hichi khu adihpoi tia seidinghi ahahsat na aumji e. Dih ikisah jeh chun min eiseiset teng akingai theipon, alang khatna adihlouva igel thil boldoh hon kadih e tia ahinsap phong tenguleh manlou thunbou akigelpeh jin ahi.
Upa lungel theitah kisa hochun, kagollhan laijinlah kanampi a din ima kanabol tapon, tu vaigeinung hijongleh katheitop sunning ka “society” phatchomna dingin natoh kipan tange tia kisaboitah a aumleh ajinu lunglhaina vang ahijoupoi. Ajehchu, hapta khatna khatveibeh hi ënangla, navet ding naji nacha bon kivetjou louva, aphatseh a hetdang beija Society” society” ajinu kasehi ngainomhih jongleh angaitei angaitai. Mipa khat hina a achate lekhahil manlou jenna society dinga alhai jenga, minun jong nampi akhantou louleh chate lekha themmu henlang van valeh in kikhotou jeng jongleu mijana akichangpoi tihi geldoh pummin insunga mipan achate avetmanlou tah jongleh ken vemai tange tia ageltheilou hi manlou thu ahibouve.
Eimi tehin Bible thu ihetgil vallu ham ahilouleh mitoh kinelna ding gunsetna Bible isimmu ham Bible thua a ikinel nahouhi Bible thu aning akah kukaltah in ikinel jiuve. Christian te dinga amasa penna angaichachu Bible hi Pathen lhagaotheng jaona a kisun ahi tihi ipom louleh Bible sunga hi mihem lunglhom akihijeh in ginchat lelthei leh kinel nathei umding mong ahi. Pathen thusei phabep mahin amaho lolhinna langbou ahasei jiuvin, hopsom peh pontho pachun apelouho Pathen houlou abahsah un, insung maicham habol hochun maicham bollou hochu Pathen houlou abahsahkit leuve. Pathen ihou uhi vangam lutnading ham tia kagel laitah in vangam lutna dinga Pathen hou nahiuleh phachom ponte tia seiloi aumkitnin, kei tobang Bible thu hegil louho din lung nohphah aumlheh e. Pathen’n eilungset jeh uva achapa cross a apehdoh hi itahsannu lebou vangam lutding ihijeh uhin, keihou adih in nanghou adihpoi tia kinel baotam ibollu hi manlou thu ahibouve.
Leiset chunga corruption tamnanjong Manipur tobanga atamna ding mundang aum nadem? Meilhei ho lamkainan thinglhang misen anungu ijuijun, alen aneo kon ahaneh pennem ikitet tho jenguve. Lhani valjen economic blockade aumjeh in thil ngaichat ho ngari geijin abeitan, NH-53 beh in kipoluthen atiuleh lamlen chula manthei behseh anahi tahlou phatchun, meilhei hon BRTF hohin lamlen semna ding sum anehguh uva lamlen semding adonlouvu ahi tin aphun taove. BRTF hohin sum anehguh mong hinam akihepoi. A-ipichu hitajongleh, amaho nehguh kisei louva BRTF ho nehguh avel vella newspaper a ahinso jengu vanghi manlou thu ahibouve.
Kum somleni masangchun isopihou pao chomjep thohon kathing noimihou NSCN-IM hon meithal, meichang apeuvin, training abolsah un chuleh operation jong abolkhompi jiuvin aphalheh uve tin aseijun, kenjong Tangkhul hon eingailu uve natiu vangchu manlou thu ahibouve katipeh e. Kum phabep nungin atahbeh in manlou thu ahidanchu hettheijin ahung umtai. Tangkhul ho lamkaina a Naga te chungahi min adihlou themkhet abolkhum uleh human rights atongkhai atiuhi dih nasahjou nah em? Kuki te numei chapang kho helou mi chujat anathaova alang khatna human rights, human rights, tia asap uhi manlou thu kahisah bouve.
Manipur gammah sum ahahsai itiuhi phatah a ikholleh sum alhomlou danhi mudohthei ahi. Anei kipehbe ding kiti bangahi phaitol sunga aneijou themkhat hokhu ahao cheh cheh in aneilouho vang akivai cheh-cheh bouve. Kinkhoh a manchah dinga sum iholleh akisudong khehjin ahinlah, 10 percent interest a dinga iholleh eipenom akichutho kituve. Sum ahahsai kitihi aneijoulou ho a dingbou ahin, Manipur pumpia sum ahahsai kiti vanghi manlou thu ahibouve.
Midang galguh bolho thusim ivetleh sorkar komma angeh houhi agelkhohpeh theina diuva thal adopmu ahin, thal choichu akipatna hilouva achaina langajoh amanjiu ahi. Eihon vang ibung butun uvin thal ichoi masat uva achaina lang johleh sorkar komma deile tup thumding itiu hileh akilomme. Thal kitihi mi hinkho lahna thei ahijeh hin milungneo ho choisah thei ahipoi. Hijeh a hi min galguh abolnom tengleh hoitah a ageltoh masatna, thalchoi ding hohi hoitah in kithunun jou nante atiteng lebou apatnu ahi. Hichihi ilhahsam jeh uva eiholah a kitha kimat khamtang lelkei soh ahi. Eimiten meithal ineileh thingnoimi kipanjeng thei danna igellu vanghi manlou thu ahi bouve.
Mihem min idam sunga ilungel inatoh ima ahilou danhi David lengpa chun ahechen behseh in “nisa noija thil kibol jousehi pannabei ahibouve” ati bangchun, inatoh ilungel atamjo pihi hoitah a inungvet leh malou thu jengbou ahingut setne.
