt natong hosang a lo tamjoh sansah dia govt kom a ngaidan ana pehlut sau ahi.
Inpi toukhom pet a MP lhalo thu phondoh ahi a chu kiphinna kipan ngal ahi. Hiche thulhuh kibolgo hi govt in velvet hen tin Samajwadi Party (SP), Rashtriya Janata Dal (RJD), Janata Dal-United (JD-U), Bahujan Samaj Party (BSP), Shiv Sena chuleh Akali Dal lamkai ho chun nelkalna anei u ahi. Hiche thu a lamkai ho kiphin toh lhon'a Inpi toukhomna jong nikho khat a dia khongai ahitai.
Thulhut kimuchun asei na ah, RJD luboh Lalu Prasad leh SP lamkai Mulayam Singh Yadav chun hiche kiphinna chu alamkai lhon ahi, ati. Akiphin MP hochun 'kalha lo nagon u kinung lah unî ti sampum in Speaker
Meira Kumar kom lam ajon un ahi. Lalu chun, ìhitobang simkham lou lhalo kikhansah hi MP ho jumso na ahi, ati.
Thulhut in asei be na ah lhalo kalsah nadia ahin gongtoh ho thulhut govt in asanpeh lou jeh a MP ho lungkim louna asanglheh in ahi. Hitoh kilhon a Speaker Meira Kumar in toukhom suboilou a atou namun jondia angeh jeng injong Lalu in ngaipeh lou in, 'Ahin vetoh hon dangka 80001 ti a, tua hicheng bep, hiche hi kijumso na ahi, hiche hi botel tel ding ahi, kitou thim thei ponte' tin adonbut e.
Hiche thu hi seitoh thei ahi toukhom suboi poute tia Speaker tepna koiman asan pehlou phat in Inpi toukhom sunkim chan a din vohchon ahi. Aphadeh pon nilhah nidan 2 avel a toukhomna jong vohchon in aumkit e. Hetding chu MP hon tuletua lhalo dangka 16000 asan u chu akholtoh hon dangka 80001 a kalsah dia govt ahetsah uva hichu parliamentary affairs ministry in dangka 50000 chan dia akhinsuh pehkit ahi.
Langkhat a Inpi toukhom teng niseh a MP khat in dangka 1000 amujong dangka 2000 a kalsah ahin, constituency allowance lha a dangka 20000 leh lha a office expense allowance dangka 20000 amujong alom a kalsah ahi. Hicheng keo hilouvin kholchena jong dangka lakh 1 a kon lakh 4 in kalsah ahikit in, ajiteu jong achenna leh Delhi tolpi kah manbei a train a touthei ahi. Hiche MP ho lhalo kalding achepai dingle lhalo hi achesa kum 2009 May lha a pat hap pehbe hidiu ahi.
Hiche chung chon'a MP hon amanchah dinga car akichohna diuva interest (sum tong) umlou 1 lakh anahi chu 4 lakhs ahi sah tauve. Chuban in road mileage rate 13 per km chu Rs 16 per km ahisah uve. Pension benefits
jong dangka 8,000 akon in 20,000 per month ahisah un chuleh MP insung mite chu anop jat chan first class
ahilou leh executive class a che le thei diu ahitai.
Kashmir a Sikh miho venbitna aumna dia PM heng’a Badal ngehna nei
Patiala, Lhajing 20 : Punjab chief minister Parkash Singh Badal in tuni chun Prime Minister Manmohan
Singh henga Kashmir a Sikh miho venbitna lhingset a aum nadin ngehna aneiyin ahi. Hiche thu a keiman Prime
Minister, Jammu and Kashmir boina a Sikh miho venbitna lhingsetna aum nadiuvin ngehna kaneiye tin Badal in aseiye.
Tu masang jep a chu Kashmir Valley a Sikh miho in kiphinna pan alah lou uvaahileh Kashmir dalha tauvin tia soi kibol lou lekha gihna amu jeh uva Badal hin PM kom'a ngehna hi ananei ahi. Kashmir gam'a tupet ahi Sikh mi 60,000 um ahin miniority lah-a dinga atampen ahiuve. Keiman SGPC luboh Avtar Singh Makkar chu Kashmir a thil umdan atahsa tah-a akholchil na din kasol e tin Badal in aseiye. Patiala mun'a Sant Hardev Singh in programme aneina kinna Badal in houlimna aneina a aseidoh ahi.
Indian warship hon Africa a “goodwill mission” dia che
Mumbai, Lhajing 20: Indian warship 4 ho chu Africa gam phabep a 'goodwill mission' a ache tauvin ahi tin official khat in aseiye. Hiche warship ho chu INS Mysore, INS Tabar, INS Ganga chuleh INS Aditya ahiuve. Amaho cheng hi Africa gam phabep a 'goodwill mission' a che ahiuve tin official thulhut chun aseiyin ahi. Goodwill mission a che hohin akingah teng uleh agam mite toh kichep-golseh chuleh social lam to kimatna kihou khomna anei diu chujou teng leh naval exercises anei ji diu ahi.
Hiche warship ho hin Tanzania, Kenya, South Africa Seychelles leh Mauritius gam ho a navy forces leh Coast Guard ho toh kichuhna aneikhom diu ahi. Hiche chung chonna Reunion leh Mozambique a kinga diu ahi. Hiche galsat kichuhna anei diu hi Indian Navy leh apang ding gam ho adia machalna ahi ding banna gam khat leh gam khat kihet them tona phatah hiding ahi tin official thulhut chun aseiye. Achesa kum phabep sunga India in foreign naval forces ho toh twi chunga galsat kichuhna ana neijing ahi. Hiche ahin French Navy akon Varuna series, Russian navy akon Indra series chuleh UK akon Konkan series hon lolhing tah in pan anala un ahi.
Karnataka a khutdo ho thi chu ‘angaiya thi ahiuve’ tia sorkar in phongdoh
Bangalore, Lhajing 20 : Achesa ni 3 sunga Karnataka gam'a khutdo mi 22 athi jeh in mipi akon in sorkar demna nasatah aum in ahi. Hinla sorkar in athi ho chu angaiya thi ahiuve ati. Hinla janhi jan a mi 2 hospital mun'a athi be jeh in sorkar in medical report angeh in ahi. Chuban in Home Minister VS Acharya makaina in 4-member ministerial team hon khutdo ho umna Relief centre vilna anei un ahi. Acharya hi amatah jeng jong doctor ahin in hijeh chun aman aseina a athi ho chu angai monga thi ahiuve tin doctor hon certified abol uve ati. Ahin hiche thu a Social Welfare Department commissioner henga khutdo ho umdan semphat na ding in exper committee kisem doh ding ahi ati.
Tupet ahi Beggars Relief Centre a mi 2,500 aum in hinla mi 900 bep umna dinga kibol ahi tin aseiye. Hitobang khutdo ho lah-a chronic natna atam in chuleh amaho hin natna athoh jou lou jeh uva athi tam uva ahi tin Acharya in aseiye.
Relief Centre mopohna nei official ho henga neh-le-cha pha chuleh twi theng amu na diuvin thupeh aneiyin ahi.
Water Resources Minister Basavaraj Bommai, Minister for Law S Suresh Kumar chuleh Minister for Social
welfare D Sudhakara in Acharya akilhonpi un ahi.
Australian mi 2 pan’a a mi 3 police hon man
Chandigarh, Lhajing 20 : Australian mi 2 panna in police hon mi 3 aman un ahi. Amaho hin khangdong khat
puimanga anule pa te kom'a sum thum ding agot u ahi.
Amaho chu Grant Alen Austin, Symond Gimpy chuleh Ropar akon Gulsher Singh ahiuve tin IG Pradeep
Srivastava chun aseiye. Amaho hi akihounau thuguh ahetdoh phat uva Chandigarh khopi a parking mun khat a amat doh u ahi. Amaho akon in chemcha 2, Charas 20 grams chuleh air pistol 3 jong amatdoh tha un ahi.
Police hon thudoh aneinauva amaho thum chun khangdong Harsh kitipa chu puimanga sum ngehna nei ding angaito uve tin police in aseiye. Harshkitipahimasang jep a chu Gulsher toh lekha ana sim khom lhon ahi.
Srivastava in aseina a Harsh nule pa chu mi haosa tah ahiuve ati. Australian mi 2 chun bank account ahondoh
jou lhon phat a Malaysia akon a hung lhon ahi. Hiche bank account chu Harsh lha dohna dinga apeh diu sum
koina a aman kigot u ahi. Australian mi khat chu masanga jong criminal case neisa ahi atiuve. Amaho chu
NDPS Act Arms Act, kidnapping and conspiracy case akibol khum tauve.
Cabinet in Nuclear Bill phatsah ta
New Delhi, Lhajing 20 : Tuni chun Union Cabinet in thucheng 'and' akilah doh to lhonin Nuclear Liability Bill
aphatsah tai. Hiche Bill hi parliament a kipo doh vah ding ahitai. Standing Committee on Science and Technology in report apeh na a clause 17 (A) chu akichai 'and' hileh anatiu ahi. Chuban leh clause 17 (6) jong chu semphat dingin ana phatsah n ahi. Hinla Bharatiya Janata Party (BJP) in clause 17 (6) dan um chun nuclear supplier ho dingin imacha venbitna aumpoi ati un ahi.
Science and Technology a parliamentary standing committee 31-member ho chun vahchanni a chu Rajya
Sabha leh Lok Sabha a ana pohdoh u ahi. Sorkar in opposition BJP ho deisah phabep alah peh utoh lhonía
hiche report chu achaina ana um thei bep ahi. Vetsahna compensation 500 crore chu 1500 crore changeiya dinga akalsah u ahi. Hiche Bill hi athupi na khat chu parliament a kiphatsahna aum louva ahileh India leh gamdang ho nuclear commerce umthei lou ding ahi.
