Islamic movement spokesman Zahi Injidat in thuso miho kom'a aseina a amapa gotna kipe lunglhai louna chuleh ama ngailut na jal'a anung jui hon Mosque mun'a taona kimang ding ahi ati.
Sheikh Raed Salah chun Al-Aqsa mosque jeh a gal asat ahin ama tobang mi asang a sim aum nalaiye ti Israel sorkar in ahetna dinga kijotna chu kinei go ahi chuleh Israel authorities hon ei kham jou lou diu ahi tin Injidat in aseiye. Aman aseibe na a Salah gotna kipe chu dan toh kitoh lou ahi ati. East Jerulem a um Court in Salah gotna chu lha 9 akonía lha 5 a asuhnem peh ahi. Lhaphul nisim 31 nia Israel in Gaza blockade abol sukeh dinga Mavi Marmasa kong a tou lah-a chu Salah jong pang ahi. Israel sepai hon hiche kong chu abulu uva asunga tou Turkey mi 8 atha u anahi. Hiche operation kibol na a chun Israel navy officials mi 9 jong ana kitong kha un ahi.
Al-Qaeda hon French mi amat-u chu athat tauve
Moscow, Lhumul 26 : North Africa gam'a Al- Qaeda hon French leh Mauritania sepai hon French mi khat kiman huhdoh ding tia natoh anei-u alosam to lhon in Al-Qaeda hon amapa chu athat tauve tin Al Jazeera thuso chun aseiye. Islamic Maghreb mun'a Al-Qaeda lamkai khat in aseina a French mi Michel Germaneau chu cross-border operation a galguh bol mi 6 athi jeh in amapa jong chu misemni chun akithat tai ati.
Al-Qaeda lamkai pan aseibe na a French president Nicolas Sorkazy in ami khat ahuhdoh jou poi hinla ama in amite ding leh agam sunga din damun kot ahong doh tai tin Arabic paova kisei satellite news chun aseiye. Alangkhatna Michel Germaneau chu athi tai ti thulhut akimu poi tin French officials hon aseiye.
Germaneau, 78, hi retired engineer ahin Lhatun a chu Niger gam'a ana kipui mang ahi. Islamic Maghreb a Al- Qaeda lamkai Abdelhamid Abou Zeid thusah tah a ana kiman ahi akiti-e.
ISI leh Afghan Taliban kitho khom in US sepai ho abulu jiuve
New York, Lhamul 26 : United States in galguh bol ho suhmang na dinga Pakistan toh apan khom'a galguh bol ho douna dinga one billion dollars a kithopina anei vangin Pakistan intelligence agency ISI chu aphat she in Taliban ho toh akimuto jingun chuleh Afhanistan a US sepai ho buluna din akihou mat jing uve akiti-e HIche documents hochu WikiLeaks kiti kiloikhom na khat in ahin poh doh ahi. Hiche documents ho akon chun Pakistan military spy service hon Afghan a galguh bolho phatah a akithopina amudoh un ahi.
Documents in aseibe na a ISI in Afghan lamkai ho than din tohgon aneiyin chuban leh US sepai ho chu Pakistan tribal mun ho akon in buluna aneijing uve ati. ISI leh Afghan galguh bol ho kitho khom nahi masang peh apat ginmo anahi jing ahi tin US officials hon asei un ahi.
Hiche record kimudoh chun aseina a ISI leh Pakistan sorkar in Afghan toh gamgi vel'a galguh bolho asuhthip nom lou jeh in US alung lhai poi ati. Pakistan tribal mun akon galguh bol ho asuhthip nom lou jeh in US alung lhai poi ati. Pakistan tribal mun akon galguh bol hon Afghan a US sepai ho abulu jiuva chuleh boina um louva Pakistan gamía hung kile ji ahiuve ati.
Karzai leh Kayani kimuto US ding’a thilpha ahi : Holbrooke
Washington, Lhamul 26 : US Special Envoy for Afghanistan leh Pakistan Richard Holbrooke in aseina a Afghan president Hamid Karzai leh Pakistan Army Chief General Ashfaq kayani kimuto chu US a dinga thilpha ahi chuleh Obama vaihomna a thupi tah khat ahi tin aseiye. Holbrooke in aseina a US sepai kilah doh ding jeh in Karzai in Islamabad toh achombeh a kinoptona anei lhon kigot ahi tia kisei chu jouthu ahibouve ati.
Afghan president Hamid Karzai leh Pakistan General Kayani chu masang jep tichu Lhaphul chu anung khah pen in ana kimuto lhon in ahi. Kihouna aum lou leh natoh machal thei lou ahi tin Holrooke in Daily Times thuso achun aseiyin ahi. Tun vang Karzai leh Kayani akihou lhon tan hijeh chun ISAF leh NATO a lamkai hon jong pan alah thei ahi tai. Hiche na ding chun tupet a US commander David Petraeus chu thumop akineiye tin Holbrooke in aseiye. Aman aseibe na a Islamabad leh Kabul kikah a phatah a kigol chatna aum ding hi US policy ahi ati.
Vietnam governor khat ajon jeh a kihaisah
Hanoi, Lhamul 26 : Vietnam a vaihom communist party chun provincial governor khat numei akijoh ho toh alup khom jeh in atohmun akon in anodoh tauve. Communist party thuso Nhan Dan in aseina a Ha Giang province a lamkai Nguyen Truong chu party sunga codes of conduct dan asuh khel jeh in akihai sah tai ati. Nguyen Truong To hin numei kijoh hotoh alum khom in chuleh hinkho phalou taha mange ti jeh a atohmun akon ahaisah u ahi.
Nhan Dan thuso in aseibe na a To chu atohmun akon in ahaisah un ahi ati. Police in aseina a To hin numei phalou ho toh hinkho amang khom in chuleh hiche ho photchetna in lim leh text messages jong aum soh keiye ati. Hitobanga chondan hoilou jeh a party akon kihaisah hi aphat she in aum jingin ahi. Adeh a Vietnam gam'a hi party khat bou um ahin hichu Communist party ahi. Amaho hin dan phatah anei un, dan palkeh aum leh anodoh jingo ahi.
Twi let jeh a China gam’a mi 111 thi ta
Beijing, Lhamul 26 : China Northwest Shaanxi province a achesa ni 11 sung lang louva go ajuh jeh in twi alen in alhom pen in mi 111 athi in chuleh adang mi 167 akihol mo in ahi tin authority hon aseiye. Go ajuh jeh akon Hanjiang vadung leh akomía vadung ho alet in Shaanxi Ankong, Hanzhong leh Shanluo khopi ho hatah in atongkha in ahi.
Tut hah a twi let hin thil tampi asuse in ahi tin Xinhua thuso chun aseiye. Twi sang let chun mihem 4.25 million atongkha in chuleh adang mi 703,000 chu mun danga akichon doh un ahi. Twi letna khohse pen Ankang Khopi a mi 63 athi in, 119 akiholmo un chuleh mi 2, 824 akitongkha uve tin provincial sorkar thuphon chun aseiye. Hiche twi sang let jeh in thil amang-asuhset hi agomía 9.56 billion Yuan alhinge akiti-e.
MP a loubol mi khat in amit langkhat sepai khat pe ding’a sei
Rohtak, Lhamul : Kum 54 a upa Khandeva district, Madhya Pradesh akon loubol mi khat in amit langkhat chu sepai khat apeh din aseiyin ahi. Hiche sepai pa hin gal jeh in amit teni aman sah in hiche jeh a chu amit langkhat chu apeh dinga asei ahi. Amapa chu amin Suresh Chander Rathore ahin adam lai sunga hitobang aum ding chu adeisah lheh jengin ahi. Thuso mihon thu adoh nauva Rathore in ka insung mite, kanu tehse, kacha mi 4 leh kajinu in hitobang aum ding chu aphatsah cheh uve ati. Adeh set in kanu chu akipah lheh jenge ati. Aman aseibe na a hiche hi kadam lai sunga aum ding kanom lheh jenge ati. Hinla Sainik Kalyan Vibhag offices ho akon donbutna kamu hih laiye ati.
AD 253 apat AD 293 sung’a Roman thih sum $ 1mn man kimudoh
London, Lhamul 26 : Metal detector kichoi khat in thil lui ahol'in ahileh mun khat ah Roman thihsum (coins) 52,000 amudoh in hichu $ 1 million vel hidin akiseiye. Hiche sum kimu hi United Kingdom sunga akimu na atampen khat ahi tin British Museum thulhut chun aseiyin ahi. Hiche thil lui mudoh pa chu Dave Crisp ahin hospital khat a anhon a pang ahi. Amapa hin thil ho aholna ah hiche sumlui hi south western England a Frome kom'a loumun khat akon amudoh ahi. Crisp in amasa in thihsum chu 21 amu in hinla leibel amu phat in aman archaeologist ho ahetsah in amun chu phatah in akhol un ahileh masanglai sum hochu amudoh-u ahi.
Hiche sum hochu masanglaiya Roman general Marcus Aurelius Carausius lima um in, amapa hin AD 286-AD 293 chan Britain a vai anapoh ahi. Chuleh sum atamjo chu AD 253-AD 293 channa ana kimang ahin debased silver leh bronze a kisem ahi. British Museum a Portable Antiquitius and Treasure a luboh Roger Bland in aseina ah Dave Crisp chun thil phatah abol in ama chamtah in amun chu analai poi. Leibel khat a dinga sum kimu atam napen jong ahi. Hiche khanglai miho chun hiche sum chu pathen lhaina ahilou leh gal um inte tia anasel'u hinte ati.
