jamding natoh nahi contractor mi 5 in alan, tuchan geijin 533.23 metres bouhi pipe akijamin, ahinlah project a dinga akingaicha thilho akimloujeh in aphatchan akichai joupoi, tin aseije. 2010 sunga hi sewerage project a pipe jamchai ding kiti ahijeh in mipi tehin phat chomkhat eina thoh hu tadiu ngaijinte tin minister pa hin angeh in ahi. Thudoh dangkhat adonbutna ah minister pa hin lamlen semphat dinghi PWD mopohna ahin nala seho semphat ding bouhi PHED mopohna ahi, tin aseije.
M. Prithiviraj, MLA pa hin Moirang CHC hi hoitah in akisapon operation theatre inchunghi itihphat hijongleh chimlha a mi tamtah kisuhkhah nathei ahijeh in amopo department in Moirang CHC kisah danhi hoitah a avettup angaije tin aseije.
Health minister pa hin Moirang CHC kisah nahi MDS in alah ahin ehbuh sahna ding, compound bang sahna ding, ehbuh aumsaho semphat nading, Operation Theatre suhlet nading, blood storage semna ding, septic tank semna ding, land development, staff quarters semphat nading hin sum akipe chaitan ahinlah natoh achainai pouve. Thudih louva natong contractor hohi khoutah a action kilah khumding ahi, tin aseije.
Dr. Ng. Bijoy, MLA in question hour achun akiphu tilla patnin CADA hin Khurai A/C leh akomvellah hoa lou bolna ding twilam ima apepoi atihi adonbutnan Ph. Parijat, CADA minister pa hin CADA tuple doi penchu irrigation project hoa konna twi hoitah a hopdoh ding ahi. Department hin sum
lhom chakhat bou amanchah ahijeh in state sunga mun lentah akihop joupoi, hijongleh RLI scheme implement kibolna hoa vang alolhing lheh e atin ahi.
N. Mangi, MLA in RLI scheme thu a thudoh aneichu donbutnan minor irrigation minister pa hin department in state sunga irrigation semhoina dinga RLI scheme hi hoitah a implement kibol ding ahi. Department hin thinglhang leh phaicham a RLI scheme 165 hi dangka 14587.05 lakh lutna semdingin lungel akineije tin aseije.
T. Hangkhanpao, MLA pa hin 2011 kum'a school kai akipat masanga education minister pa hin Singhat Government High School hi asemhoi dingin atem me. K.Panmei, thudoh donbutna in K. Ranjit, works minister pa hin PWD hin I T Road lamlen semhoina dinghin na atonge, tin aseipeh e.
Post Office a train ticket kahthei hita
Imphal, Lhamul 28 : Post Office a kon'a Passenger Reservation System (PRS)/ Railway ticket kahthei nadin Department of Posts, Manipur division in hondoh na anei uvin ahi. Masang'a mipi hon MSRTC building ah line saotah tah a kigol nachu tuhin postal department a jong kikah thei ding ahitai.
Tu tuhin Senapati Sub-Post office leh Bishenpur Sub-Post Office a bou um ahin Manipur post office jouse a hung um vah ding ahitai. Mipi ho koma tepna nom chu tua post office mun 2 ahi railway ticket reservation bol thei ahi.
MU English department akon hetsahna
Imphal, Lhamul 28 : Ahung lhung ding Lhamul nisim 31, nidan 9:30 teng Department of English, Manipur University, Imphal noiya MA Program (English) admission dinga Entrance Test chu um ding ahi. Head of Department akon'a hetsah khat chu candidates ho jousen nidan 9:00 chet leh report akibol diuvin hetsah ahi.
Thilpo garihon NH-39 jotjing nalai
Imphal, Lhamul 28: Thaopo gari 20 jaona in thilpo gari 79 chu NH-39 langa konnin Vahchanni chun Imphal khopi ahung lhungin thaopo gari akeo 40 mahi CRPF ho kilhonpi nan NH-39 jotnin Imphal adalhatai tin police hon asei uve.Thilpo gari 79 hohin alhangpi a fertilizers, cement leh nehding thilho ahinpoh ahi. Thilpo gari kilhonpi CRPF hohi DIG lamkaina noija che ahiuve.
Hetding khatchu, Ministry of Home Affairs hin Nagaland sunga NH-39 a Manipur hinjon gariho vengtup dingahi CRPF company nijen akoi ahi. Ministry of Home Affairs jonghin Indian Oil Corporation (IOC) tehin thaopo gari hohi NH-39 langa asoldiuvin aseipeh uve. Naga simlai hon blockade aboljeh uva nitin ngaichat thilho akimu joulou phatna Union Ministry hin pan ahinlah ahi.
Manipur Assembly nikho khat suhsaobe
Imphal, Lhamul 28 (NNN): Tutua chelhajing Manipur Assembly session hi Assembly deputy speaker kilheng ding jeh in nikho khat in suhsaobe ahitai.
Manipur Assembly Speaker in deputy speaker panmun lodinga House member ho jouse koma nomination pelut dingin ngehna aneijin ahi. Aman aseibe na a chun Lhamul nisim 29 hi House toukhomna achaina hiding dol ahin, hinla deputy speaker kilhen ding jeh in kisusaobe ahií ati. Hijeh chun ahunglhung ding Lhamul nisim 30 nikho teng deputy speaker election umding ahi. Deputy speaker pan mun hi Th. Shyamkumar in ningkum a ahaijou apatsa ong ahitai. Achesa kum phabep ahitai Th. Syamkumar hi thingnoimi lamkai hotoh Indira Gandhi International airport mun'a Delhi Police hon anamat uva 2007 kuma Tihar Jail a uma Assembly Election hi Andro Assembly Constituency apatsa hung kaidoh ahi.
Hiche jou a kipat amapa hi Assembly toukhomna aumteng bail hung pot a aphat dungjuiya Imphal apatsa Delhi ahal kah le ji ahi. Chule Tihar jail aumsung in jong trial in aumjing nalai-e.
NH-53 akisuhlou jeh a PDS jong boipha
Imphal, Lhamul 28: Vahchanni chun Manipur Inpi a Y. Irabot, minister of consumers affairs, food and public distribution pa hin Public Distribution System (PDS) noijah mipin angaichat'u thilho akipe theipoi, ajehchu NH-53 lamlen asevallin alang khatna NH-39 langa thil hinpoh ding hilah transporters hon ajah daove, tin aseije.
Minister pa hin Assembly a ahoulimna ah private party hon state danga kon na thao apoh jiuhi thao anendomna dinga jomsah peh dingin aphai. Lampanga thao black market a joh hokhu state sunga thil um danhi ivetleh khamthei ahipoi. Amahohi kikhamleh mipi genthei nahi sangcheh ding ahi, tin aseije. NH-53 hi akisemphat masangsen Manipur sunga nitin ngaichat thil hohi muhah jinginte tin Erabot hin Inpi ahetsah e.
