Barcelona kom Castell defels Playa Station muna anasoh ahi.
Khangthah hohin kum she leh Saint John’s Day aman jiu ahin Lhadou 23 nileh north eastern Catalonia
muna meiya kichep, concerts, lam jat chom chom abol jiu ahi tin Europa press news agency chun aseiye.
Hiche train station ahi kenga chena ding leinoi lampi jong um ahin amaho hin mihem chena dinga kiphal lou mun a ache jeh uva toset atolou ahi. Toset aum jouvinhiche lampi chu akikhah in police, medics leh meiphel ho amuna chun aum un ahi.
India in US koma ISRO leh DRDO banned abol lahdoh dia ngehna nei
Washington, Lhadou 24 : US in Indian agencies phabep adeh a Department of Atomic Energy (DAE)
chuleh Indian Space Research Organisation (ISRO) banned abol lahdoh na din India in ngehna aneiyin ahi.
DAE leh ISRO ho hi US agencies ho toh kitho khom a natoh anei ahin hijeh a chu India hi gam dang toh pan khom sah angaiye tin Sharma in aseiye. Aman aseibe na a ISRO leh DRDO (Defence Research and Development Organistaion) hin imacha aguh a abol umlou ahin hijeh a chu banned kibol a kon lahdoh angaiye ati.
Hiche thu hi US Trade Representative Ron Kirk toh kihouna a jong kipo doh ahi. Non-tariff thu leh Special 301 akon India hi lahdoh din temna aneiyin chuban leh gam teni a double taxation suhmang ding thu jong aseikhom unahi. Indian skilled labour ho adia H-1B visas ho jong peh ding chuleh Generalised System of Preference thu jong aseikhom un ahi. Hiche chung chang thu ho jeh ahi Lhalam teng leh Trade Policy Forum kikhopna a Washington muna ga pang ding ahi. Trade leh investment chung changa Kirk leh US Commerce Secretary Gary Locke jong Delhi a hung din atem in ahi.
Osama that dinga kigo pan Pakistan a hung kit dia sei
Los Angeles, Lhadou 24 : American mi khat achangseh a Osama bin Laden that dinga hung kondoh Gary Faulkner in aseina a Pakistana kanung che kit ding ahi ati. Amapa hi Pakistan sahlam a gammang lah a pistol, chemcha chuleh jan vetna googles toh ahin kipoh a bin Laden that dinga akigot lai tah a Police hon amat u ahi. Hinla ni 10 jouvin amapa hi akilha doh kit tai. Janhi chun Los Angeles International Airport muna anaopa, anaonu leh anu in ana ngah un Denver, Colorado mun ajon un ahi. Anaonu Deanna Martin in aseina a damsel a inmun ahung lhun akidange ati.
Faulkner in aseina a Pakistan police amat sung un phate chan ei jen uve ati. Aphat seh in Pakistan medical natong hon kidney natna jeh in dialysis eibol peh jing uve ati. Pakistan gama che kit ding nagot am tia adoh nauva aman kache kit ding ahi ati. Lhajing kichai lam teng leh kache kit ding ahi tin aseiye. Lhadou 13 nia akimat jouva pat tunia chu Pakistan apat Emirates Airlines a America ahin jot ahi. Amapa hin al-Qaeda lamkai Osama bin Laden that dinga hung kondoh mong mong ahi. Faulkner hi Colorado state Grealey mun cheng ahin aman aseina a kholjin dinga kaki gotna ahin sum tampi alut in chuleh phat tampi jong kasu lut e tin Los Angeles a thuso miho koma aseiye.
Gen Petraeus in Afghanistan a Nato makai tading
Wahington, Lhadou 24 (Reuters) : President Barack Obama in Afghanistan a Commander pan US lamkai ho demna anei jeh in anung kou doh in ama khel in General David Petraeus akoi tai. Obama in General Stanley Mc Chrystal chu White House mun akou in thudoh anei jouvin atohmun akon in ahai sah tai. Ama khel a kisei Gen David Petraeus hi Iraq gal a chu amin che lheh jengin akiseiye. Mc Chrystal hin Rolling Stone magazine khat ahi President leh atoh khopi ho demna thu asei ahi.
Hiche jeh a chu Obama in athu sei ho chu General lamkai khat ding akilom poi tia ama khel aDavid Petraeus hi akoi ahi. Obama in aseina a kum 9 sung Afghanistan kikhel ahin amapa kikhel vangin American policy akikhel chompoi ati. Lha 6 sung Obama in Afghanistan gama sepai atol lut hi nasatah in demna jong aumin ahi.
Julia Gillard chu Australia numei PM masapen hita
Canberra, Lhadou 24 : Ruling party in Kevin Rudd atohmun akon ahaisah to lhon in ama noidou a um deputy lamkai dinga alhendoh tah jeh un Australia gama numei prime minister masapen din Julia Gillard chu lhendoh ahitai. Tu lha sunga elections umna dinga Julia Gillard hin sorkar alamkai ding ahitai. Kevin Rudd deilou jeh a kiphinna ana um jeh in Labour Party lawmakers 112 hon kilungtoh tah in Gillard alhengdoh un ahi. Parliament a majority party a lamkai ahitoh lhona Gillard hi prime minister dinga kitepna anei tei ding ahitai.
Gillard hin key foreign policy ho vang akhel lou dingin akiseiye. Hiche jeh a chu Afghanistan gama jong sepai alahdoh lou ding ahi. Achesa kum 3 masanga chu Rudd hin elections a anahat ahin hinla tu naicha apat a chu aminche na lhasuh ahitai. Gillard prime minister ahung hi toh lhon in Lhumlam gama vetsahna German Chancellor Angela Merkel, New Zealand Premier anahi Helen Clark chuleh Britain “Iron Lady” Margaret Thatcher ho toh tha khat ahitai. Gillard apa John illard in achanu PM ahung kaidoh kakipah lheh jenge ati.
