Koima ginnaleh kichatna neilouva mipin alun gel aseithei ding chuleh athejahthei dinghi democracy kivaipohna alolhina dinga ngaichapen loi ahi. Ajehchu, min achandinga kilom a rights hochu alungel midang kom'a aseithei ding chuleh thudih ahol theiding hi ahi. Ahinlah, mi lungel akiseisahda a alung gel athejah dinghi ikhamtan tengleh mipi rights hi kisuh nempeh ahingal'e. Mundang gamdanga ipithu soh a ipi lungel umtam ti mipin ahet dinghi ngaichat ahi. Thudih akiseiphong theilouva lungel ikipehto theilou tengleh mipihin iti sorkar thunei vaihomho suhkhel ahet tah diuham. Koiman gin naleh kichatna neilouva alungel aseithei ding kitina a hin hetbe diu khatchu jatdang namdang jong seida tadi leuhen eimite chenna gambeh hi alet tahjeh hin tahsatah a kimuto a kihoujing dinghi aphatseh a thil hithei ahipon, bolthei penchu Press a kitatdoh newspaper leh magazine imanchah diuhi ahipenne.

Thunei vaihomhon nehguh leh thildihlou abolhou tahlangna dinghin press hin chamlhatna anei angaije. Press hin nehguhleh thilphalou atahlangjeh in sorkar vaipoho kisem phahih nama jongleu hitobang thu aumtai ti beh hi mipin ahetheije. Eimite chenna gamho meilhei ten alahgotnu hi newspaper isim'a konna ihetchenjeh uhin COPTAM ho lamkaina a lunglhailoukijotna chu muntinna mi simsen lou kitohtah a ijaotheiju ahi. Newspaper hin eisosal inte ti kichatjeh hin sorkar vaihomhon thilphalou tamtah bol louvin koijunte tihi ginchat aumme.

Democracy kivaipohna a thunei vaihomho chavalna velhi a pangchu press ahi. Manipur keo hilouva India gam mundang danga press gihsalna kinei hohi ivetleh India chamlhat ahina kum somnga alhintah vanghin democracy hi akikhanlhit naipoi tihi mudohthei ahi. Marathi newspaper Loksatta, editor pan alungel asutna a Maharashtra sorkar hin mi limkhat songchunga khetdohna dinga dangka crore 100 asuhmang sanghin vaichat gentheijeh a loubolmi kithatho suhtangna dingleh khantouna dingin kimangleh pahjonte atijeh a Nationalist Congress Party nungjui mi 60 in editor pa chenna in asuhset uvapat hin press chamlhat dingthu hi ahung kihaseije.

Aboinatah khat hi koimacha hin mipi phatchomna ding hijongleh eima lungel toh kitohlou hohi akingai theipoi. Democracy noiyahi editor titahlouva journalist hojeng jonghin alungel sutnathei tha anei ahi.

Vangset umtahchu leiset chunga democracy letnapen ichennao India gamma hin press chamlhatna hi akijapehpoi. Press chamlhatna hi suhboipeh louding ahi akiti vangin inop nop sutjengthei ahi tina ahidehpoi. Semthu a mi akithodohkit theilou nahel dinga suh minset kiti hohi bollouvin aphai. Press in ahet dingchu chamlhatna aneihi thilman tamtah ahin chingtheitah a aman ngaija ahi. Hichi chamlhatna hi adihlou langa akiman tengleh mipin press/newspaper atahsana hi lhadaithei ahi.

Press chamlhatna kitihi mihemmin chamlhatna aneidang hotoh akikhetna chu hivahin mihem chamlhatna bannah institutional chamlhatna jong angaichan ahi. Press chamlhatna hi mihem min alungel newspaper a athejah theikeo hilouva press injong thusoh leh lungel jatchom chom achom khomma asothei ding angaije. Editor leh journalist hohi newspaper neihon kan-gahna anei uva ahilouleh mipi hohin hitobang thu nasothei loudiu tia gihna aneiteng ulehin deibangtah in thusoh achomkhom thei tapouvin chuleh alungel dannu jong asuntheiji tapouve. Hitobang lungputhi isuhbeilou uleh press chamlhatna hi deilheh jong leuhen umthei ponte. Lungel kijahmat toding idei uva, mipin thudih thusoh dihtah asimdiu idei uva chuleh nampi boinathu a lungel sekhom ding idei uleh press chamlhatna hi isuhboipeh loudiu ahi. Press in ginle ja neilou hella thudih ahintadoh tengleh aphatchompi chu press neiholeh editor, journalist ho ahipon mipijoh ahibouve.

India'n chamlhatna amuna dinga Indian press ho pontho danleh akipehdoh dan uchu koiman sumilthei ponte. India in chamlhatna gal asatlaija lamkai len tampichu journalist ahiuve. Alungellu newspaper a asuthou chun mipi anakaihoi ahi. Tukhanga ichen khompiu hon imacha a aselou Kuki te jonghin inei chasunnu Gosem newspaper hi imanchah uva nampi kitolna ding lamlen laina a imandiu dei aumme. Lamkai ho, nampi phatchomna dinga lungel thuhtah neiho, japi hetlouva khoh thuguh hehon kiphatlamna neilouva ilungelíu isut diu ahi. Ajehchu, hichu mipi lamhilla pangding ahi.