Genthei leh dammo pum puma ahahsat naohi athoh khomjeh un thaje khomdan leh kingailu tah a hin anopdan chuleh alhasam kahipoi tihi amudoh taove. Amahohin leiset chunga chemical corporation lenpen chuleh akivop piho - US, India leh Madhya Pradesh sorkar kom ah kachan diuva lomchu eipeuvin tin changmel in akidinte piuve. Mivaicha pen'in mihaosa pen akidoupi ahi. Bhopal a ahingdoh ho tampihin nikhat'a bu khatvei nehding bou aneijou uvin, alangkhat ah Dow Chem. Company hin mihem phatchomna ding ngailu kahiuve tia advertisement bolna dingin $300 million asumang jou uve.
Bhopal mite hin apanpi diuva state sorkar abel uleh sorkar inlah anuse taovin, politician ho akihet mosah un, office a saplen honlah sum pehguh ding aneiloujeh uhin adon nom pouvin ei kibolnahi adihpoi tia aseiteng
uleh police hon avohthip thoji taove. Akithopidiu koimacha amulou phat uhin, dong manía amaholeh amaho akithokhom uleh boltheina tampi nei ahi dan'u akimudoh taove. Medical clinic ahongun mi 35,000 jenhi manbeija ajen uchun atoh hoinao kipapina in international award amu uve. Gas ajahjou chun Union Carbide hin adamoho kithopina ima anapepoi.
Chapang amel kihetheilou khopmin apeng pantan, nupi naovop hochun kachahi ahung penteng gas jeh a kisuhmona aneidem, eivetpeh unlang apengsol ding ahileh eilahdoh peh taovin tia sorkar lou-in adel uleh,
police hon anojam thouvin ahi. Ahingdoh hohin koima kithopi louva thil tampi akibol vangun angaichat'u athupipen hohi court in phalna apeh angaije. Factory komlah velía leiset leh twi poison kisohsa ho chenna
thei dinga suhthengna dinghin politician holeh court in pan alah angaije. Court a alung natnao lhutpeh dia
ukil thalahna dinglah sum aneipouve.
May 2004, chun Supreme Court in gas ajaljeh a guha leh twi-long ho thinathei poison alut tahjeh hin Madhya
Pradesh sorkar in donding twi theng apehding ahi tin thupeh aneije. Kumkhat geija ima aumlou phatnin nupihon adamlou achateu chu apuijun saplenho koma ibolla Supreme Court thupeh chu najuilou uham tia
gadohdi atiuleh police hon ajepcheh taove. Kumkhatma achebe kittan Bhopal mihohin donding twi theng
aneideh pouve. Alang khatnah Chief Minister pahin khopi sung semhoina dingin dangka 800 crore amangchan, "gas relief" minister pachun a pennikho lopnan saipi, sangongsao leh sakol amangchan, thu kijadung juiyin anung juihon pahcha a opeh uchu feet 21 asaove akitin ahi. 2008 kum geija Supreme Court thupeh akijuilou phatchun tehse leh adamlouho jaonan Bhopal mihon mile 500 kenglam jotnin Prime Minister pa kithopina thum dingin Delhi ahinjon taove. Lhanijen amutheilou phatnun nupihon achateu akipoh un Prime Minister in changei akigol taove. Aman uva pang numei police hochu alhisoh uve akitin ahi.
Bhopal a methyl isocyanate gas, thinathei hui phalou ajah a mi sang somni thinahi kum 25 alhin jouhin Madhya Pradesh a court khat hin mi sagi chungah thutana ahin nei bepmin ahi. Hijongleh Bhopal mite din thudih alhungtai tithei ahinai saipoi. Union Carbide India Ltd. a lamkai lencheh mi 7 hi kumni jail a umdingin court nin themmo achannin, ahin gangtah in bail akibol taove. Bhopal miten thudih amujoulou naohi centre leh state sorkar hin apanpi loujeh ahi. Mi 7 themmo chansahna dinga dan kimanghi akhoupon, apochil pouve tia kithemmo sahbep ahiuvin, gucha mai-mai hotoh kibang chetna kumni a dingabou gotna kipe ahiuve.
Athu umdan mipin ahet theilou chu ahileh 1984 kum'a Union Carbide a alenpenpa W. Anderson hi India gamía konin akijam dohsah in, court in akoujongleh ahungpon akiselmang keitai. India sorkar jonghin matna athu tanding tihi adonsepoi. Amahin, sumlut lhomna thei dinga safety mechanism hi asuhnem jeh a gas chu jahkha a ahi. Mi chujat thina leh dam mona hi galguh bolhon chemical weapon khopi sunga apokehsah utoh akikhetna aumtapoi. Hijehchun, India hin phat agei nungsang hijongleh mithi holeh agenthei hohi lainat pina aneija America koma W. Anderson chun India gamía athu tandingin eipedoh un tia nasatah a angeh ngaija ahi.
Thu kija dannin sorkar hin gas a thiho insung mite kithopina hi mikhatna dangka 12,000 bou pehding agon ahi. Thunei vaihomho leh mihaosa hohin Bhopal mite toset nahi donnin neihih jongleu, adangsen vang akiboldan uhi thudih aumpon chuleh universal human rights tojong akikalle ti vanghi inop sohkeidiu tahsan aumme.
