Phondohna
Thudih pen het ahah lheh vangin phat pha le mun ong aum petcha hin sei uhite, Kuki te lah ahin 'Hou lamkai ho' ahi lou le 'Hou natong ho' politics a akikum diu, ahapan diu adih poi ti loi le 'akhoh poi' tiloi aki um'e, malai chun 'Christian hon politics abolthei diu ham?
ti jong ana dong jiuve. Hiche thudoh lenho hi asei themjo aum masangin eihon sei tadiu hite.
1.Christian hon politics abolthei diu ham?
Achom lam a seiding chun Christian hon politics abolthei loudiu hita le Christian state ho, Mizoram, Nagaland le adanga chu politics bolding umlou ding ahitai, Christian state hoa chun politics bol'a jong thildang bol'a jong Christian ngen ahithei uve. Hiche sanga seiding khoh jo chu 'Hou lamkai hon ichan geiya politics abol thei uham?
2.Hou Lhacha hon Politics Ichan gei abolthei diu ham?
a) Israel te chun leng ana nei masang seu chun thutan vaihom ho chun houthu le politics ana kop'uve.
Leng ahin nei phatíuva bou hung kikhen'a ahi. Leng ahin neijou un jong leng ho atheplou uva, aphat lou
ule hou natong hon ana vetsui ji nahlai u ahi.
b) Specialist hon Pohna tum aneithei taove. Ipilam hijong le mikhat chu specialist ahi teng ama chu athepna lam'a chu hil ngai talou, kai hoi ngai talou ahi. Specialist umna achu midang kikum khoh ngailouva jong hitheija ahi tai.
c)Kuki te Dinmun Vetna Kuki te lah a hin Politics lam'a hi son thei mong mong hilouva abange. Politics lamía apha naove te a nganse jeng thei ahilou lai jeh uva ima lam jousea inemíu ahi. Politician ho hi politics lamía Specialist ho kilhenga jong ahipoue. Hijeh chun lhahsamna mutheiyin aumna laiye. Theplouna jengseh hilouvin
politics dih lou le thenglou jong aum lheh e.
d)Athem aumle Hou lamkai ho le Houbung kikum angai lheh nalaije.
Hou lhacha ho hi nam ngailu theiding pen ahijeh un politics lam hile ipilam hi le alhasam le aphalou apan
ule aseidia lom ahiuve. Politics lam alhah sam'a, adih louva aset mu a seipoh ngam lou hou lamkai ho chu
nam ngai lu lou joh a seiding hinte. Israel te lah a chu leng ahung umdoh nung jenga jong lengho aphat lou
u ham, vaihom je athep lou tengule themgao hon ana hillu, ana kimu jiu ahi. Hitobanga chu politics thu hile,
Social thu hile alhasam, aphalou aum teng le houbung le houna tong hohi asei dingdol ahi. Themna le chihna neijo aumle asei diuva lom ahi. Amavang politician ho chu politics lam'a specialist ngen ahi uva thudih a politics aboluva ahile houbung le houbung lhacha hon ima sei hih jongle hithei ding dol ahi.
e)Hou Lhacha ho chun election ho atet diu tina vang ahipoi.
Hou lhacha ho chu chingu hen them jong leu election ho atet diu vang chu adih poi. Hiche hogeija chu abol khah ule chutobang bolho chun hou natong ahinao chu a lhaso u ahitai.
f)Hou lhacha ho chun Galbol ding a phatsah lou diu ahi.
Hou lhacha loikhat chu chih jeh ham, thepjeh ham khat'a politics thu asei khah tah ujong le gal bolding aphat sah khah ule ahou natoh u adalhah u tobang ahitai.
