Tulai hin golseh bol hi athem dom ho din kivahna thei ahitai. Tekah in foot ball themho seiyu hite. Foot ball them ho hi athepnauva kivah thei diuvin aum tai. Aneopen in Manipur'a football them ho hi club khatin kum khat'a Rs.50,000.00 apeh uva amanchah ule hiche jat
hi sum mangthem ho din kivahna thei ahi. Ahilou jongle insung kivahna dia belap'a kivahna thei ahitai. Club len jep'a lut'a West-Bangal dunga East Bengal le Mohan Bagan dunga pang theiya them ho chun kum khat'a kivahna kham amu diu ahitai. Tekah in hitobang ho chun kum khatin Rs. 2,00,000.00 tobang mutaleu aman chatvai lou nah-ule kivahna kham mong ahitai.
Leiset'a club len ho a pang Bekham, Ronaldinho, Ronaldo(Brazil), Ronaldo (Portugal), Rooney, Henry,
Raul le adang tamtah hon kum khatía asum muuhi hinkhoa haona kham ahi. Tekah in amaho khat chun
kumkhat in US $ 10. million vel mujongle hinkho a haona kham ahitai. US. $ 10 million chu India sum'a Rs. 40,00,00,000.00. Hiche hi alakh a sim din lakh 4000 ahitai. Hiche hi India mikhat dia chu hinkho lhumía
haona khat ahitai.
Football tobanga sum tamna dang khat chu lawn tennis ahi. Tulai hin leiset'a hin Tennis Open kiti a kitetna hi
kumlhung keiyin mun chom chom'a aumjie. Hiche ho a hin champion ho le runners up ho sum mu hohi
tamtah tah ahijie. Loikhat chu US. $ 80,000,00 apat 2 million kah sung ahinomíe. Kum khat sunga mun nga
val'a champion hijong aum theiye. Hiche ho chun kum khat sunga asum mutheiyu chu US $ 3,000,000.00
hijouvinte. Chutile India suma seidin kum khat'a chu Rs. 140,000,000.00 tobang hinte. Chuti ahile athemloi
ho chu kum khat sunga jong ahinkhouva anehkham'u akimu u tiding ahitai. Golseh lam'a amimal kichepna
theiya minthang ho chu golf,badminton,table tennis, le adang dang ahi. Mimal kichep nadang dang ho jong
kivahna thei hicheh inte.
8.3. Kukite hi Sangtah a Chethei ahina dem?
Kukite hin state tum ineilou jeh un athem um jongle akiche sang thei na dem? Ajeh chu veute. Tekah in football them umjongle langkaina jeh a state a lhen kihichom lou ding ham? Manipur'a Meilhei ho ham halah nom'un tin eimiho alahda nom diu ham? Athem behseh lou ho chu chuti theinante. Athem sang mong mong aumle koiman notthap joudeh ponte. Masang jep chun sopi Kiran Khongsai jong chu Indian player'a anajao pha'e. Mary Kom jong chu ama numei chanpi lah a, ama gih kibahpi lah a thumvei jen World Champion anahi pah e. Lawn Tennis ajong athem sangtah umle ol ol'a chesang cheh cheh intin ajona le International level'a chena thei ummo ponte. Athem iumlou jeh uva kitahsan lel ahitheiye. Toumun'a kikichem Chess jong hi kitetna sangtah, lhoh vahkhangna ahitheiye. Chess a themsang mi um le International a kitetna ho geiya chesang nading lampi khah ding umdehc ponte. Atheletics a hatho jong hi Olympic le adang danga chesang thei thou
unte.
8.4. Sangtah a Chena Dia Golseh Bolding dan.
Golseh a kibol atamjo hi kichuhna beiya bolthei jong atam'e. Tekah in football hi kichuhna beiya tournament neo neo ho apang jong akitam'e. Golseh tamtah hi chutobang chu aum theiye. Kithem chuhna um mang louvin loikhatin tengkho, lenchop, kungkal, Songse, thihpeh se le adang danga hatman akisang theiye.
Ahinla sangtah a che nadingin kithem chuhna nasatah le bolding tamtah um'inte. Miloikhat thusei dih chu
vet angaiye. amoho thusei chu 'eimite hi athem tah jong football pehna a apangsot jou pouve. Ajeh chu
dum/jachep, judon, louneh jeh in achol loiji tauve, atiuve.
Hijeh chun football'a chesangna dinga ngaikhat chu hiche neh phalou dumchep, judon, louneh hohi bol louhel din aphai. Judon mi athivah in, loune mi athivah cheh in, dum chep mi ol ol'in athijie. Golseh a chesang thei ho chu hiche ho bollou, nelou ho chu hidiu ahi. Football lam'a che sangna ding chun chapang kum 10 vel ahiuva pat'a bolsah, kithem chuh sah angaiye. Chapanga kon'a kichem ho chu alung a jong lut jep'intin, chuche to kitoh chun atahsa jong chethei jep'intin hat thei jepíinte. Aneova kona English tho ho alei akipeh jep'in, athodan akilom dom'e kiti tobangin football'a jong hin aneova kon'a kithemchuh ho chu them sang thei jepíunte.
Football seh seh hilouvin lawn tennis, cricket, hockey, chess, table tennis, volley ball ho le adang jouse
jong hi chapang jepía kichep pat angaiye. Sangtah a chena dingin chapang neocha a kipatsah a chesang
sah angaiye.
Chess a hin lunglut ten angaiye. Lunglut tah a kichep theina ding chun ichapan laiya patía kichep jing angaiye.
Leiset a golseh lam'a sum kihamu na thei pen lah a lawn tennis hi akichemkha louhel kitam nalaiyinte. Hiche deh deh hi chapang neocha a pat'a kipan'a themna dia aki kicheplou le chesang hah lheh inte. Chapang neo ho dia hiche hi ahahsat jep le akilo pi kichepna dang a pat thei ahi. Lawn tennis bat khu chapang kum 12 chunglam ho hilpat ding himai theiyinte.
Hiti chun ivet le golseh lamía hi sangtah a chena dinga chu chapang jep hipetía kihil them pan ngai ding ahi.
8.5. Golseh Lam'a Khantouna dinga tohding,Bolding ho.
Golseh lam'a sangtah a chena ding hin moh nga moh vet vet hitheiponte. Thil tamtah bol ding uminte.
A. Sum tokhom ngaiya :
Nam khat hina a golseh lam'a sangtah a che nading hin sum tamtah nei angaiyin ahi. Kukite hi mivaicha
ihijeh un sum thahatía bol ding ho hi ahahsa nom'e. Hijeh chun nam pumpi thil'a lahsah a ahao dom, anei
dom jouse tokhom theina ding tohgon nei angaiye. Eimite lah a anei dom mi 3000 tobang lhendoh a
tokhom sah a Golseh bolna lam'a machalna dia tohgon nei ding ahi. Tekah khatíin Golseh Bolloi kiti chu Club
tobang khatíin kiphutdoh tale, hiche ho man ding le atoh hou jouse dinga chu tokhomsah ding ahi. Hiche a ding
chun aneidom 3000 kilhengdoh ho chun Rs.10,000.00 cheh toh leu Rs.10,000.00 X 3000 = Rs. 300,00000.00 (crore 3) tobang atodoh diu ahi. Hiche a hi golseh Bolloi chun golseh lamía machal nadia tohgon chom chom aneidiu ahitai.
banjom nalai ding....
