Lekha sim kiti hi mithase hoa ding ahinai saipoi, mipontho, migunchu chule thoh hatna nei mihon bou lekha sangtah a asim doh ahi. Themjil na lamía lekha sim simlai hon ahet diuva kadei pen chu lekha sim mai mai hilou ding, lekha them mi hitei ding ahi. Ajehchu lekha bou simho hin lekha sangtah jong asim doh theiyu ahi. Lekha simpa/simnu chu BA/MA/M.Phil/Ph.D chan jong asim doh maithei ahi. Chule apottho, agunchu chule athoh hat jeh a pachan na sangtah jong amuthei ahi. Hinla amapa/amanu chun asim doh chu thepna aneilou leh amanchah nading ahet theilou ding ahi. Lekha them ahilou jeh a chu lekha sangtah asim doh vang'a tohding bolding ahet lou ding ahi. Ajehchu lekha themho koima a-ong a-umpon ahi. Lekha kathem e tia tohding, bolding theilou va hinkho mangho chun ajou aseiju ahi. Leiset chunga hi lekha themho dingía tohding, bolding tamtah um ahi. Ong manlou a toh thei tamtah a-um in ahi. Lekha them mi hochun tohding, bolding tamtah anei jun a-ong man pouvin ahi.
Examination a pachanna sang
Simlai chapang hon examination/themvetna-a mark sangtah mutei ding natiu Ieh examination tengleh thudoh donbutna napeh teng ule na jilkung hon class a note/ answer napeh bang bang'a nadon but uleh nakigin chatna bang'a mark namu lou ding ahi. Chule tutor/guide book ho-a answer kitat doh bang bang'a jong na donbut uleh nagel bang'a mark namulou ding ahi. Ajehchu abang bang (same) a kisun hohi examiner hon ahet ahin, simlai chapang tamtah in jilkunghon apeh donbutna ahilouleh tutor/guide book hon apeh donbut na hohi ajihteng uleh mi tamtah a kibang ahi. Examiner khat in adei pen chu adonbutna kipe hohi midang'a sanga chomjep teiding, hinlah adonbutna dihchet ding ti hi ahi. Simlai chapang in alekhabu ho-a kisun aning-akah (ins and outs/details) abonna ahet teiding chule thudoh ho adonbut teng leh ama a konna donbutna apeh ding ahi. Creativity/innovation and calibrity anei ho toh kilhonna thudoh ho achom, asao ding mark dungjuia adonbut theija ahileh examiner jong kipah a, mark jong adang ho-a sanga a tampeh joh ahi. Tulaiya subject æ or 4/5 ho a letter marks muho jouse hin hitobang ability/talent anei jeh ahi. Lekha bu ho-a lesson/chapter substance le summary hoitah a ihet dohthei pouleh ipi kidong jong leh kidonbut thei jeng ahi. Chule lekhabu bou seh simding ahipon, hetna ibelap nomía mark sangjo mutei ding igotna ihileh news/magazine/journal,G.Kbook hojong hasimía sim angaijin ahi. Hetna(knowledge) kiti hi akhon na umlou (limitless) ahi.
Hetna hi thejal ding ahi
Tulaija mitamtah BA/MA/M.Phil/Ph.D. chaija tohding theilou a-um in ahi. L ekha simhi Govt. service/job ding'a bou simding ahipoi. Miching, mithem hon Govt. service adeipon ahi. Amahon athep tah jeh uvin athepnao mang chan gamle nam pi a dingin sun le jan in lung agel un, na atong uvin/ Govt. bang in amahon jong midang natoh ding, kivah nading agonpih jouvin ahi. Hitobang miho hi lekha them ahiuvin, lekhasim mai mai anahipou ve ti het angaijin ahi. Themjilna lampang'a lekha simma lunglut gunchu, thoh hat ho amoh losap ngai pon ahi. Ajehchu Pathen in mihem tehi natong ding le tohga so ding'a asem ahi. Mihem in leisetna hi atu dungjuia aga aloding tihi Bible a jong aumsa ahi. Themjilna hi kaidoh ding, koilut louding ahi. Hetna hi themjil na kon'a kimu ahin chihna hi Pathen na kon ahi. Lekha sim jouse le lekha them jouse aching amoh hithei pon ,ahi ti hetthem angaije. Chule chih na hi atheng le atheng lou a-um kit in ahi. Chihna theng nei hochu mi nunnom ahiuvin, chihna thenglou nei ho chu mivangse chungnung ahiuve.
Themjilna(education) kon'a kilamdoh hetna (knowledge) hi vuimang/selmang ding ahipon, amavang thejal /phonjal ding ahi. Ahetna le achihna midang peson thei ho chu educationist akitin, ahetna le achihna midang peson theilou, phongjal theilou hochu educationist akitithei pon ahi. Educationist holeh academician kiti hohin innovative idea ho aneija, midang phatchuom nading le khantou na ding'a itlou hel'a ahopma, manbeija athejal (spread) ahi. Ahetna le achihna adih a mang theilou ho chu miching, mithem akiti ngaipon ahi.
