percent aphaove. Hibanga tam mihem hijat pihi saplen holeh sorkar hin donse louvin akoije. Tribal hohin lhahsamna tampi neinao vintin alhahsamnao dehsat chu damtheina langtoh education ahi.
India gamma hin tribal 573 aummin, pao 270 anei jun, aumnacheh uvahin hindan jatchom cheh anei jun ahi. State jouse a tribal ho education hi akibang pon, state themkhatna chun education langa kolho akhelnao aummin ahin adangse dingin vang education hi nemchanbou aumme. Tribalho education nemcha khatna aumhi thuchom hitaleh, amaholah a jong numei leh pasal lekhasim danhi akibang kitpoi. Bihar, U.P., A.P., M.P., Rajasthan leh Orissa ahin tribal pasal toh tekah dingin numeiho education hi anemlheh jenge. Tribal ho education sanna state ho a hin numei-pasal lekha them tamdan akikhe behsehpoi. Rajasthan na numei-pasal education kikhetna hi 35.9 per cent points ahin (pasal ñ 62.1 %; numei ñ 26.2 %), Mizoram ah akikhetna hi 4.8 per cent point bou ahi.
Numei-pasal hi thil ijakai jahi kithokhom ahin khat beija khat phatheilou ahi. Ahinlah, tribal numei hohi koiman gelsangin akikoipoi. Amopoh naochu insung natoh, chapang khoukhah chuleh insunga adammo jending bouvin akivet chepme. Education lhahsamjeh hin pasal hon numei chu insung natohna in akithopi pouve. Numeiho panmun hahsat danhi akihetpeh pon, thil neocha khat asuhkhel uleh akibol gentheije. Akiseimo behseh jeh uhin adamthei naojong akivetman pouvin, hijeh chun tribal numei hohi aveiseuvin ahi.
Education hi kipethei leh tribal numeiho hindanhi oljeptao vinte. Numei seh kitidiham tribal pasal holeh chapang ho hinkho jonghi education alhahsam jeh in ahahsalheh e. Tribal numeiho ahiti genthei naohi sorkarín donlouva akoijeh u ahipenne. Mijouse hin khantouna leh kisuhtah a hindinghi angaichat ahi. Hichenghi education ninbou eineisah thei ahi. Jingkah a pat nilhah changei insung natohna a aboijeh uhin numei hohin kicholdona ding phat tahbah jong anei pouve.
School kai hai jonghi tribal telah ah asanglheh jenge. Midang education toh vetkah dinga anemlheh jeh hin tribal te education hi Avella vetchil kitdinghi thilpha hinte. Amasatah in education hi tribal ho lahthei dinga sempeh angaije. Chapang chun education aphatchompi leh aphatchompi lou dingchu thildang tampi adamtheina, inchen, anulepa education chungah akingame. Tribal ho lah a education akhantou theilouna ajeh themkhat hochu ahileh tribal hohin chapang hochu lekha ahungthep tenguleh thu angaiji tapouvin, puchon pachan naho nahsah louvin akoijun, achainaleh tribal hiding jong anomji tapouvin, chuleh society in alhatheiji tapouve tin agellun ahi. Hijeh chun, tribal nulepa tehin achateuvin lekha asimdiuhi asanthei behsehlouvu ahitai.
Genthei vaichat jonghin tribal ho lungthimma lekhasim nomlouna apunsah e. Avaichatjeh uhin tribal atamjohin achateu school akaisahjou pouve. Akigenthei chehnan tribal ho lah a gentheina hi asangdeh satne. Tribal ho hopthum lah a hopkhat sumlo hohi milouva natong mai-mai ahiuve. Hijeh hin tribal ho chenna ho galguhbol atamme. Agenthei hon agelmasat pen uchu itileh kakihinso theidem ti ahijeh in achateu school akaisang uva insung kivahna dinga louna atoh diuchu nulepa te deilhen ahi.
Jilkung hohi tribal ho hinbang banga ahingot masat photnu angaije.Tribal chapang lekha hilho chun tribal ho hinkho mandanhi apachat theija, apaovu athotheiteng lebou amaho banga ahingel thei uva hiva konna chu school kai hung kitil theibepdiu ahi. Aphapen vangchu tribal khosunga jilkung dingchu tribalmi ma-ma kilhengleh hipen ninte. Chapang ho adeh a lekhasim kipantil hohi anu paova education peh angaije. Pao ahetlouva lekha akisimsah tengleh tamjohin lekhasim angahlo ji taove. Tribal ho tamna lah a school ho a hin infrastructure akivatlheh jengin ahi. School in asedehduh jengin, touna leh table hojong aphadeh poi. Tribalho lah a school ho
a hin Jilkung school kailoujong atam dehsatne. Hichiho jeh a chapang school kai hai tampi aumme.
Policy semma pangho hin tribal ho lah a education phatah akoilutjou pouve. Tribal ho lah a khantouna aumlouna jehpenhi education alhahsam jeh ahipenne. Sorkar hin tribal ho lah a education pohlut dinghi akinlenpen khat danna akigel ding angaije.
Guest Editorial: Nenei Khongsai
