Politics lah-lah a Kikhelna dei (revolutionary)Thingnoi politics hi asang pen ahi akitin eiho thingnoi boldan leh umdan pi hi ivet leh tup le doi kichehtah lungel (ideology) jong
umbehseh lou aphat dungjuija thilbol leh umdi ti hi hoitah in akimutai. Lamkai masa aumtalou ho, amin gah phah din Pu Demkhoseh Gangte,Pu Nehlun Kipgen, Pu Thanglun Haokip, adang dang ho vang chu gam le nam pohnatna nei mong monga nampi minna thingnoimi anabol u ahin, tu langa vang hi ivetleh eima le insungmi ham phung ngailut na a Nampi min hi kisel na a nei ja Thingnoi ibol u hitam ti aki lang jin nampi chunga pohnatna nei dihtah ho din vang lhaset umleu ahi tai. Kukiland, Zalengam, Zogam, Kukigam thakhat ahin tup le doi kichehtah nei ihiuleh ibolla pan ilah khom theilou uva thakhatna/ min khatna idin khom theilou u ham! Sorkar in kihou pi kham jong eisah pou vin, kihoupi di eiti tahbah jongleu Kuki pumpi problem sei na dia chu akoi group pen hi aki houpi di hitam? Chu che malah Army/ AR commandant ham Post commander khat ham in anop phat leh abilla matna tato-a anop phat leh medal/ promotion del na a I thingnoi hou hi inei u ahi tai. Gamtum del na dia chu gal sat di ahin gal isat masang \ un/kinah kitha to umloulai jin hemkham (SoO) ibol taovin, ina bol u ahitah jongleh Manipur gamgi ke le kelou di thu hi 'clause' khat nah ana jao da leh thingnoi politics chu umthei di ahin tua hi ìadministrative unit within Manipur stateî ti delna tobanga soi ikai u ahitan I dinmun u ikisem phat lou uleh I thal choi houva himidang sat louva eiho le eiho ihung kitha chai gam diu ahi.
Tupet tah a hi sorkar in Naga ho kihoupi di, meilhei ho kaap di eimiho hi camp ma hentup tah di di ti ahin ijo amasateni alonaje khat ahin het teng uleh eiho chaidoh di ahinti nikho chu geldoh masat na, iti pan ilah khom diu ham ti gel phat ahi. MLA, MDC. MP election teng idei khat sotdoh ding, inchen kisem ding, kho le veng tundoh ding, gari a lhaile ding ti ho nampi dinmun sanga ikhohsah joh u ahi poupou leh nampi iman thah diu a paap chu apo ding hon apoh tei ding ahi. Alangkhatna, nampi ding gel khoh mong monga thildih leh thilpa bolla hahsatna thoh ho chu Pathen leh mipi'n jong ahet ahin ni khat leh tohga pha aneh tei diu ahi. Eimi thingnoi chung changa mi dang(kol ho) lekha jih isim doh teng jachat leh thangtom aum ji lheh e, vet sah nan, Pu E.N. Ram Mohan in - Insurgent Frontiers: essays from the troubled North-east, lekhabu ajih na ah 'Kuki thingnoi hon a nampi u venbit nadia ana kiphut u ahin, KNO hon jong Zalengam anatiu vin tun adon tapouve, tua Kuki thingnoi group tamtah hon thil ni bou abuoipiuve - hunam ma sumdon leh sum tampeh pen pen election na sot. Tah chapa, mihem khat ihileh ibolla hiti bepseuva mi nuisat leh noise a ki um di!
Kuki thingnoi ahung umtilla patnin faction/group anakipan paijengin kipum khat di min khat na kipoh ding akiti laichan in ipi ham ithoi leh akhoh cheh cheh e ti abang peh e. Organisation min thah thah tuni gei jin apung jing in hetjou jong ahitapoi. CKRF, KIA, KDF(Democratic) kiti ho ana kiphut in tun athitauve. Hinlah UPF leh KNO noija um thingnoi group agom in som ni deh chet ahi. Tun jong athah beh in UKLA(MC), UTLA, KRF kiti ho ahung kiphut doh nalai set kit ne. Ahileh Kuki thingnoi hi group atam laichanna Kuki thingnoi ho ahilouleh KNO leh UPF chu hatna sorkar ahilouleh nam dang hon ahin jaa chuom diu vem ? Hinai sailouve!! Mi noise cheh bep ihiu ahi. A phung a phunga thingnoi politics bol ngai naisailou ahi. Iki tolou nao, imitmo nao kihet na lentah ahibouve. Kum phabep masanga chu MLA election jou leh thingnoi group thah hung um ji ham kiti tua vang election nga doh khel angai tapoi.MLA kai nading mai mai ja thingnoi bol angaipoi. Ibol tah u jong leh Kuki min in bol daleu hen dei aumlheh-e. UP, Bihar, etc. hoa ìorganised gangî dan joh in bol leu hen Kuki min ahilouleh nampi minse pontin nampi paap ipoh ujong leh lhom dom inte. Thingnoi lamkai hon jong phung le chang ve louva nampi ngailu leh manthei ho election na aki kum tah ujong leh son ji leu group thah thah kisem ponte.Chuleh thingnoi hon a min u banna Kuki ijih sang uva khu iphung min jih a pha ahi, iphung min kisan ijih ngam louleh seidi umlou ahi. Tekah nan, John Kuki, James Kuki, TH Kuki, etc. jih sanga Kuki khela ama ama phung min akisut diuva dei umtah ahi. Kuki min apohjoulou diu ahi, min lentah, nampi min ahibouve.
Akisei ho hi demna leh vetda na jeh ahipon ngailut leh pohnat jeh a idihlounao ikisuhdihdiu dei sah jeh ahi. Ajeh chu a problem isei naova chu a solution um ahi.
