Achesa kumnga sunga thilman suhnemna dinga sorkar natoh hi ivetleh thilman kalna jeh penhi amudohlou daníun akilange. Ahinlah, sorkar hin thilman kalna jehpenhi amudohjou pouve tiding jonghi adihjou behseh poi ñ Prime Minister a kipat sorkar vaihom hohi economic them tamtah aum'un ahi. Thilman kalhi sorkar dinga jong minsetna ahijeh hin sorkar hin thilman hi asuhnem nomlou ham tia gelding jongchu adihjoupoi. Thilman kalhi koi sorkar hijongleh akihet mosah thei thil ahipoi. Hijeng nama jongleh, sorkar hin thilman suhnemna dinga natoh dihtahchu atoh louva ahileh, ipi hamkhat hi adihlou aumtai tia hetjeng thei ahi.
Achesa kumnga sunghin sorkar hin phatkhat khatleh thilman nemlha ding ahitai tin ahin phongjin ahi. Milham hohin thilman nemna dinga sorkar in atep nikhohi avel vel'in ajatan, ahinlah thilman anemdeh pon, akikhoto jingjoh in ahi. Sorkar hin thilman nemding ahitai tia aseihi meteorological department hon go juding ahi atiuva ajuhlou tengleh, juding ahi tia avel vel'a aseikit tobang bep asohdohtai. Aboina penhi changlemim hihen, meding leh thei hijongleh supply kivatna ahin, lougasoh apotlou jehvang ahipoi. Thilman suhnemna dinga aphapentah chu bollouvin sorkar hin Reserve Bank of India (RBI) kom'ah monetary measures mangchao vinlang thilman sunem un tin mopohna anotkhum bepseuve.
Sorkar hin changle mim 45 million tons jenhi akichon akikhol nengchetne tin kiletsah tah in aseije. Het hahsa kahtchu, hichihi sorkar hin changle min akholna thei aneiho sanga tuni a tamjo ahitai. Akholna ding neilouva changle mim tamtah akoijeh a hi aval sehi dukan'a ajohdoh dinga thilpha ahi. Chutileh, thilmanhi hungnemdom tante. Chuleh sumkolvei changle mim koikholía aman ahahteng kijoh hokhun sorkar hin thilman suhnem dinghi agelkhoh mongnai tia alungsung uva kichatna khat aneidiu ahi.
Leiset chung munchom chom'a jong thilman suhnemna dinga hiti a hi kibolmong ahi. Ibol'a sorkar hin abollou ahitadem? Sorkar in changle mim tamtah akikoi kholíe atihi ajou aseiham ahilouleh, changle mim akoikhol hohi achomlangbeh ahikhadem? Khatjosang sang hinte. Tunaicha newspaper a thulhut kibol dung juiyin sorkar hin Punjab a kon'a changle mim achohchu 90 per cent leiset ahi. Hichihi atah ahileh changle mim kikoi khol hohi dukan'a johthei ahipoi. Kijoh jongleh nehthei louchu kon achoh diham. Hichi thuhi hoitah a kholchil'a amopo saplen hohi talen matsahtei dia kul ahi.
Tunaicha petrol man akal hin India politics jong ahin suhkhah ding ginmo aum'e. Ajehchu, petrol man kaljeh a atoh khahpen hohi mi tahsanthei, thusei them ahiuvin mipi lungelhi lamchom langbeh a ahinkhel diuhi tahsan aum'e. Hijehchun, UPA sorkar hin Opposition party hi amoh noisethei ahitapoi. Election kitleh India politics hi hung kile bungbutun thei dinmun ahi. Cenral sorkar in petrol, diesel, kerosene leh LPG man akalsahjou nikho phabep jouvin meman leh theiman akalpai jengtai. Thaoman akal teng nitin ngaichat thilmanho akaljin milham hodin pohgih hahsatah asohdoh jitai.
Loubol hohin alougasoh uhi khamgahna leh tax umlouva adeinalai laija ajohtheina diuvin sorkar hin chamlhatna peleu thilman kalhi ventupmin hung um tante. Lou gasoh jousehi sumkolvei Baniyas, Marwaris leh adang hohin acheljeh uhin adeiphat phatnun lougasoh hochu aselchah kheh un aman akalsahji taove. Loubolmi hohin alougasoh uhi thil tampijeh in ajoh thei pouve. Alougasoh man hopthum'a hopkhat bouhi achangun adangse hi
sumkol veihon avallhumji taove.
Gentheival jeh a amale ama kithat loubolmi tampi aum vangin sorkar in apohgih u ngaijangpeh nading toh-gon aneipoi. Sorkar hin alouthei louva abolding khatchu lougasoh chunga kivei Baniyas leh Marwaris kiti hohi asuhmang angaije. Loubol hohi tax kilahda henlang alougasoh uhi adeina jouseuvah kijohsah theileh akichoh ho chuleh loubol hohin aphat chompi lhehdiu ahi. Sumkol veihon godown lentah tah a lougasoh ho akoikhol houkhu sorkar hin longdoh henlang bolsah daleu thilman hi nem tante.
