India gamma hin insunga kingailutna asangin chuleh chapanghi kumthum kumli chan geija in'a educa tion pehding aphai akitin ahi. Ajehchu, nulepa leh pilepu in ahil hokhu midang koimachan ahil theipoi tia kitahsan ahi. Ahin, phat achechen hichi lungput hi akikhel in play school hi ahung minchejep jeptai. Adeh a khopi sunga khun insungmi pilepu ho geiyin akicheng khom tapon chuleh nulepa jong anigel lhon'in natoh ahin neihontai. Ani a natongho dinga hin play school hung umdoh hi vangphat umtah ahi. Kholchilna neihon kumseh in play school hi 40% in atambedan amudoh un ahi.Chihin India education'a play school athupidan avetsah e. Chapang neocha hon khantouna aneitheina diuvin play school hi angaichan ahi. Play school akai uhi amaho dinga in adalhahnao masapen ahin, akichep uva kon'a thilthah ajil'u ahi. Amahohin lekha asimdiu ahipon, chapang dangtoh akivop uva, la asah uva chuleh adang dang abol uva kon'a thilthah ajil u ahi.

Tuhin khopi sunga nulepa tehin chapang kumni ahung lhinleh play school in asolpaiji taove. Ajehchu, play
school hi chapang dinga ësafeí ahiban ah aloitoh akichep khomleh thil ahebaije. Play school hohin chapang thanomtah a akichepna theiju ninglhing setnin akoijun chuleh ahil uva pang jilkungho jonghi themtah ngen
ahiuve. Chapang hohi lungmongtah in aumsah jou uve. Play school hin chapang lhomcha bou alahjeh hin abon
chaovin hoitah in avekoljou uve. Nulepa tehin lungmongtah a chapang khantouna dinga play school hi anganse thei ahi. Play school hoitah tah hi muntin ah akihong- tai. Atamjohi private a kihong ahi. Khopi sungho a play
school machal danhi ivetleh hetman loukah a hi India pumpi ahinlo ding ginchat aumme. Akichepna diu thanopna thei tampi akikoiyin, an nehje leh junle ehthahje geiyin ahil un, theng sitsetna aumtheina diuvin avekol ding mi lhingsetnin aum'e. Play school hi lhumlam gam'a hung kipan ahivangin India a hin alolhing lheh e. Chapang hohi culture leh tradition jong akihetsah in ahi. Kumhei thupiho Raksha Bandhan, Id, Christmas, Independence day hohi amang jiuve. Music leh lam jonghi abolsah un ahi. Chapang lekhasim nomlouho tingpuma akijepji laileh school kaiding galgin'a igin laichu achemangtan, chapang hohi thanopna theitah a joh lekha kisimsah ahitai. Play school jeh hin chapangho thanom tah in school akai taove.

Play school hin chapang chu school tah-tah a ahung kaiteng aboilouna dinga gontupsa akoi ahi. Kisuh thengji, kivonji, an neh twidonji akijil un, loile goltoh kichepna leh nehthei kihop dingdan leh damtheina dinga hygienic habits ho ajil uve. Cha changkhat neiho dinghin play school hi akijencheh e. Ajehchu, cha khatsehbou aneihonjeh hin akhohsah val hon in umchanpha jilna dinghin phat aneilhomtai. Aloiho thil hopji, mi lungsetji kiti hohi play school a aloi hotoh akivopteng ahin jildoh ahin, inía achangseh ahijeh in ajildoh ding tahsan ahipoi.

Play school hi aphat louna jong aum thouve. Mi themkhat chun hibang chapang play school kaisahlou akhohna ima aumpoi, alungthim ujong khangtou chom ponte atiuve. Play school aphatlouna dang jonghi chapang kumlhom behseh a anutoh kikaikhen hi thilpha ahipoi. Psychologist honjong chapang valla anutoh kikaikhen hohi mi ngailutna alhasamnom uve atiuvin ahi. Tulai khanga education hi sumhol nanbou akimangtai. Play school a jilkung ho atamjohi hoitah a chapang hilna lam'a kichuhna neilou ahiuvin, ama hohin chapang chu education dihtah apejou pouve. Play school a jilkung akikou tengleh apply hinbol hokhu atamjo graduate chaitil ahilouleh in'a bolding ahetloujeh a phat sumang nomho ahijiuve. Sumdeijeh a hungpang ahijeh uhin chapang lunglut tah a hildinghi agel thupi pouve.

Aminche phat hin mi tampihin play school ahongtai. Hijehchun, chate dinga play school ihol teng lehin thil themkhat vetchil ding hochu ñ school chu chapang khankho ding gelna a kiphut hinam, school aphunao jeh pipenchu ipiham, school dang sanga jatchom jepma chapang chu iti ahilgot uvem, jilkung hochu phatah a chapang hilna lampanga kichuhna nei hinam ajehchu play school phachun chapang aphalanga asemdoh thei banghin play school phalou chun chapang asuhset kit theima ahi. Jilkung khatnin chapang ijat ahilding ham? Aphapen chu jilkung khathin chapang som kalval ahillou dingin aphai. School chu kholtoh inlang, class danho chu len'a hinam chuleh huilutna ding phatah a um hinam. Chapangho junle eh tha a acheteng avesuiding mi umía hinam? tihohi vettoh angaije.