Washington, Lhamul. 31: Lhamul nisim 28 chun Washington D.C. a pansa Voice of America (VOA) Burmese television chun Indo-Burma kikah thu'in Pu Nehginpao Kipgen, Kuki Internationa Forum, general secretary chu interview abol un ahi. Pu Nehginpao Kipgen hin "the rise of political conflicts in modern Burma (1947-2004) a kholgilna anei ahin, Burma leh Asia chungthu a lekha asut tampihi vannoi kolkimvel - Asia, Africa, Australia, Europe leh North America in akithejah tan ahi. Amahin U.S. State Department Scholarship Program anamu e.

Pu Nehginpao sei dung juiyin tua military regime noija Indo-Burma kivopna hi phat chomkhatna dinga gam teni hin angaichat ahijeh a kivop hon ah ahi.

Economy a China te thaneina khamtan ding, India sah-solam gamma galguh bolho boina suhlhap ding
tihohi India in Burma toh akivopna honía agelkhoh penloi ahi tin aseije. Interview minute 12 jen kibol
nahi Lhamul nisim 31, 2010 nichun Burma pumpi ah akilhan ahi.


Iran in American mi 3 alha doh dia Obama in ngehna nei
Wahington, Lhamul 31 : US president Barack Obama in janhi chunk um khat val kihen American mi 3 hochu alha dohna din Iran kom'a ngehna aneiyin ahi. Achesa kum khat masanga chu Iranian authorities hon Shane Baver, Sarah Shourd chuleh Josh Fattal chu ana mat u ahi.

Amaho chu Iran to gamgi Iraq gam Kurdistan mun'a kiking ache nauva kiman ana hiuve. Het phah louva Iran gamgi akho khel jeh uva Iran authorities ho nana mat u ahi.

Obama in thuphon aneina a Iran sorkar in apet pet a Sarah, Shane leh Josh chu alha doh din ngehna aneiyin ahi ajeh chu kum khat val athu kitan louva kikoi chu dan toh akitoh poi. Chuleh Iran leh US kikah a kihet themlouna aso doh cheh cheh ding ahi tin Obama in aseiye. Iranian authorities hon aseina a amaho chu US spy mi ahiuve atin hinla amaho chunga themmo na dang vang anei pouve.

Hinla Obama in aseina a amaho chu US sorkar natong ahi pouve tin kichen tah-in aphongdoh in ahi. Akiman ho insung mite chu amasa pen din Lhaphul lha chun ana kimuto sah un ahi.

India leh US in nuclear fuel reprocessing a kinoptona nei lhon
Washington, Lhamul 31 : India leh United states chun civil nuclear deal anei lhon banna athah beh in nuclear fuel reprocessing a kinoptona anei kit lhon tai. Hiche kinoptona chu US a Indian ambassador Meera Shankar leh US under Secretary of State William Burns in State Department a janhi achu soi anabol lhon ahi. Hiche kinoptona dung juiya US nuclear material ho chu India in reprocessing abol thei ding ahitai. Reprocessing mun ho chu International Atomic Energy Agency vetsuina noiya umding ahi.

Hiche reprocessing kinoptona aum to lhonna US firms hon India civil nuclear sector a natohna anei thei diu ahitai. Hinla hiche hi aumthei na dinga chu India in nuclear liability law phalna apeh angaiyin ahi. Hiche phalna hi aum teng leh India nuclear power market $ 150 billion ahi US Companies hon tohmun anei thei diu hi. Tua kinoptona aumthei hi US leh India kigolchatna semhoina khat ahin chuleh India a US president Barack Obama phallha teng ahung kholjin ding kinep aumíe tin Shankar in aseiye. Obama ahung kholjin in aseiye.

India in energy angaichat nahi ahung lhung ding 2022 teng leh 35,000 MWe lhinsah ding chuleh 2032
teng 60,000 MWe hetsah ding tohgon um ahi.


Israel jets hon Gaza mun’a Hamas ho bulu, mi 9 kitongkha
Gaza, Lhamul 31: Janhi a Israel warplanes hon Gaza Strip a Hamas ho buluna aneina a Palestine mi 9 akitongkha um ahi. Gaza strip hi Islamic Hamas movement hon vai ahopna mun ahi. Amit tah-a mu hon aseina a Hamas security forces ho training compound a um Palestine police mi 9 akitongkha-e ati. Amaho chu Shifa Hospital mun'a ambulance in apolut uve ati.

Hamas security forces in aseina a Israel jet fighter in mun 2 jong buluna aneiyehinla koima akitongkha aumpoi ati. Thulhut kimu dung juiya military planes chun Gaza leh Egypt gamgi a thil pohna a kimang leiko kivut chu akapse ati. Russia a kisem Grad rocket chu Gaza Strip akon Israel gam Ashkelon town a ahin kap jou uva Israel in lethuhna hi ananei ahi.

Popular Resistance Committee hon Israel buluna anei u chu kiphonna anei un ahi. Arab League in Palestine leh Israel kimai to a kihou ding asom chu anoplou jeh uva buluna hi anei uvin akiseiye.

Kenyan mi 3 in kampala kibuluna jeh a Tolthat case 76 a kingoh
Kampala, Lhamul 31 : Achesa tulha nisim 11 nia kampala mun'a mi tamtah in World Cup kichep avet pet a buluna ana neiya kingoh Kenya mi 3 ho chu Uganda court a 76 counts tolthat case in themmo akichan un ahi. Amaho chu Hussein Hassan Agad, Mohammed Adam Abdow chuleh Idris Magondu ahiuvin Kampala magistrates court a ana kipui un ahi. Hinla amahon ngaidam thumna jong anei deh pouve. Amaho hin Kyadondo Rugby club a world cup veho abulu jeh un 61 counts in themmo akichan un chuleh Ethiopian restaurant a mi atha jeh un 15 counts in themmo akichan uve.

Chief Magistrate Deo Sijjemba in aseina a amaho chu ngaidam thumding court in ana phal lou ahi ajeh chu hiche court a chu galguh bol ho thu kisei thei lou ahi ati. Amaho thum chu ahung lhung ding Lhajing 27 teng magistrates court a kipui kit diu ahi hinla Uganda Directorate of Public Prosecutions in amaho case hi High Court a achon masangse a ngaidam athum diu kiphal lou ding ahi. Amaho chu security venbitna sangtah noiya court a apui un minute 15 tobang themmo akichan nau phondoh ahito lhon in songkul a aum kit tauve.