Imphal, Lhajing 3: State sorkar in Central sorkar adoh jouva Autonomous District Council chung thu a round table kikhopna akou chu CM conference Hall muna Leisemni chun Chief Minister O. Ibobi Singh chairman hina in anakibol tai. Chief Secretary, DS Poonia in thuphon aneijin kikhopnahi lunglutna neijousen tumasanga thinglhang district 6 ma Council election anakibolna chunga deilouna neijouse adeh a UNC leh ANSAM hohin kichatle gin neilou hel'a alungel'u aseina theidiu chuleh santhei tah a kinopto nakhatchu apom na diuva kibol ahi ati.

State Council of Ministers, MPCC President, Hill Areas Committee a Chairman leh Vice Chairman, civil society kiloi khomna a thalhengho, NGO ho, Advocate General, State leh Centre sorkar a kon'a saplenho round table kihouna a jaodingin kouna lekha akipen ahi. Ahinlah, UNC leh ANSAM hin kouna lekha jeng jongchu banjetnin asangnom honpoi.

Tangkhul Nagalong hojong ahungjao nompouve. Principle Secretary (Hills) pahin Manipur (Hills Areas)District Council Act, 1971 chuleh 1975, 2006 leh 2008 kum'a amend kibolho dantoh aki kallou danchu kichehtah in aseijin, District Councils ho chunga thaneina kipe hohi aseijin chuleh state sorkar jonghin Council hi thaneina apebe kigo e tin aseije. Lhaphul-Lhadou 2010 a kumsomni jouva district gupho a election lolhingtah a akibol jongchu aseije. Joint Secretary, state Home Department pahin UNC hon ngehna anei uleh state sorkar in adonbutna a tuchan geija anatohna ho aseije.

Hrusikesh Panda, Additional Secretary, Ministry of Panchayati Raj, Dr. MC Mehanathan, Director (NE), Ministry of Home Affairs leh Surender Kumar, Ministry of DoNER, GOI a Director hohin phatchompi theitah thuhilna anei uve. Dr. Ksh Bimola Devi, professor, MU, prof. C. Amuba, Vice Chancellor, MU chuleh K. Daimai, Joint Director, Tribal Research Institute, Imphal chuleh adangjong lunglut tah in kihoulimna a chun ajao uve. HAC a Chairman leh Vice Chairman, MPCC president hin kihoulimna a chun thil phachom tamtah aseidoh uve, tin Chief Secretary thuphon chun aseije.

Thuphon kimu dungjuiyin akikhom hochun UNC, ANSAM leh TNL ho kihouna a ahungjaolou uchu phamo asaove chuleh UNC leh ANSAM hon avella Lhajing nisim 4 ni a pat ni 20 dinga economic blockade abolkit uhi phamo asaove atin ahi.

Akikhom hohin blockade akiboljing jeh hin milham adeh a nikhotha a kivah ho agenthei lheh uvin, tuphat tah a blockade kibol kit hin nitin ngaichat ho nasatah a asuh khah a state sunga mipite hahsatna hi asuhsang beding ahi, tin aseije.

Thuphon kibol hin akikhom hon kilungtoh tah a akinopto naochu Bandh leh Blockade adeh a National Highway a kibol hin boina imacha sulhamjou ponte ajehchu hichi hin nam jouse chungah hahsatna alhut in ahi. Akikhomho jonghin kitohtah a UNC kom'a economic blockade alahdohna diuva tep dingin akinopto uvin chuleh UNC, ANSAM leh TNL chuleh adang hohin kihouna a ahungjao uva alunglhai lounao aphondoh diuvin angeh un ahi.