Abraham Lincoln hi migunchu leh mi kitah ahi in aneolai apat na genthei tah a hinkho ana mangpet khat chu ahi in ahi. United States a President dang dangho sang'in amahi agenthei pen in akihe-e. Abraham Lincoln te hi ucha mi 3 ahiuvin, amahi amilai ahin achunga Sarah aum in chuleh anoiya anao Thomas ahin, vangset umtah in achapan laiyin ana thitan ahi. Anu le apa min, Nancy leh Thomas Lincoln ahi.
Abraham Lincoln hi Bulte nisim 12, 1809 kum in Hodgenville, Kentucky, U.S. ah anapeng in chuleh Lhatun nisim 15, 1865 kum in Washington, DC mun ah anathi in ahi. Anu le apa hi anigel lhon'a Virginia gam akon ahilhon in ahi. Lincoln hi lekha them ahipon ahin ama kham chakhat in asim theiyin, jih jong akijih theiyin ahi.
Amahin apa natoh nahoa akithopiji in kolbu leh mai (pumpkin) lei anabol in ahi. Amaho hi gam khat leh gam khat kikah a cheng ahijeh uvin a In vel hoa gamsa jong aum in ahi. Amaho ding in che le vale chu ahahsa in ahi, ajeh chu polang'a apot teng vompi ahilou leh gamsa dang dang jong atoh jing un ahi. Genthei tah leh hahsatah a apa in farm lei abol hochu ama alunglut behset pon hijeh chun long (boat) tol in sum anakiloji in ahi. Amahi bible sim athanom'in chuleh bible sunga umho jong ahethem thei in ahi. Hiti hin ama le ama sumkolvei in anapang in agunchu naho jeh in 1861 apat 1865 kum in United States a dingíin 16th president din lhendoh ahitai.
Lincoln politics lama ahunglut chun hiche pet a US president chu Andrew Jackson ahi-e. Ama president ahi masangíin America gamía Cvil War (slave - soh umding leh um lou ding thua kiboina) ana um in ahi. Ama president ahung kaidoh chun America gama soh ho achamlhat sah in ahi.
America gam'a Civil War um masang chun Lincoln in soh (slave) ho kibol naho chu ave jou pon hijeh chun iti leh amaho hi kichamlhat sah ding ham tin alung ah agel jing in ahi. Hijeh chun ama hin thagum pan'a galjo ding hi atahsan khat chu ahi. Confederate hon Fort Sumter anokhum uva kipedoh ding ati pet chun Lincoln in mi 75,000 volunteers ho akou khom in ahi. Chu in states 4 ho chun Confederacy ajop un adang states 4 hochu Union ah aumdan uvin ahi. Hiche akon hin Civil War
ahung kipan tai.
Kentucky frontiersman (gamgi a cheng mi) mi, Lincoln in hinna ding leh kihil nadingíin pan ahinlapan tan ahi. Lha 5 tobang President party's nomination amu masang'in Lincoln in ahinkho thusim ho
anaseiyin ahi.
Lincoln in farm a na anatoh laichun kihilna tamtah ana neiyin ahi. Black Hawk War umlai chun Lincoln chu captain anahi in, Illinois a kum 8 legislature na atong in chuleh kum tamtah courts ah na ana tong'in ahi. Court a na atoh laichun aloi hon ìLincoln tup hohi engine neocha kicholtih neilou tobang ahi' ati.
Abraham Lincoln in Mary Todd ana kichengpi in chapa 4 aneiyin hinlah vangset umtah in mi 1 bou agollhang man in ahi. 1858 kum in Lincoln in Stephen A. Douglas chu Senator ding in ana kitetpi in ahi. Ama in election achun gollel na aneiyin hinlah Douglas toh akinel lhon chun mipi akon minphatna amu in 1860 kum in Republican candidate akon in President ana kaiyin ahi.
President ahi akon'in Republican Party chu agamsung uva tahsan umpen ahisah in ahi. Hiche chung chonna ama in northern Democrats chu Union ah akailut in ahi. Tolbol nisim 1, 1863 chun Lincoln in Emancipation Proclamation kiti soh ho (slaves) chu Confederacy akon in a-itih a dingíin achamlhat sah tan ahi.
Lincoln in America gama Civil War asuhthip chu vannoi hetjing in aum tan ahi. Ama in Gettysburg mun'a military cemetery achun 'hiche lhankhuh a mithi hohi mohseh a thi ahipouvin igam uhi Pathe n khut noiya chamlhat ihi tauvin hijeh chun government hi mipi a ahin, mipi in mipi ho phatna dia abol ahin leiset akonna mang lou ding ahitai' ati.
1864 election achun Lincoln in goljona aneikit in Civil War kichai to lhonn'in Union military gal jona ahitai. President hina jal'in, zalen tah a um nadin lhanglam gamkai ho kom ah hem le thal koidoh a kipunkhom din temna aneiyin ahi.
America in lungmong tah leh chamlhat tah hinkho aman laitah uvin a kumkit in Lincoln chu mi khat in
anathat tan ahi. Lhatun nisim 14, 1865 Good Friday nikho in Lincoln chu Ford's Theatre, Washington mun ah actor John Wilkes Booth kiti pa hin ana that tai. Ama anathi ta jong leh athilbol phat naho jeh leh akitah na jeh in tuchan geiyin Abraham Lincoln thusim hi lekha hoa akisim jing in ahi.
