Gal bol hi thilse tamtah sona ahi. Hiche ho chu ve masau hite :
7.1. Galbol jeh a Thilse Soh ho :
Galbol hin masanga sangin imelmate to kigam latna asodoh e. Galbolna a hin hinkho
tamtah akisu mangjie. Galbol aphatlouna chu hiche chu ahi. Pathen semsa mihem ho khotona beiya kikithat jia ahi. Galbolna a hin sum le pai tamtah akisumang jie. Meipum, meichang le adang mai mai hilouvin neh le chah thua jong thil tamtah akisumang jie. Thil phalou lah a aphachom lou loitah ahi.
7.2. Sepai pan le Galbol :
Sepaiya pan hi toltha ding, mitha ding nopna to akimat jeh in eiho dia panlouva pha ahi. Toltha, mihem
hinkho suhmang ding nop chu thilse lah a thilse lenloi ahi. Sepai pan chu thilse bol dia hinkho phalna khat
ahi. Sepai pangho hi neh holna a pang ahiuve. Ahinla gelchen chenleu thilse bol dia kipeh dohna ahi. Melma neina dia kipanga ahi. Namdang to kiho dia kipehna ahikom aumji. Tolthat dia hinkho phalna jong ahi.
Sepai pan hi angaikom umjongle aphatlouna alen'e. Adoi atup le atohdoh apha behseh poi. Hijeh a chu
Kukite dia panda thei ahi. Phat khat a din ngai jongle mihem jouse hungpha le sepai hi ngailouva hung umthei ahi.
7.3. Galbol le Ethics :
Galbol hi aphatlouna aume. (1) Galbol hi mitha to kikhen theilou, mi thilsuhset to kimat jing ahijeh in thilphalou ahi. Galbol hi Pathen thilsem suhmangna, suhsetna ahijeh in chonset ahi. Galbol hi migilou hon phatsah jongle mipha, midih ho le Pathenin phatsah thei ponte. (2) Gal a mithi hi ajat sim joulou hitante. First World War le Second World War a mithi chu kisuto le mihing jat kithat chu melse salou mihem umponte.
Hijeh chun ahithei chan'in Kukite hi galbol louna din sepaiya panda leu hen phante. Neh holna ding dang dang phatechan kihol le umnante. Kivahna dang dang ho habolía sepaipan jong hi kivahna a manlou din aphai.
Golseh lam'a machalna dia tohthei ho Golseh lam hi leiset chunga khantouna lentah khat ahi. Tukhang hin golseh lam hi kisuh halna mai mai jong hilouvin, kivahna pha pen loiyin apang tai. Kukite dinmun vemasau hite.
8.1. Golseh Lam'a Kukite Machal Dan.
Upa khat hin masang jep'a Manipur a Tournament ana umji dan thu anaseiye. Aman asei chu, tournament ana umseh le team thum bou ahijiuve ati. Team thum ho chu Meilhei team Naga team le Kuki team bou ahijiuvin ahi. Team thum chun foot ball apeh seh ule Kuki team chu first anahijing jenge ati. Achuti le hiche laiya chu Manipur a chu golseh lam'a Kukite anasang pen jinguvin ahi ti theiyin aume.
Ahile tulaiya hi Kukite hi machal louva ahina ngaiya umden uva Meilhei ho le Nagate hi machal uva ham?
Ole Kukite nungchal uva Meilheite le Naga te ol ol'a chal'uva ham? Donbutna hithei khat chu, abonchauvin akhang sohkei uve. Ahinla Kukite khan hi sumkong che tobang ahin Meilheite khantou dan hi telep lhai gang banga ganguva hinte,tin seiyu hite.
Aipi chu hile tupet dinmun hin Kukite hi Golseh lam'a inem lheh-uve. India sunga jong achanga hat um ajongle nam minía hatna inei tam pouve. Iche sangna peníu hi foot ball(soccer)himai thei ahi. Hiche jenga jong hin masang jep chun ana um jongle tuhin Indian team a jao jou ding seikham aum tapoi. Manipur hi itamna pen'u ahin, hiche sung jenga jong hin ilhanem cheh cheh uve ti theiyin aum'e. Tulaiya leiset'a mimal akitetna minthang tah, sum muna pen chu tennis ahi. Hiche a jong hin eimite akichem them aumhih laiye. Golf a vang athem thim umnante.
Thinglhang miho che sangna pen chu Boxing hinte. Mary Kom chu numei kisuh tona a ama loi lah a champion ahikom aumjie. Hiche tailou hin thil danga achesang iumhih laiyuve. Hijeh chun chesang nading lampi jong vet angaiye. Hiche masang chun golseh lam kivahna thei ahidan veu hite.
banjom nalaiding...
