Eimite hi lamkai phabep khat in Chin-Kuki-Mizo thakhat ihiuve tijongleh hichu theory leh academic interest bou ahitan, atah beh atheitapoi tichu imusoh kei taove. Chin miten Burma Chin Hills (state) anei taovin Kuki kiti ahepha pouve. Mizoten India sunga state aneitaovin Kuki chu koiham tijong ahe tapouve. Achuti leh Kuki chu Kuki ahijing in ithiu jong leh ihiníu jongleh koima bel ding aumpoi tichu suhmil lou ding ahi.
Ahileh Chin leh Mizo te thu seida tao hite. Tunaicha a Thoubal vadung panga Kuki ho lah mun khat na Kuki minpu thalchoi group 2 gim neitah a kitha kimat na thu chu lamdang ka salheh'e. Aum talou Pu Letkholun Kuki, C-in-C KLA, in 'Mihem hi Pathen sem ahin mihem khat in Pathen thilsem khat suh mang chu angaina ahipoi', ati. Langkhatna Pu Hemlal (German) C-in-C, KNF (MC) in 'Nam ngailu khat in nam ngailu khat akithat ngaipoi', atin ahi. Hiche lamkai teni thu seidoh hin kalung lai atong kha lheh jenge. Nam lamkai khat thu seidoh mong mong ahi kati ahi.
Keima geldanin, Nam natong dinga kipehdoh kiti cheh jong leh thal choija kipedoh hi a sangpen in kagel'e. Hichea kipehdoh hi thil nom ahipoi. Hinkho phal ngam kiti chu hiche hi ahi. Hijeh chun mitam pi akiphal doh ngampoi.
Ahileh eimi thal choi ho kiphal doh nahi ipi thu hitam? Itobang kipeh doh na hitam? Eima leh eima kitha to nadinga kiphal doh jeng ahidiuvem? Nam ngailutna jal'a kipedoh khat in iti dan'a nam ngailu khat atha ngam jeng thei ahidem? Midangin eitha nahobon phu kila joulouva ibolla eiho leh eiho chunga kiphu lah ihabol u ahidem? Eikipeh dohna chu inam chanpi thina bep ding ahileh phachom ding hinam? Kipeh doh na sangpen panna bei ahiding chu igel theiju hinam?
Tunia eiho leh eiho kah kitomo jeh a thina toh gollhang chapang hinkho tamtah hohi hoilai munna koi ding hitam? Gam le nam huhna jeh eithao chu numei chapang tehse ho jaona ahin, tua eiho kitha tona a thi ho hi gollhang khangthah tha hat lai cheh pamai umtah cheh ahiuve. Eiho leh eiho kitha to jeh a muding gam le go aumpou pou leh kei jong kajao nom ahi.
Sopi nam sepai ho, phatah in kigel kit uvin, ajeh chu na nam miten na umchan u hi kadei tapouve.
Nachondan'u kapom tapouve. Nakipeh doh nabanga nachon lou diuleh Inn lama hung kile kit un lang, nanu napa natoh eihung toh hu leuchun hatah a phachom joding ahi.
Tunia nakiboina hou nakitha tona hohi Kukite gam mu nading ahipoi, nangho sung Organization khat leh khat kikah thu bou ahin, Kuki nam dinga phachom thei thil ahipoi. Aphachom lou hel thil hoa itih chan boi boi jengding itiu hitam? Ichim lou lai ju ahidem? Nanu napateo Kuki nampi vang kachim lohsoh taove. Th. Muiva lamkaina noiya Kuki kithat jouse longman ingeh u hilou ham? Ahileh nangho kitomo jeh a thi ho longman kon apeh ding hitam? Th. Muivah tha hojong Kuki ahiuvin nangho khutna thiho jong Kuki ma ma ahiuve. Hiche thisan phuba hi moh seh a mang louding ahi. Koitabang khat tupetna abat kisa doh na um uleh avangpha nahidiu, tua bat kisah lou jouse nasah nikhou um thou thouding ahi. Ajeh chu ganhing uicha khat mai mai bon aman (price) aumleh mihem Kuki chapa khat chu man beija moh mah thah thei lou ding ahi.
Khaije, thalchoi Kuki gollhang ho, Khangdoh taohite, Ajo leh nampi gaosap na ichan lo diu hi tijat aum'e.
