umkha em? Mi atamjohin phat chemang danhi alungimpi pouve. Amahohin phat chemang dinghi adei pouve. Ikum atam channin phatjong achen, mi tampin phat chemang dinghi akideipon, chuleh mi tampihin khonung thilsoh dingjong akihet nompoi. Iphat houhi chingtheitah in mangleuhen khonunga thilsoh ding jonghi ngampella ikimaitopi ngapchatdiu tahsan aumme. Idei hihenlang ideilou hijongleh phathi chemang jingding ahi. Summin thil akicho theijin, ahilouleh thilchu sumtoh akilhet theije. Ahinlah sumleh thilhi phat toh akilhet theipoi.
Mijouse hin inle car hoitah chule neile gou tamtah aneipoi, ahin mijouse hin phat aneisoh keije. Phat inei sunhi
iman dungjuija lolhinna leh losapna imuding ahi. Inchen ding lung nagella, lolhingtah a sumkolvei ding nagella,
ahilouleh nalungtup chu namu gotleh phat hi naloi hoipen chu ahi. Nalung sunga inchen ding, sumkol veiding leh
lungtup molso ding tia nagel chu midang asang ajanjong agel ahi, amabouchu loikhatchun phat chingtheitah in amangin adang hochun alunga agel bouchu ahin phatvang kinomsahtah inbou amang uve. Iseinom pentah uchu ahileh phathi achemang jinge, phat ong nahaoleh midang sanga thilpa chom habolding gon. Phat igelkhohlou naohi sumbanga muthei leh thamthei ahipon, punga phat chedan imumai maikhun ilungthim achohthou theipoi. Mi tampihin phatche danhi nahsah louvin koi jongleh, phat kitihi eiho dinga thil mantampen ahibouve. Phat hi sum sanga thaneijo ahi. Nikhat na itohleh dangka 200 akimui tileuhen, dangka 200 hin nikhat chu akinung lesah theipoi.
Nalung mitnin bank khat gah umsah inlang, jingkah sehleh dangka 86,400 na account na kikoi jingding, amavang jing geija kipo galkai theilou ding, nilhah ahiteng namanmoh sechu bank neiten akilahdiu ahitai. Ipi nabol dem? Anisehleh, ibonnuva sum umjouse chu thengsetna ilahdoh jingdiu ahi. Ibonnu vahin hitobang bank chu inei sohkei uve. Hichi bank minchu PHAT ahi. Jingkah sehleh na accountíh 86,400 seconds nakoipehjin,
ajan sehleh thil phachom bolna a namanlou phat jouse chu anoimang jitai. Ajehchu, jing nikho a napoh galkai
ding akiphalpoi chuleh nanei sanga tamjo jong naladoh theipoi. Jingkah sehleh nang dinga account thah kihonga jan ahitengleh namanmoh hochu kihalvamji a ahitai.
Tunia nachanding kikoipeh chu namandoh louleh agenthei dingchu nangbou nahi. Nung chethei ahipoi, jinga
nachan dingchu tunin ladohthei pon nate. Tunia dinga nakikoipeh bouchu namanchah thei ahijeh hin abonnin
ladoh inlang nadam theina ding, nakipana ding chuleh nalolhinna dingin mangtan. Phat hi akitol jingin, nitinnin chingtheitah in kimangchan.Kumkhat mantamdan nahet nomleh exam fail ho dongin, lhakhat mantamdan nahet nomleh nupi alha lhinglouva nao neiho dongin, hapta khat mantamdan nahet nomleh haptaseh a kiso newspaper editor pa dongin, pungkhat mantamdan nahet nomleh nungah gollhang adongmaho kimupi dinga ngah hokhu dongin, minute khat mantamdan nahet nomleh train laplelpa dongin, second khat mantamdan nahet nomleh accident tohkhelpa dongin. Phat nanei jousehi gou manlutah bangin gellin! Ajehchu, nangailut na insung mite, najileh nacha ten naphatchu namankhompi nom ahi.
Phat hin koima angahpoi tijonghi geldoh than. Janhi chu thusim tobanga bou kisei ahitai, jing nikho jong hetthei
ahipoi, tuni bouhi ahi thilpeh manlutah chu. Ibonchao vahin gahkhungaiju hitin kingaitou hite, phat achemang jing danhi geldoh kitnu hite. Ipenlhah uva ihai kipatnuva achepan phatchu nikhatleh akingah phat hung umding ahi. Phat hin mipha, mise kikah a dangdatna aneipon, aphat ahunglhun teng lahmang dingahi angajing ahi. Ihinkho a ithil bolhohi inung vetleh suhkhel tampihi "chance" eikipeh jeh in suhdih kitthei ahi.
Hinkho chung changa vanghin "second chance" aumpoi. Khatvei akichaileh akithopi thei ima aumtapoi.
Phat hin alolhing leh alolhinglou agel khohpon, koihi lolhinga koihi losamma ham nahsah in aneipoi. Phat
masanga hi isuh khelnaho chunga them kichan jong panna bei ahibouve. Iti ihin uvem tibouhi thupi ahi. Ikal
sonnalam jousehi adihchet chet angaije. Phat hin sihnei-langneina aneipon, mijousehi lolhinna thei phat
apesoh keijin ahi. Thusim buhi ivetleh lolhinna neiho akimun ahi. Alolhin theinao chu aphatchet chetna aboldiuva kilom hochu abollu ahi. Mi atamjo dinghin jing jong, haptakit jong, lhakit jong chuleh kumkit jong
umnante. Ahin, apoimo chu ëchanceí eikipehi ipi bolna a inei diuham?
Phathi chemang jingding ahin, achele chemang tante itidiuha ahilouleh achemang kah a hin khonunga thilphachom khat tohdohna theidin tupettah a kaphat neihi adih lammin mang inge iti diuham ikilhendiu ahi. Tuphat tah a nathilbol dungjuija khonungleh aga naloding ahi.
