Secular Progressive Front (SPF) hohin poll phase ni - Lhaphul nisim 26 leh Lhadou nisim 2 chuleh polling station themkhatna re-poll kibolna a seat 144 lah in seat 107 amu uvin ahi. Congress party hi District Council constituencies 106 a akaidoh un chuleh vai ahopkhompi CPI hin seat khat amun ahi. Congress leh CPIhin Lhaphul nisim 26 leh Lhadou nisim 2 a District Council election chu achom cheh a atethon ahi.
Ahunglut thah Trinamool Congress hin Churachandpur district in seat khat amun ahi. NCP hohin seat khatbou amujeh uhin akinep naotoh abangpoi. Hetding khatchu, District Council constituencies 6 ahin koiman nomination abolpon chuleh, constituency 4 ahin Naga civil organization hon boycott aboljeh un candidate hohi ahai taove. Senapati, Ukhrul leh Tamenglong district a candidate mi 30 tobanghi achennao in akino khummin ahi.
Leisemni a kipan vote simna chu janhi chun akichaijin ahi. Senapati, Tamenglong, Chandel leh Ukhrul district a vote simna chu Imphal West DC office complex a akibollin, Churachandpur leh Sadar Hills district a vote simna chu Churachandpur district headquarter leh Kangpokpi ADC hall munin akibolle. Vote simna akichai phatnin district jouse a seat 24 cheh a akaidoh hochu state election commission nin janhi chun phondohna aneije.
Ukhrul district a District Council seat 24 lah a seat 20 uncontest pumchun seat 21 chu Congress in amun, NCP in seat khat amun chuleh seat nichu a candidate tenin tetlouna dinga amin akilahdoh hon ahi. Chandel district a chun Congress in seat 19 amun adang 5 a chun Independent ho akaidoh taove. Tamenglong district in seat 12 uncontest a kaidoh pumchun Congress in seat 19 amun, adang sechu Independent ho achang taove.
Senapati district a Congress in seat 12 uncontest a kaidoh pumchun Congress in seat 14 amun chuleh Independent hon seat ni amun ahi. Hetdinga pha khatchu, district council constituency gup a hin koimachan nomination abolloujeh in seat 8 hi aongin aummin chuleh constituency 2 ahin candidate tenin tetlouna dingin amin akilahdoh lhone.
Kuki ho tamna District Council teni ñ Churachandpur leh Senapati district noija um Sadar Hills a jong chun Congress ahatnin ahi. Churachandpur district achun seat 24 lah a Congress hin seat 18 amun, Congress in vai ahomkhompi CPI chun seat khat amun, Trinamool Congress injong seat khat amun ahi. Congress in seat 18 amulah a hin seat 12 hi uncontest a kaidoh ahi. Sadar Hills a chun Congress hin seat 12 uncontest a kaidoh pumchun seat 17 amun chuleh Independent hin seat 7 amun ahi.
Census 2010 suhfelna dinga Committee kiphut dohta
Imphal, Lhadou 23: Vahchanni nilhah lamchun, Churachandpur, Chandel, Thoubal leh Ukhrul district a
census 2010 kibolna a akisuhlou themkhat aumjeh in Chief Minister, O. IbobiSingh chairman hinan state
cabinet nin chief secretary, D.S. Poonia lamkaina noijaCommittee phudoh dingin aphatsah taove. Committee hi akisuhlou boinaho asuhtoh a lunglhai umtah a minlah nahi achelhah theina dinga lamkai pipuho masang’a report ahinpeh lutding ahi. Cabinet toukhomna jonghin ADC akaithah ho khutna thaneina pehdingdan asei khomun chuleh amanchah diuva sorkar gari pehdi jong aphatsah un ahi. Ahinlah, amaho thaneina noiya sum pehdoh dingdan vanghi cabinet atoukhomkit tengleh seidingin akoi taove.
State cabinet jonghin athisa Commando Lokhon chapa chu Manipur police a Assistant sub-inspector pehdingin pha asaovin, chuleh melhetlou hon athao Ahon Sarat insung mite kithopina dangka lakh khat peh a, achapa N. Rajiv chu Sub-Inspector pehdingin pha asaovin ahi. Melhet louho maman athao Rangneingam Kom, Khayom Primary School a Assistant teacher insung mite jongchu ex-gratia dangka lakh khat leh sorkar natoh pehdingin aphatsah un ahi.
Cabinet toukhomna hin Municipal Council, Community participation bill 2010 assembly kit tengleh pohdoh
dinga aphatsah ban uvah, Manipur Meitei Pangal Madrasa Institute ho semhoina dingin hitobang institute 30 lhendoh a amandiu computer leh adang dang dangka lakh 5 man pehdin jong pha asaove.
Longpi kho a AR hon solar light homdoh
Imphal, Lhadou 23: HQ IGAR(South) noiya um Col Ved Beniwal, Commandant 17 Assam Rifles, 10 Sector in Ukhrul District hopsung a um Longpi khoa cheng khut them (Craftsman) minthang Mr Machihan Sasa dingin Solar Light set khat ape uvin ahi. Mr Machihan Sasa hi gam (India) min in gam danga tichu International forums and Exhibitions ho a akhut thep naho ana vetsah ji in chuleh thinglhang miho din training ana bol peh in ahi. Amapa hi Assam Rifles hon jong akithopi jiu vin ahi.
Chukitle 23 Assam Rifles 10 Sector, HQ IGAR(South) hon tunin Asui Tangkhul School, YKPI a simlai
chapang ho din Free Medical camp khat abol uvin ahi.Unit Medical Officer leh paramedical staff hon
chapang 123 tobang ave uvin chuleh lou jong manbeiyin ahop peh uvin ahi.
Simlai chapang ho chu tahsan thendan, jalhanga theng tah a um ding chuleh kiven ding dan Medical officer hon aseipeh uvin ahi.Lhadou nisim 22 ni chun HQ IGAR(South) noiya 8 Assam Rifles, 26 Sector hon amin Paolenmung (26), S/o Mrs Chingnaining kiti Chandel district hopsung Teisaljang kho a cheng chu damdoi aphat cha a apeh jeh uvin adam doh tan ahi. Amapa chulou (medicine) aneh khel jeh in thiding dingmun aum pet a Singheu a posting 8 Assam Rifles ho koma ana kilhut ahi. Chuleh thilsoh dang khat kit a 28 Assam Rifles, 9 Sector HQ IGAR(South) honLhadou 22 nia nupi khat gul (snake) in ana chuh chu ajendam uvin ahi. Amanu chu amin Shashar Jan (32), Harobee Laradokhong, Lilong a cheng ahi.
Gari 247 Imphal khopi hung lhung ta
Imphal, Lhadou 23 : Petrol leh Gas jaona in thilpo gari 247 chu tunin NH-53 hopa in Imphal khopi
ahung lhung tan ahi, chuleh adang 218 tobang jong security escort ding ngah in Jiribam a aum in ahi. Chukit leh DGP akon thupeh dung juiyin Imphal West SDPO, M.Modhunimai le aloi hon Jiribam apat escort bol dingin tunin jan nidan 8 chun Imphal khopi dalhan ache tauve.
Melhet lou pasal 1 thisa a kimu
Imphal, Lhadou 23 : Tuni jingkah lam nidan 10:30 vel chun Nambul vadung Langthabal Mayai Leikai, Singjamei police station sunga melhet lou pasal khat athisa in akimuin ahi.
Thilong chu chele-vahle hon vadung a akilap (float) chu ana mu u ahi. Amapa hi kum 25 a aupa hi din tahsan aum e. Ama hin sangkhol choladum le akang pol kihal, rubberboot (kengkoh) leh plastic hand gloves (khut tom) in akivon e. Thilong chu RIMS morgue a aban hetbe thei nadin akikoi tai.
BJP in India gam muntinnah “Manipur Solidarity Day” mang u
Imphal, Lhadou 23: Vahchanni chun Bharatiya Janata Party (BJP) hin India gam muntinnah Manipur mitten state kipumkhatna dingleh akelouna dinga pan alahnao kapom uve ti vetsahnan ‘Manipur Solidarity Day’ amangun ahi. Lamkai ho, natongho leh adeisah hon 11 c.m. apat 3 c.n. geijin dharna abollun ahi. BJP party hin masanga alamkaipao Dr. Shyama Prashad Mukherjee thinikho hi India pumpi a ‘Manipur Solidarity Day’ tia mandingin aphongdoh un ahi.
BJP Manipur Pradesh jonghin Nitaypat Chuthek, Imphal a BJP office maija chun dharna abollun ahi.
State unit na BJP president Sh. Shantikumar ahoulimna a chun Centre a UPA sorkar’n Manipur boinaho
asuhlhap nomlouhi ademmin, Manipur miten nehding leh thil adang ngaichat ho aneitahlou vangun Centre hin agenthei mipiho ngaijang na dingin ima abolpoi, chuleh Manipur hi India sunga state khat ahin, Centre hin Jammu and Kashmir abolna tobanga abolla Manipur mite boina hi asuhlhap pehgot ding ahi, tin aseije.
Shantikumar jonghin tunia nikho kimanghi Manipur dinga suhmil theilou nikho hiding ahitai ajehchu, Manipur mite lainatpina jallin amasa pennin national political party khatnin India pumpin eimanpeh uve. BJP lamkai hohin mipite boinaho suhlhap pehding agelkhoh dannu avetsah e, tin aseije.Manipur mitten hichi nikho kimanghi nahsah louva akoilou diuvin aphai ajehchu, lhangphongtah a national party khatnin Manipur gam huhna dinga pan alahna amasapen ahi, tin party general secretary, Th. Shyamo in aseije. Ama jonghin Central sorkar hin lhani valjen economic blockade umleh Th. Muivah’nManipur ahungvilgot jeh a hahsatna kitoh hohi asuhlhap gotdi ahi tin aseije.
Book exhibition kihongdoh ta
Imphal, Lhadou 23: Manipur State Kala Akademi ho makaina noiya ni 5 sungse cheding “book exhibition” kiti chu Manipur State Art Gallery, Palace Compound, Imphal munah hondoh in aumtan ahi. Hiche hondohnakin hi Dr. R.K. Nimai Singh, commissioner art & culture chief Guest hinaleh Dr. N. Giridhari Singh, President Ranganathan Society for Book Culture, Library and Informatics Studies, N.E Chapter functional President hinaleh Dr. Khomdon, librarian Manipur University Library Guest of Honour hina noiya kingon um ahi. Mipihon lekha simna lunglutna anei uva thilphchom ahin sodoh thei nadiu lampang ah kisinsah theile hoilheh inte tin thuseina aneiyun ahi. Hiche tohgon hi nisim 27 chan chelha ding ahi.
