bank chom chom a konna gari loan apeh hojong hi iti lam dol'a loan a lahding ham tia kihilna jong umding ahi tin thulhut akimun ahi.
RIMS doctor khat kikaimang
Imphal, Lhamul 20: Regional Institute of Medical Science (RIMS) a Post Graduate (PG) doctor khatchu Bishnupur Police hon miphalou hon nidan khat ahenjouvun agahuhdoh uve. Amahi Tripura a kon Dr. Kunal Chakraborty ahi. Officialthuso kimudung juijin amahi Leisemni nilhah lang nidan 3.30. vella aloiho chuleh junior doctor hotoh bus No. MNO1-1362 a Rural Health Training Centre, Rengkai, Churachandpur district a konna ahung kile naova anamat u ahi.
Thusoh kimudung juiyin thingnoimi mi 3 activa a hungho chun Molnom gamkai sunga akham uva RIMS a Medical Superintendent (MS) ahol uleh aumlou phatna doctor lah a senior pen ahol uva Dr.Kunal hi anapui mangu ahi. Adangse hin bus a Bishnupur police station alhunphat uva athu umchanchu asei uleh Bishnupur police ho SP, L. Jayenta lamkaina noija Dr. Kunal kikai mangna munchu adel uva akom vellah hochu operation abol uleh Molnom gamkai sungah nilhah lang 4:00 a chu agamudoh u ahi. Koi hija, ibolla akaimangu ham tihi achen achai akihe naipon ahi. Akihuhdoh doctor paleh aloihohi Bishnupur police hon RIMS in nilhah 7:00 chun agathah lutnun ahi. Thuso miho komma ahoulimna ah Dr. Kunal hin ibolla ei kaimangu ham kahepoi, kei chunga vang gihna ima einei pouve, tin aseije. RIMS a MS Dr. Y. Mohen in police hon aphatcha kal ason uva bitkeicha akikaimangpa ahin nunglhut jeh uhin achunguva kipathu aseije. Hitobanga lungeltoh louva thil kibolhin state sunga boina lentah ahin sothei ding danleh khangdong doctor ho lungsung kichatnan alodimding jeh hin akichatna Dr. Mohen hin aseiben ahi.
Janata Dal (Secular) in ngehna nei
Imphal, Lhamul 20 : Manipur State Unit a Janata Dal (Secular) in Central leh State sorkar ho kom achun NH-39 lamlen a Thingnoimi kiloikhom hoa konna gihna aumjing leh boina ho suhthip nading a toh-gon apat nading uvin ngehna anei uvin ahi. Chule TDC Manipur in NH-39 lamlen jotding aphal lou naho agelphat kit ding uva jong ngehna anei uvin ahi. Chulkitle Pu Ngamkhai Touthang, party a Senior vice-president hinkho beina chung'a alung hem nau phondohna jong anei uvin ahi.
Indian Red Cross Society hon panlah na neijing
Imphal, Lhamul 20 : Indian Red Cross Society Manipur in "Insecticide Treatment of Bed Net Program" (ITBN) tia Moidangpot Gram Panchayat, Khumbong area muna tohgon aneinau vachun thoukang len 358 ana suhtheng uvin ahi. Hiche suhthengna kinhi Khumbong Awang leikai, Mayai Leikai, Maning Leikai, leh Awang Leikai ahiuvin hiche tohgon aneinauva chun Gram Panchayat leh avel'a club hon jong pan nasatah in ala uvin ahi.
Chule thuphon aneinauva jong ahung lhungding nisim 21 (vahchanni) tengleh Moidang- pok area a Moidangpot Gram Panchayat makaina ah hitobang ITBN tohgon umna dinga hi Japanese Encephalitis leh Vector born diseases (Malaria etc) natna chung changa kiven dingdan seikhomna umding ahin milham ho jong ahungjau teina diuvin temna anei uvin ahi.
KLA-U thingnoimi 3 kimandoh
Imphal, Lhamul 20 : Tuni jingkah lam nidan 6:30 velchun Khurai Ahongei hopsunga kon'in Imphal district police commando hon KLA-U thingnoimi mi 3 aman uvin ahi. Imphal East SP thuphon dungjuiyin hiche kiman cadre 3 hohi kum 50 a upa Gurumayum Yaima alias Tayai Sharma, S/o Nimachand Sharma, Nagamapal Phongeisangbam Leikaimuna cheng, kum 22 a upa Laishram Brojen alias Nanao Meitei S/o Shatpa Meitei, Khangabok Part-II chule kum 24 a upa Khuraijam Romi alisa Nanao Singh S/o Yaiskul, Khurai Konsam Leikai, tutua Sagolband Meino Leirak muna cheng ahiuve. Amaho a konin mobile handset khat leh organisation mina kijih demand letter 2 akimandoh tha-e tinjong aseibe in ahi.
UTRTI kiti kiloi khomna kiphutdohta
Imphal, Lhamul 20: Thudih aumtheina ding, mijousen chanvou kibang aneithei nading, na kitongho akiselguh umlouva mi jouse hetthei ahithei nading, na hoitah a akitoh nadingin Right to Information Act (RTI), 2005 mangchan Manipur sungah kiloikhomna thah Union for Transparency and RTI (UTRTI), Manipur tia kiminvo chu akiphutdoh tai.
UTRTI hon asei naovah tribal nam chom chom hotoh MBC Hotel, Imphal a Lhamul nisim 15 nia kimutona akinei jouva tribal thalheng hungho hin kithutoh tah a UTRTI hi kiphutdoh ahi. UTRTI thaneina hin Manipur pumpi alosoh ding ahi. Lamkai hochu TK. Haokip-President, Khawangshing-vice president, PD Pou general secretary, David Kamei-joint secretary, R. Peter information and publicity secretary, Ignetius Rosalina- treasurer, S. Ramhaoleng leh Titus Kamei hi working co-ordinator ahi lhone.
Kiloi khomna akiphuna jeh penhi akhangtou loulai tribal mitehi khantouna toh kisaija a rights u ipiham, sorkar vaihomna a hi amaho mopohna, khantouna dinga amopohnao chuleh khantou- na dinga na kitong hohi iti aphatchom pi diuham tiho hildinghi ahipen ne.
Primary Jilkung result thu-a lunglhai louna lekha kiseplut
Imphal, Lhamul 20: Leisemni chun Association for the All Manipur D.P.C. Faced Candidates for Primary Teachers 2006 hon Chief Minister kom chun alunglhai lounau lekha aseplutnun ahi. Kiloikhomna hon lunglhai louna lekha achun primary jilkung ho result phat sottah Ollha, 2006 kumma pat hung kingah a Lhadou, 2010 a newspaper a hungkiso chungthu a alunglhai lounao asun uve. Thanei vaihomho phatsahna beija jilkung alolhingho min newspaper ahung kisochu sorkar dantoh kitohlou chuleh Primary Jilkung ho kilhenna dinga RR toh kitohlou ahi.
Kiloikhomna hin sorkar komma iti danna Director of Education (S) hin Primary Jilkung lolhingho minchu newspaper a asothei ham tin dohna anei uvin, Director pahi Secrecy Act noija talen matsah thei ahi, tin asei uvin chuleh Primary Jilkung result thu a thunoh baotamhi sorkar hin aganna thei channa alhaplhah na dingin angeh un ahi.
Manipur bandh jeh’a boina tampi lhung
Imphal, Lhamul 20: Leisemni chun thilman hahjeh leh thil akimu joulou jeh a Manipur Peoples' Party (MPP) hon nidan 15 Manipur bandh akoujeh un nitin kimanchah na aboilheh in ahi. Bandh hi Sempatni jankimma pat Leisemni nidan 3:00 c.n. gei chelhaa ahi. Bandh jeh hin district chom chomma chematna gari abeitan hijeh chun mi tampi kholjin kigo hochu achethei tapouve. Leisemni chu Kanglen (Purnajatra) jeh a state suti nijong ahi.
Imphal khopi chu dukan neiholeh sumkol veihon bandh leh Kanglen jeh a adukannu akhajeh un khopigem kivahlut abang jenge. Mun danga konna meding ahunglut theiloujeh in phai sunga me kijohna jong themkhat bou akihonge. Thei leh anche-louhing 80% hi district danga konna kipolut ahijeh in Hindu hou juiho chun theileh anche-louhing holnan agimlheh uve.
Hetding khatchu, CrPC 144 dan palkeh a MPP natonghon nitin ngaichat thil kimu joulou leh thilman kaljeh a Manipur Assembly chu anokhumgot uleh Sempatni a chu Manipur police hon akhamtangu ahi. President pa jaonan MPP lamkai len 5 chu phat chomkhat a din police hon amannun ahinlah alhadohpai taove.
JE natna lan jeh’a Delhi a patsa mi 3 hung kalsong-u
Imphal, Lhamul 20 : National Vector Borne Disease Control Society, New Delhi apatsa official mi 3 Imphal khopi ahung lhun toh lhon in one day interactive session cum training programme kiti kin-gon khat umna noiyin Manipur state Vectore Borne Disease Control Society on Japanese Encephalitis kiti thugol noiyin houlim khomna ana um ahi.Hiche kin-gon chu Classic Hotel, North AOC muna ana um ahi. Kihou khom sung achun Japanese Encephalitis natna chung chang thuhi akin thei penna kiven dingdan boldoh ding tohgon ho ana um in ahi. Phalbi tengle chapang ho Japanese Encephalitis natna akon kiven nadinga lou kap ding thudol a jong seikhomna ana um-e tin thulhut akimun ahi.
Chapang ni kipuimang
Imphal, Lhamul 20: Sempatni nidan 12.20 velchun Imphal East, Lamlai police station noiya Chingarel munnah chapang 2 melhet louhon ana kaimangun ahi. Amanichu, L. Ibochouba Meitei chapa Lairenlakpam Nganba Meitei (12) leh Ng. Rajen Singh chapa Ngangbam Kuber Singh (10) ahi lhone. Nganba hi Kendriya Vidyalaya, Lamphelpat'a class VII a kai ahin, Kuber hi Leisemba Maheikol a class VI a kai ahi.
