Lhingboi Haokip
Tuchung 2011 gamsung minsut toh kisai a boina sohho hi asoh louding beh thil ahin, hitobang thu agin ding jongleh aginmasang'a suthip dingchu thinglhang mi Manipur Inpi a kisol ho hiding dol ahiuve. Agam sung mipi lungna a ummo helta a thalheng kisol ho thipbeha aum nahlai uhin mipi thalheng ahinao akihetmo sah tauve ti kicheh tahía avetsah ahi. Mipi deibang sei-ding leh Inpi a polut ding'a mipin asol dan'a um ahiuleh ipidia tuchung Inpi toukhom sung'a khatcha beh jong uhpoh lou hitauvam tihi mipin chingthei tahía igel phat u ahitai.

Thalheng Inpi'a mipi lunggel leh deibang polut ding kisol jing a ipi i-atileh COPTAM kiti tobang, thinglhang mipi leh thinglhang gam huhbit dingía semthuthu ngai ham? Ipidia CDSU akipat ngai ham? MLA thinglhanggam a pat kisolho chu lho-in alhoh gam u hitam? Olle khai neilou ngen ahiloule alhoh buh-a bongeh dim ngen ilhen doh khah uham? Mipin thalheng ilhen dan u thahgel nading'a kihilna phatah hidin ginchat aum'e. Thalchoi'a Kukiland, Zalengam, Zogam del kahi tiho jong mipi thalheng amahon hunam a alhenjiu hilou ham? Ipidia tunia atohdiu seipeh theilou a um hiuvam? Mipi
chanvou gumang ding'a kithutoh thei bepseu hiuvam? Thal chu nampi mipi vaicha-genthei nehding sum-le-pai mipi kom alhun masang'a kilohkhom leh mipi kom'a kipat a kidongdoh sum-le-pai mangcha kilam doh ngen ahin, ahileh ipidia tunia mipi phatchomna bolna ding a kimangcha thei talouva, sum kichuna jeh'a kitha tona bou a kimang gam hitam?

Chapang lungtheng gam-le-go ngailutna nei-a, pohnat jeh'a kiphinna bolholoi min khutthah lhauna a ahin man pona theilou lamkai hohi koi hileh kheldoh phat ahitai tihi mipin thuhtah a igelphat u ahitai. Lanva, Singhat, Hiangtam leh New Lamka a MDC hobou hi gam ngailu leh khainei hitaovam?

Thalchoihon atundoh u adangho chu tuahi hoilai a ipi aboipiu hitam? Oleh Congress ngen a kaidoh ahijeh uva Ibobi kicha a chat ngamlou pan hikit tauvam? MLA leh MP kinei ho nung ajuikit u hitam? Thinglhangmi gam lepche leh thuneina hunam a kimangcha a kilah pih kigo kitihi Human rights atohkhah hilouham? Ipiding'a KUMHUR holoi thipbeh'a um hitaovam? Nagahon Kuki atha phat bouleh Human Rights violation um ahisah u hitam?

Kuki Inpi kahi tiho jong nehkhom nading, lim kilah nading bou aboipi diu hitam? Gam-le-go huh ding
ahiphat leh ipidia chapang ngen thoh jiu ham? COPTAM semthu ngailou'a nampi kiloikhomna aum sa
holoi in TAMKOP dom'a gamsung huhna ding'a panlah thei hilou hitam?

Mipi lhendoh hilou Inpi ahijeh in Inpi hochu kihethem tajongleh, MLA, NAMSEPAI leh MDC holoijin tunia ipidia kamkeh ngamlou hiuvam? MP thinglhang thalheng pa jong Parliament Session ho School kai'a akai sang'a a constituency boina state government in asuhchet nading'a tha apat a thu aphot theilou hitam? Ibobi in phalna apeh ngai aham? Ahida'n da'n a MLA, MP le Namsepai lamkai a ium uva nampi mipi kokhuh a lehlut ding ngensen a ikigon uhi ingah phat u hitalouham?

Kitahna neilou, khaineilou pasal ngen ingen sese uva ihiti sang uva numeiho ikipat diu hitam? Pasal kitah le hangsan umlou hitam? Mipin jong jaíchat leh maimoh pum'a ol-ol a min igam ineh-ichah konna ihinlah pih a eitha sang'a khat-le-ni athi le thi, hangsan tah a inampi semphat nading'a lunggel phat hita louham? Pu Tintong le Pu Enjakhup, nason napah lamvai cheng, vantham nacholna lhon a kon hinve lhon tem in, khanglamvai bang in, kineppi matolding neilouvin, kachehchao gamtauve. Kuki Chanute anhon-tuikhai bep'a mandia chondan nana chesah uhi, kheldin gaothu hinsol lhon tan.

The author can be contacted at
khoiju@gmail.com