India in chamlhat ahinmu chun Sardar Vallabh Bhai Patel chu Union Home Minister masapen in ahungpangtai. Hichun ama lamkaina noijah Chamlhat jouva athahbeha central government a Top Ranking Officer ho appoint bolna ding ah thepna-hetna sangtah tah nei miho ngaichat ahung hitai. Hijeh chun All India competitive examination khat post-independent a athahbeh in ahung umdohtai. Independent masang a pat'a civil servant a anapangsa ho chun, India gam "welfare state" khat ahung hia, industry tamtah nationalize ahung kibol jeh in hatah in atohdiu ahung kibetan, hijeh chun civil service a dia mi lhenbe ahung ngaitai.
Kum phabep jouvin akiboldan/system phabep ahung kikheldoh toh kilhon in, hiche examination chu Civil
Services Examination ahung kiti doh in, hichu Union Public Service Commission (UPSC) kiti "independent and autonomous bodyí khat in conduct abol ahin, chuleh hiche commission hi central government noija aumvang in, political influence kiti umtheilou ahi. Hiche exam hi abailam pen in IAS Examination tinjong
iheuve. Tuhin hiche hi India gam'a competitive examination sangpen le thupipen ahunghitai.
Civil Service ahung umdohna hi Social Scientist minthang Max Weber jeh ahi tithei ahi. Aman "on the basis of merití a bureaucrat ho recruit bolna ding in recommend anabol masapen in ahi. Hiti chun tuhin vannoija democratic country atamjo in hiche civil services examinantion hi gamsunga tohmun sanghoa pang ding mi lhenchilna in ahin mang un, tuhin hiche hi universal practice tithei ahitai.
India gama civil services examination hi Central Government het pehna noija UPSC in control abol ahin, hiche hi category ni/2 in akihom khen in ahi. Category masapa hi Indian Administrative Service (IAS) leh Indian Police Service (IPS) hi ahin, hiche teni hi All-India Services tinakihei. Second Category a pang ho chu Central Services akitin, hi ho chu - (1) Indian Foreign Service (2) Indian Post and Telegraph Accounts and Finance Service (3) Indian Audit and Accounts Service (4) Indian Revenue Service (Customs and Central Excise) (5) Indian Defence Accounts Service (6) Indian Revenue Service (Income Tax) (7) Indian Ordnance Factory Service (8) Indian Postal Service (9) Indian Civil Accounts Service (10) Indian Railway Traffic Service (11) Indian Railway Accounts Service (12) Indian Railway Personnel Service (13) Assistant Security Officer (in railway protection force) (14) Indian Defence Estate Service (15) Indian Trade Service (16) Indian Corporate Law Service tiho hi ahije. Hiche chunga kipe Central Service jouse hi government of India noija Class I Service ho chu ahiuve. Hiche ho noija hin Class II Service kiti selection list a low ranking ho aum kit in, hiche ho chu atamjo Union Territory ho a government natong dia kilhengdohji ahi.
All-India Services and Central Services (Class I & II) ho a vacancy umdan hi kum seh in akibangpoi. Tukum tichu 2010 a number of vacancy declare kibol jat chu post 965 ahi. Ahin hichea hin Schedule Caste/SC, Schedule Tribe/ST, Other Backward Classes/OBC leh tibukimlou (physically handicapped) ho din reservation aumin ahi. Hiche Civil Services Examination a hi any recognize university noija graduate jouse pangthei ahi. Hinlah candidate khat chu akibol kum a 1st August a chu alhompen a kum 21 lhing hiding chule atampen a kum 30 a upa hiding ti ahi. Upper age limit hi SC/ST ho din kum 5 relax (35) ahin, chule OBC candidate ho dia kum 3 relax (33) ahije. General candidate ho hin hiche permissible age sunga hi li vei (four times) bou exam abolthei ju ahin, OBC hon sagi vei (seven times) abolthei diu chule SC/ST hon vang candidate chu kum 21 le kum 35 kikah ahipou leh abolnom jat chan aboltheiju ahi.
Hiche civil service a hin Indian Administrative Service (IAS) hi athupipen ahin, hiche exam. kibolna a alolhing asangpen pen ho chu hiche title/qualification hi kipeji ahi. IAS ho hi angaina in atohmun u amasapen in Sub-Divisional Officer ahilou leh Additional District Magistrate in ahungpang jiuve. Aban in District Magistrate, Joint Secretary, Additional Departmental Secretary, Departmental Secretary, Principal Departmental Secretary, Divisional/District Commissioner, etc. tiho hin ahungpangjiuve. Amaho laha avangpha jep ho chu State Government a Chief Secretary ahilou leh Union Government a Cabinet Secretary channa hungpang jong aumjiuve. Cabinet Secretary hi Indian Bureaucracy a panmun sangpen ahitai.
Senior IAS officer khat chu power, prestige, status sangtah le facility tamtah achanban in, salary jong hi allowance chom chom ho pum in, Lha khat in Rs. 1 lakh valjel asangtai. Chuban in, Central Government in sponsored abolna noijah ama deilhen professional course ni/2 tabang gamchom a um university or educational institution minthang khat a agajilna ding chance jong akipe kit in ahi. United Nations or UN Agency khat a deputation a jong chethei ahi. Chuleh IAS officer khat chun political backing aneithei leh retired ahijouva state governor a kipansah jong aumjie; (Kukite laha IAS ana sundoh masapen chu Pu Kaikhokam Kipgen anahin, kum 1965 a chu anamu ahitai).
Indian Police Service (IPS) kiti jong hi IAS tabanga All-India Service khat ahije. Tichu IAS le IPS ho hi
India sunga ama deilhen state khat a na atoh ding tichu state cadre hiding ahilou leh New Delhi a central government noija na atoh ding tina ahi. IPS officer khat chun ama career a stage khat ahinphah teng Union Government noija direct a na atohna phat jong ahung umjie. IPS officer khat chun training ahinchai teng ama professional life masapen chu Additional Superintendent of Police (of a District) ahung hijie. Promotion ahinmu teng Commissioner of Police (of a metro city) ahilou leh Director General of Police (of a state) tiho in ahungpang jie. Senior IPS officer khat chu salary le facility amuho hi IAS hoa toh akikhe behsehpoi. IAS ho tabang in IPS ho jong hin gamchoma professional course agaboltheina ding chance aneijin ahi; (Kukite laha IPS ana sundoh masapen chu Pu Thangkhochon Misao chu ahin, 1965 kum in anamu in ahi).
Indian Foreign Service (IFS) hi IAS le IPS tabang in All-India Service akiti pon, Central Service laha athupipen loi in vang akisim in ahi. IFS khat hi power le prestige a IAS sanga nemjo tithei ahibehseh-poi.
Kum somthum tabang masang chun IAS anamuho atamjo in IFS (Foreign) joh hi ana kilhen jiuve. Ajehchu
hiche hi glamour tah panmun ahin, vannoija gam chom chom a chelena ding chance hoitah jong ahi. IFS ho hin
atamjo in gamchom a Indian embassy ho ah na atong jiuve. Vetsahna in, Pi Nengcha Lhouvum chun kum 1979 chun IAS le IFS (Foreign) adei joh joh akilhen theina ding chance ananei jin, hia chun aman IFS (Foreign) joh akilhen in ahi. Ama chu Lebanon gam ah Indian Ambassador in jong aga pang in ahi. India sunga um IFS ho hi Ministry of External/Foreign Affairs noijah panmun sang lang ho ah apang jiuve. Indian Foreign Service/IFS ho dia phatah kit khat chu political backing aneihoi leh amaho hi abang retired ahi masang, abangho chu retired ahijou teng gamchom a Indian Ambassador ho in jong central government in asol jiuve. IFS hi Indian Forest Service kiti jong aum in, IFS (Forest) hi atum beha UPSC ma ma in conduct abolla, examination achom'a kibol ahin, tua iseiju hi IFS (Foreign) joh hi ahije; (Kukite laha IFS (Foreign) ana sundoh masapen chu Pu Sehkholen Kipgen IFS leh Pu Kaikhogin Vaiphei IFS (1968) ahiuve).
Power le salary a hin All-India Services leh Central Services hi akibahlouna aum behsehpon, amasa hohin aman akideilhen state khat a a career lhung keija na atohding ahilou leh Delhi a central government na atoh ding ahin, anukhah ho hin vang central government controlna noija direct a na atoh uva state chom chom a transfer a chele jing ahiuve. Ahin, IAS le IPS tabang in Central Service hon jong ama concern department a chu khonung leh panmun sangpen chan ahintoh theina diu chance aneijun ahi. Vetsahna in, Indian Audit and Accounts Service khat chu state khat a Auditor and Accountant General a hungpang a abanna Comptroller and Auditor General of India panmun chan ahinlo theina ding chance aneijin ahi.
Hitobanga chu Indian Revenue Service (Income Tax) khat chu Income Tax Commissioner khat a hungpang jia abang ho chu Director of Income Tax a jong hung pang jiu ahi. Hitia chu Indian Postal ServiceRailway Traffic Service khat chu Post Master General (of a circle) chule Chief Post Master General a jong hungpang thei ahi. Chubanna, , Railway Accounts Service chuleh Railway Personnel Service ho chu achaina leh Chief Commercial Manager ahilouleh Chief Traffic Manager (of a railway division) hoa jong hungpang jiu ahi. Amaho laha abangho chu Railway Board a member or Chairman channa jong hung pang jiu ahi. Indian Information Service khat chu promotion ijat vei ham ahinmujou teng "Director of a regional centre of Doordarshan or All India Radio" a jong hung pang theiju ahi. Amaho chu abang Director General of Prasar Bharati channa hung pangjou jong aumjiuve. Amaho hin gamchom a Indian embassy dunga position hoitahtah a panna thei chance jong aneijiuve.
Civil Services Examination hi part ni/2 in akihom in, - Preliminary le Main ahi. Preliminary Examination hi kum sunga May lha sunga 2nd Sunday, 3rd Sunday ahilouleh 4th Sunday leh akiboljin ahi. Main Examination hi Hapta/Kaal khat val kibolji ahin, atamjo in October last week leh akiboljin ahi. Prelim. Exam. hi qualifying exam bou ahin, hichea hung lolhingho bou chun Main Exam. abol theiju ahi. Hetding khat chu, Prelim a mark kimu ho hi final result a mark ho toh akisimtha poi. Prelim a thudoh ho hi objective type ahin, Main a hi essay-type ahi. Kum khat in alhangpi in, simlai mi sang jani (two lakh) tabang in prelim exam aboljiuve. Hiche Prelim exam bol ho laha hin chuche kum a civil services a vacancy um jat som/10 (ten times) tabang chu Main exam pe thei din aki-lhengdoh jin ahi. Main exam a hin hiche kumía civil services a vacancy um jat achan ni/2 (two times) tabang akilhengdoh kit in Interview a pang din akikoujin ahi. Interview hi March-April tivel leh akiboljin, a result hi chuche kum a dia Prelim kibol masang tichu May first week sung in akiphongdohjin ahi.
Main Examination a hi koi tabang in English a abolnom louleh Indian Constitution a recognize kibol regional language 18 ho laha khatpenpen paova tichu hiche ho laha aman ahetpen Paova chu abol jeng thei ahin, chule interview jong hiche pao mama a chu abolthei ahi. Meilhei khat chun Sappao atheplou leh Manipuri paova abol jeng thei ahin, hitabanga chu Bengali khat jong chun Sappaova bolding angapchat lou leh Bengali paova abolthei jeng ahi.
THUKHUM KHANA: Hiche IAS Examination hi mi tamtah in "ahahsa behsehe" tin complaint abol un ahi. Hinlah kum seh in mi aja aja apachang jing un ahi. Hiche in avetsah chu "survival of the fittest" tina ahitai.
Kukite laha hin masang chun Pathen lungset in IAS hinmu ana umjing thouvin, tulaijin vang IAS imulouna
u hi asot thimtai. Hiche hi competition asan cheh cheh jeh jong hinantin, hinlah ajeh pipen hi akivetleh eiho laha
educational quality lhahsam jeh ahunghitai. Kukite chenna munho laha Ccpur gamkai tailou adangse hi lhangphong taha exam laileh unfair means kimang jeng, copy bollou ho chu afellou/apillou tabang in igeltauvin ahi. Adeh in Sadar Hills gamkaija iumchan u hi gangtaha iki-ngahdohlou u leh eiho laha thepnachihna hi nasataha hung lhasam ding ahi. Tun jong Eiho khopiho Kangpokpi (Kangguipi), Motbung, Keithelmanbi, Saparmaina, Saikul, etc. ho hi akivet leh tua pat kum phabep jou leh lekha them sangtah hunghi thei dinga kineppi thei mi aumbehseh tapoi tithei ahitai. Hijeh chun lhangphong taha exam laileh copy ibol uva, Meilhei hon "chetnabi" atiu tabanga inei khah u hi vangset umtah ahitai. Ajehchu copy akibol thei tahjeha chu lekha hasim khoh ngaitalou ahijeha hetna imacha neilouho jong chu copy bol athep pou leh sangtaha pass jeng thei tina ahitai. Exam a lolhin ding hi lekha hasim a sima lolhin ding tina ahin, ihetlou leh fail ding hijeng ahi. Helou sasa a pass hina dinga copy bol jeng chu chonset ahilou leh itabang ho chu chonset hiding hitam? Hou lamkaiho jeng in jong achaten unfair means aman u chu alolhin ding pou leh khohsahlou hella aum jeng u hi datmo umtah ahi. Ipi bol ding hijong leh pass hi pou pou ding, chule service jong chu sutdoh hilouva chohdoh tho ding tiho ihachepi laiseuva gamsung khantouna tahtah umtheilou ding ahi. Amasa in hiti tajong leu hen tu hin jachat jong aumtan, ingah phat mong mong u ahitai. Hiche hi hitia hi achesot leh gamsung/namsung ahintoh khah tei ding ahi tihi Student organisation hon jong phatea agel uva, hitabang thildihlou kibol ho akimumo sah u hi angahloi diuvin aphai. Koubru/Koupulu moulla ikal uva itao tao vang un Pathen in itaonau eisanpeh pouve ti tunia inam sunguva thilsoh hoa konna hetdoh thei ahitai. Hitobanga kitahlou leh election le examination ho dihlou taha kibol jingna society chu Pathen in iti phatthei aboh ding ham? Iti danna chu Houlamkaiho, Simlai Lamkaiho, Thingnoimi lamkaiho, Politicianho chule kachinge-kathemme tia kigel'a Intellectual tahdanna umho hin hitabang thildihlou common taha practice kibol ho hi suhdih ding gellouva imoh vet jengu ahidem? Kuki Nampi Taona (KNT) hon kum seha abol jingu Koubru moulla taona amanjiu khu "Pathen in eisan pehpouve" tileng mi alunghang um maithei ahi. Ahivangin dihtah in kisei leh Pathen in itaonau asangpoi kiti leh kiseival din kagelpoi. Ilah uva thilsoh hohi akivet leh Pathen in itaonau asan leh ihiti diu ham? Nam sunga thildihlou hijat imoh vet uva itao tao jengu chu Pathen in iti eisan peh diu ham? Hijeh chun ahithei leh eiho laha adeha Examination le Election iboldan u kheltaute tihi Central Civil Services Examination ho thu kaseina a kona pohnatna jeha kahin kaimat khah ahin, seikhel-seival ki-ngaidam u hite.
