VL Ramhluna, OC Luangmual O/P, ASI Prem Nath, Vivakawn P/S, Probatory ASI Gnat Lalrinchhana leh Constable Chanchinliana ahiuvin ahi. Aizawl SP in department ho koma athu akholchil diuvin thupeh anei in ahi. Addl. SP Rodingliana Chawngthu chu athu kholchil dia mopoh na akipen chuleh Judicial/Magisterial Enquiry thupeh nahi Magistrate Lalngaihmawia Zote akon ahi.
Thulhut chun aseina a athipa (Lalpiangliana) hin Aizawl SP Lalbiakthanga Khiangte koma achesa Lhadou 17 nia chu atehpu (father in-law), MB Rai (74) chu Tanhril hamlet, Aizawl a kana that e ati. Athepmo na aphon jouvin Vaivakawn Police Sta- tion a achunga kinodoh ho mopoh na noiya ana kikoi ahi. Chujou achu Aizawl Central jail a Judicial Custody dinga ana kithot doh ahi. Tahsa damlou jeh in Lalpiangliana hi Aizawl Civil Hospital a ana kijen ahin hiche a kona chu tuni jingkah lama athisa a um ahi. Lalpiangliana in Aizawl Civil Hospital a akijen sung chun a inko te koma police hon eisu genthei un voh kitin eivo uve ati.
Ama thi jeh hin Aizawl khopi asou sang in mipi tamtah police department a achevin ahi. Amasa pen in thilong leh mipi ho chu Vaivakawn police station a ache nauva lut thei lou in policemen hon alam tin uvin ahi.
National
Galguh bol hon Kanishka apokeh sah chu umchan phalou pen tah ahi : PM
New Delhi, Lhadou 23 : 1985 kuma Air India huikong Kanishka galguh bol hon Irish gama apokeh sah chu umchan hoilou tah ahi tin Prime minister Manmohan Singh in aseiye. Hitobang thilsoh chu leiset chunga a gim neipen khat ahi chuleh mihem lunggel naasatah in atongkha e ati. Hiche a toset a thiho insung mite jouse kangailut na kape e tin toset kitona kum 25 anniversary kiman na a aseiyin ahi.
Kal kichai lam teng prime minister pa hi G-20 kikhopna a Canada gam che ding ahi. Aman aseina a hitobang cha valna hi leiset chunga hou khat cha in jong apom lou thil ahi ati Tunia hitobang kin kiman na a galguh bol ho suhmang nadia athah beh a a pan ilah cheh diuvin katem uve tin Singh in aseiye. Air India Kanishka huikong chu Lhadou 23, 1985 kuma chu Atlantic twipi chunga bomb a apokeh sah u ahin chuleh asunga tou mi 329 ho abon un athisoh hel un ahi.
Saudi gama mithat khat cross a kikhen beh
Riyadh, Lhadou : Saudi Arabia in tuni chun mithat a kingoh mi 2 chu cross a khai lih in aum lhon in ahi. Mi khat pa hi Yamini nam mi ahin ama hin agam mi ma ma khat atha jeh in cross a ana khen beh un ahi. Amapa hi amin Shaaban al Nasheri akiti in chuleh akaplih pa chu Dhayeh al-Manbahi ahi tin Inetrior Ministry thuphon chun aseiye. Nasheri hin Manbahi chanu jong asuh minset jouva ana kaplih ahi akiti.
Amapa thi dinga gotna akipeh to lhon in Jazan muna cross in ana kikhen beh in ahi. Alangkhatna Saudi mi Mohammed al-Zahrani in aloipa Said al-Zahrani chu gam leiset thua kiboina anei lhon jeh in ana kaplih in ahi. Hiche jeh chun Mohammed al-Zahrani chu alol akitan peh in ahi. Tukum sung Saudi gama alol kitan amapa puma hi mi 15 ahitai. 2009 kum chun mi 67 alhingin chuleh 2008 kum in 102 ana kithat in ahi. Saudi Arabia gama hi Islamic law khoutah akijui na mun khat ahin hijeh a chu koi hileh numei suse, tolthah, manchah gu, lou le ai khamna a kivei ho akimat doh a ahileh thina chan gotna chang dia dan um ahi.
