Akikhom mipi jousen nuclear bomb kilhah pet tah jinglam 8:15 am don tah chun minute 1 thip chet in aum un ahi. Chujouvin Vakhu 1,000 ho chamna vetsahna in anal ha un ahi.
British opposition party hon Iran nuclear thua Cameron demna nei
London, Lhajing 6 : British Prime Minister David Cameron in dih lout ah-a Iran in nuclear galmanchah anei tai asei jeh in opposition politicians hon nasatah in demna anei un ahi. Conservatives a lamkai Cameron in foreign policy a alosam tai tin Labour Party hon demna anei un ahi.
Cameron in Lhaphul apat Prime Minister ahin tuh apat in international affairs lam'a sei setna hi ana um jing ahi. Aman aseina a European Union a Turkey ahai jong hi thil phatah ahi tin Turkey chu pachatna ana neiyin ahi. Southeast Englande Hove mun'a mipi hon thudoh anei nauva Cameron in Turkey hi Middle East a chamna sem dinga palai pha tah hiding ahi.
chuleh Iran in nuclear galmanchah aneitai tin ana sephongin ahi. Lhumlam gam ho in aguh-a Iran in
nuclear gal manchah asem kigo jinge tia ana ngoh jing u ahin hinla Tehran in mipi phatchom na dinga kibol ahi ati-e. Labour lawmaker Chris Bryant chuleh masanga Europe Minister anahi in aseina a Prime Minister in foreign policy itobang a achepi khel kit ding ham vetsui ding ahi ati. Foreign policy lam'a abol khel dan chu akeng teni akam sunga um abang tai ati.
Pentagon in Classified documents jouse lepeh dia WikiLeaks hetsah
Washington, Lhajing 6 : Pentagon in WikiLeaks website kom'a classified US military documents jouse apet pet a ale peh din thupeh aneiyin ahi. Hiche documents ho chu databases akon kila doh ahi. Defence Department in aseina a WikiLeaks in Defence databases ahilou leh records ho akon a kila doh documents jouse chu US sorkar ale peh nadin Pentagon spokesperson Geoff Marell in aseiye.
Tu banía Defence Department classified information ho akiso doh kit leh thil khohse cheh hung lhung
ding ahi. Hijeh a chu WikiLeaks in agan nathei pen'a hiche thuguh jouse chu US sorkar kom'a ahin peh lut ding chuleh ama website, computers leh records jouse a kon asuhmang soh kei ding ahi tin Morrell in aseiye. Tuchanna kiso doh ho jeh in jong Afghanistan a gal kibol na a sepai ho leh Afghan
mite dingin kichatna lentah aumtai tin aseibe in ahi. Morell in aseina a hiche thuguh ho chu US sorkar a ahin seidoh thei lou thu tampi um ahi ati.
Gaza strip a in kum 800 khat chu museum a kibol doh
Gaza, Lhajing 6 : Kum 800 jen selouva um Gaza Strip a inn khat chu museum (thil lui koina) in
aum tai. Hiche in mun ahi khanglui thil 1,300 tobang kikoi ding ahi. Southern Gaza Strip Khan Younis mun'a in neipa Marwan Shahwan in aseina a hiche museum hi keima chang she natoh akon umdoh kigo ahi ati. Hiche inmun chu 165-sq metre a len ahin masang lai Roman, Byzantine, Ieh Palestinian phat laiya thilho umding ahi tin Xinhua thulhut chun aseiye.
Khut a kijih thil, geometric design hoi tah tah, thil sum, chuleh 1948 masanga Palestinian numei ho traditional dresses jong kikoi ding ahi. Kum 45 a-upa shahwan in aseina a Gaza mun'a thil lui hol in
kavah le jinge, keiman na kaha toh jeh a mun tampi kachot a thil lui ho kachoh ji ahi tin aseiye. Aman aseibe na a kaneo laiya patna thil lui hohi kana chom pan ahitai ati. Tuna ma museum hi Arab leh Western mihon avil pan un chuleh Gaza Strip thusim umdan jong ahet be chom uve. Hinla Shahwan
in sum le pai imacha ala ngai poi akiti-e.
Spy chief a dia James Clapper chu US senate in photchenna nei
Washington, Lhajing 6 : President Barack Obama in alhendoh Lt Gen (retd) James Clapper chu America National Intelligence a Director dingin US Senate in photchenna aneiyin ahi.
Director mopohna aneina dinga clapper in agencies 16 ho vetsuina anei ding ahitai. Hiche lah-a chun US intelligence community, adeh-a central Intelligence Agency (CIA) leh National Security Agency (NSA) ho jong apangin ahi. Air Force General retired pa hin Dennis Blair tohmun akhel ding ahi.
Christmas nikho a North West airplane a bomb ana um jeh in president Obama in Bihar chu demna ananei in ahi. Clapper hin kum 40 val public service na ahin toh ahitan hiche phat sunga chunk um 32 sung Air Force a na ahin tongin chulet intelligence community lamkaina chom chom jong ahin tuh in ahi. 9/11 aum jouva intelligence agencies ho natoh ache khom theina dinga Director post aum jouva pat Clapper hi a 4 channa hiding ahitai. Kum 46 tobang intelligence na ahin toh ahi jeh in General Clapper hi hiche tohmun ahi lhingsel ahi tin Senator Dianne Feinstein in aseiye. Clapper in Pentagon a Defence for Intelligence a Undersecretary in jong ana pangin ahi.
LeT hon Mumbai abulu chu Al-Qaeda ho thupeh akon ahi: US official
Washington, Lhajing 6 : Pakistan a pansa Lashkar-e-Taiba galguh bol hon Mumbai khopi abulu chu Al-Qaeda ho thupeh akon ahi tin top American counter-terrosim official khat in aseiye. Aman aseibe na a tu hin hiche galguh bol ho chu vannoi mun tinna aum kigo tauve ati. Lashkar-e-Taiba hon America douna leh buluna vang anei pouve, hinla masanga Mumbai abulu u chu al-Qaeda ho jeh ahi tin State Department a counter-terrorism a co-ordinator Daniel Benjamin in aseiye.
Mumbai kibuluna a American mi 6 athi in chuleh amaho chun Lhunlam mi adeh-a Israel ho thading angaito uve tin Benjamin in thuso miho kom'a aseiye. Lashkar-e-Taiba, Tehrek-e-Taliban chuleh adang dang ho hin Al-Qaeda toh lunggel kibang anei uve. Hiche jeh a chu Lhumlam miho chu hoilai mun hijong leh tha ding agot u ahi. Hitobang dinmun a um jeh un mun chom chom'a khat le nit ha a jam mang ding chu amaho lunggel leh chena lhongpi ahi tin Benjamin in aseiye.
Pak a Al-Qaeda ho hi America dinga kichat umpen ahi
Washington, Lhajing 6 : Middle-East apat a South Asia a galguh bol ho adeh a Al- Qaeda ho Pakistan gam'a aum uhi America dinga kichat um pen tah ahiuve tin US state Department in aseiye. Annual global terrorism report kibolna a Al-Qaeda leh akikhut jop piho Pakistan, Yemen chuleh Africa gam'a um hohi US dinga kichat umpen ahi tin akiseye. Achesa 2009 kum'a Pakistan a Al-Qaeda umho chu galguh bol ho lah-a thanei pen ahiuvin hijeh chun US dinga kichat umpen ahiuve tin states Department a counter-terrorism co-ordinator Daniel Benjamin in thuso miho kom'a aseiye.
Benjamin in aseibe na a athah beh in hiche galguh bol ho hi ahung hat doh kit un hijeh chun US buluna leh gam danga US natoh bulu thei dingin aum jing uve ati. US douna in Al-Qaeda hon natoh
anei jingun chuleh mi athah ala un kichuhna jong phatah in anei sah uve. Tun mi alah hou chu Western Europe leh North America a jong tampi ala lut tauve tin Benjamin in aseiye. Thulhut in aseibe na a tua Pakistan gam'a Al- Qaeda ho hin sum le pai in Afghanistan a Taliban ho hi akithopi jinge ati.
