Twi nengchetna akikholna thei dinga vadung twi kitinghi Roman ten anabollun amaho masan gin jong anakibol tai. Mesopotamian tehi dam samasapen dinga ginchat ahi. 1949 kumchun leiset chunga dam len 5,000 aum in, 20th century kichailam chun 45,000 aphatai. Dam neohi lakh get aum'e. Tukhanga hin dam kisemlona penhi - mipi donding, loubolna ding chuleh industry ho manchah ding ahi.
Gojuh hi seithei ahipon, munjouse a ajuhdan akibangpon, tukum jutei tei nante tithei ahiloujeh hin kumsottah
manthei dinga damía twi kikhol hi thilphatah ahi. Dam kisah lohi ajehdang jong aumme. Thinglhang moul le lhanglah a go ahajuh tengleh vadungin aketji tapon inlelou, changle mim asusen, ganchaleh mihemmin jong
athilo theijin ahi. Twisoh hi damía akitinleh thil asuse tapon chuleh gamgot laija twi ahahteng manding anengchet theije.
Dam phatchomna dangkhatchu hydroelectric power akisem theije. Dam'a twihi alampi kisema turbine anuh a akipeisah tengleh mei kisemdoh theija ahi. Dam akisahdoh photleh electricity hi tanglou hella semdoh jingthei ahitai. Mei ingaichatlou tengleh twi ilhadaleh ana kikhol intin mei ingaichat tengleh lhakit thei ahi. Electric hi dam twija konna akisem leh hui asunenpoi. Dam twi jonghi nuclear power station hon akimange. Vadung themkhatchu konga pal galkai thei ahipoi.
Ahinlah, dam isema twi itinthuh teng konga chemat tole nathei ahin gamsung "communication system' asem hoijin ahi. Gam khangtoulou hon thil umdanhi ajatchom jep'e. Africa gam'a mipi hokhu agancha hotoh twi umnaho a kichonle le ahiuvin, twi aumlou teng lehin natna alangin, keil alhan gancha leh mijong athin ahi. Nile vadunga dam asahjeh uhin lou abol theijun ganchaleh mipin hinna in anei uve. Twi tampi akitinkhol tenglehin mi tampi dinga nga matna kivahna theijong ahi.
Vadung twi damía kiting hin thil phalou tampi jong asodohsah theije. Gam lentah, thingphung louphung leh kho tampi twijin achup jitai. Khosung twijin achupjeh a kichaodoh holeh environmentalists hohin dam kisah dinghi adei pouve. Akichaodoh hohin simsenlou gentheina atodiuhi hetsa ahi. Dam kisah aphatlouna dangchu vadung tampihi gam nilethum ahopa ahijeh hin vadungin ahopa masat gamho hin vadung chungah tha ahao uve. Gamkhat phatchomna dinga dam kisahi gamdang dinga doumah umtah ahiji e.
Hichithu a hin USSR leh Turkey akiboijin, Egypt leh Sudan akiboije. Tipaimukh dam kisem dinghi Bangladesh
in nasatah in tintanding agon ahi. Gallen akisat tengleh galmihon damhi asuse jiuve. Leiset gallen nina a Mohne See dam asuhset jeh un Ruhr gamkolkah a industry hochu asegammin hinkho jong tampi amangthah e. Dam hoitah a akisahlou jeh a achimlha jong tampi aumtai. Damlen sahna dinga sum tamtah lut ahijeh hin ahung tondoh nadinghin kum tamtah angaije.
Sorkar hin Tipaimuk dam ahisahgot hin alhanga cheng mipihon theitop sunin anangun akisah louna teidin pan alaove. Ichenna gamle lei, khosung vengsung twijin ahinchup dinghi igelleh kichat louthei chu ahipoi. Tipaimuk damhi ahung kisah chaiteng national highway - 53 lampi saotah leh lei ijat hamkhat pihi twijin ahinchup dingin akiseije. Imukhahlou thilthah hi ahung umteng ilungsunghi kichatnan alodimji mong ahi. Hitobanga dam lenhi igamsung uva aumkhah loujeh hin alhanga cheng isopiu Hmar mipite lungthim akicholthei tapoi.
Tipaimukh multipurpose Hydroelectric Project adeilounao vetsahnan Sinlung Indigenous People Human Rights Organisation (SIPHRO) hin "dam lentah kisahin mipite hahsatna sulhomdeh ponte. Mipin angaichat hi education leh Tipaimukh gam miten acham uva khantouna akihol theina diuvin sum angai chaove. Chuleh, World Commission on Dam (WCD) in dam len kisahjeh in mi tampihi environmental refugees asohdoh taove tihi damlen sagohon asuhmil loudiu ahií tin asei uve.
Hydropower project hin akingai chajat mei eipe theijin ahi. Hijeng nama jongleh, agam mite ding gelnan dam hi akiche lhahpi masanga agam mite ngaichat vetlhah theina dinga vaihomna langhi kheljep min phante. Dam kisah hi aphatchomna atamlheh vanghin agam mite dingin vang compensation themkhat amudiu tailou kinepna thei adang ahepouve. Amahon angaichat pen uhi sorkar natoh muding, dam twichu loubolna a aman theidiu, agamsung uva dam sahohin school aphupehdiu tihohi thunei vaihomhon avetsuipeh angaije. Tipaimukh dam hi agam mite iti kiphin jongleu sorkar hin adading ahitapon, hijehchun akisahtah jongleh agam mite phatchomna thei - natohna, school, damtwi loubolna a manding tihohi ninglhing setna amutheina diuva agam mitehin ngehna leh kiphinna aneiju angaije.
Tukhanga hin dam len kisathei ponte tia kiphinna neihohi alolhing lheh taove. America a khu mipi anoplouleh
sorkar hin dam len asah theilou ahi. Dam deileh deilouho abonnun dam lentah sah khangchu akichaitai tihi
akinop touve. Ahinlah, dam kisah hi kinga ponte. Kidei henlang kedeihih jongleh dam tampi kisahbe nalai ding
ahi. Adeh in, India banga khantouna lang madel gam hohin dam-len angai chaove. Phat chomcha phatchomna
ding deichatna a dam-len akisahleh aphat loudanhi muthei tampi aummin, dam sadinga kigong thunei vaihom hohin kihilna a aneidiu deisah aum lheh e.
