Kukiten Lenkhom bol nom isahhou hi nam nemna khat ahiding ginchat aume. Lenkhom hoa hin phat akimang chavaiyin ahi. Christmas lai, Kumthah sung, Good Friday le Ester
Sunday dunga lenkhom kibol ho hi natong loute ihiu vetsahna ahi. Natoh gunchu hon hiche phat sung dunga lenkhom kibolji hohi pamai salheh unte.
Gol neiho gol to kivop hi hinkho chavai khat ahikit’e. Natoh khomna dinga gol nei, gol to kivop hileu hen pha ding ahin, eimite kivop hi thaset to kitho a kivop atamjo jin ahi. Gol to kivop hi atamjo din phat man chatvaina ahi. Hitobang hinkho hohin nam akalsang mosah a anemsah ahi.
Athu lhuhna kicheh lou, pannabeiya houlim khom jong hi nam nemna khat ahi. Eimite tamtah hi tohdoh ding seikhom um behseh louvin moh houlim khom'a, atamjo ahetchet lou sei ham, thusim lui panna beiya seikhom ham, kiseiphatna ham, apha chomlou ngen seikhom hi ihabol’uve.
Gollhang in'a um behsehlou, kholai leng leng jeng, anneh seh seh ain’a bol mai maiho jong hin nam asunemíun ahi. Namkhat chu nam lentah, nam hoitah ahina ding chun hicheho tobang hinkho ho hi abei angaiyin ahi.
6.2. Khosung Hinding Dan.
Eimite hi nam lentah hitheina ding chun khosung chendan jong semhoi angaiye. Nam len khat, jat thupi khat hina dingin khosung hindan semphat angaiye. Hiche nading chun noiya ho beh ahiloule aphajo cheh jong vet angaiye.
6.2.1 Chapang ho Hinkho Semtup Ding.
Nampi dinga khonunga phatna ding gelho chun khosunga chapang ho hinkho ahagelkhoh pen diu ahi. Tunia chapang hohi jing teng nu le pa hung hidiu ahi. Hijeh chun amaho chu tupet’a hi ahinkhou semhoi ngaiya ahi. Tupet’a chapang ho chu lekha simnom lou, natong nomlou, mithase le thu ngailou ngen hung hileu, minu mipa ahung hitenguva nam hiding dan chu ahoilou ding dan kihemasa jenge. Nam chavai hung hiding tina ahi. Tupetía chapang ho chu lekha sim’a kitet tho tho jeng ahiuva, gunchu je kihil them ngen ahiuva, houthua mikitah tah asodoh uva hinkho dihtah nei ngen ahiule khonunga amaho ahung let tengule nam khantouna le nam choisang hung hitei diu ahi.
Hitobang chu ahijeh in tupet'a chapang ho hi khonunga nampi lentah ho lamkai hung hithei dinga gel a khoukhah a sem angaiyin ahi. Khonunga lamkai hung hithei ding chapang ho chu mi no hat’a lekha sim hilou diu, acham’a sim tel kiboldoh gojing, mi sol louva lekha kisim jing mi ahi diuvin aphai. Amaho chu alet aneo, akum to kitoh a natohje hung kihil toupeh hidiu ahi. Sunday School le hou thua phatecha kikhoukhah mi ahiu angaiye. 6.2.2. Khangthah ho Lam jousea Kithem Chuhna Peh Ding.
Khangthah hohi nampi tinggu tobanga lah a lampi jousea semtup got tei ding ahi. Khangthah ho hin themjilna lam’a nam lentah tah ho aphah theina diuva hatah a tilkhouva, tosot’a M.A. Ph.D.sim tamtah semdoh got ding angaiye. Nam lhachomte jong chu M.A. First Class le Ph.D.sangtah tah a lolhinna nei tamtah aumteng natoh muthei taminte. Khangthah thil bolthei, lamkaiye them ho chu achechena a min amangcha theiye. Kuki Khangthah te chu hitobang tamtah neidohna dia kikhou khah angaiye. Hitobang khangthah tamtah semdoh theina dia chu atah tah a thodohna thei (Practical/training) phatah tah gonpeh angaiye.
6.2.3. Kho Len Dom Dom’a Chenkhom Ding.
Khoneova hin khantouna aum thei behseh poi. Kholen ho a hin khantouna lampi jouse aumtheiye. Hijeh chun ikhantou monau ajeh khat chu khoneocha cha a ichen cheh jeh u hinte.
Achutile khantou machalna ding a chu khoneo li le nga ho gopkhom’a kho len dom dom’a chen angaiye. Khokhat'a inko 20 ahiloule 30 ho bep umna ho kho nga kho gup ho chu gopkhom’a kholen sem angaiye. Tekah khat’in Kangpokpi komía Bongmol kho komía hin simkhamlou khoneo cha cha tamtah aum'uve. Solam'a ni le thum aumun, lhum lam’a khat le ni aum in, lhang lam’a khat le ni aumíe. Hiche ho jouse chu Bongmol’a chengkhom leu khantouna lampi umjepinte. Chutile ama gam cheh chu gal'a abol theiyu jong ahi. Hitobangma chun Saikul gamkaiya um Somphung vel'a um kho gup neocha cha ho khu Somphunga cheng khom’ule ama gam cheh louva akibol theiyu ahi. Molkon vel’a kholi tobang Molkon a chengkhom thei ahiuve. Khamenloh hom'a khose se khokhat sothei ahi. Hitia chu amun mun’a khoneo ho jouse chenkhom sah angaiye.
banjom nalaiding...
