Dimapur, Lhaphul 20(NNN): Nationalist Socialist Council Nagalim ( Khaplang) in tuchunga Manipur gamsung boina thua Naga Milham lom hon NSCN-IM thusei bou ajui uva chuleh Manipur gama economic blockade jeha hahsatna tampitah alhuntah jeha NSCN(K) in hiche Naga lom ho taimona ana nei chu, Vanghomni nisim 20 chun NSCN(IM) in NSCN(K) thuso donbutna ana neiyin ahi. NSCN(IM) thuso in hitin ana seiyin ahi, “NSCN(K) hon abol jouse hi Indian Intelligence agencies Intelligence Bureau) te thakhela abol uva ahi. Hijehin, NSCN(K) in athusei hohi tahsan louding ahi. NSCN(K) hi Naga mite kitohlou nadia natong ahi tin jong thulhutna NSCN(IM) in ana nei pai paiyin ahi.Tunia hi, Naga ho hesoh gentheina thohna jeha Naga ho jousen panlah khomding tia kilolna kinei ahi. Naga ho jouse pumkhata aum theinadia mijousen
apankhom petchaova, hitia NSCN(K) in adonlou behía thuso abol hi , India sorkar toh kithoa NSCN(K) in Naga hohi alhep lhah ding agot ahi.

Manipur sorkar in Naga te lamkai leh alubuh pen Pu Th.Muivah ajeh beia apen namun Somdal Kho avil
sahlou hin avetsah chu ahileh, Meilhei hon Naga te kitohtahía aum diu adeilou jeh uh ahi. Japi mudinga,
Naga mi hon Manipur sunga apu apa teu gamsunga jong adei banguva alhahthei lou uhleh, Naga hodingin
Manipur sorkarin thilpha chom nungsanga abol pehdiu kitihi ki chapang lhepna ahi bouve. Manipur sorkar
hin leiset chunga alhang piakivai pohna dan ( Naga te historical leh Political Rights chuleh Human Rights),
jouse hi apaltan ahi. Naga ho khankho ding gel jouse tunia ahi apan khomdiu hi thilkhoh pentah ahi tin jong
NSCN(IM) thuso in ana phongdohin ahi. Naga te khankho sumathah dia India sorkar hi NSCN(K) lubuh Pu Isak Chishi Swu hi kitho jing uh ah tin jong thusona NSCN(IM) in anei paiyin ahi.

Hetding khat chu ahileh, Vahchani nisim 19 nia chu NSCN-K (GPRN/NSCN) lamkai Pu Kughalu Molatonu in NSCN(IM) thuchingpu Thuingaleng Muivah nasataha themmo ana chan ahi. Pu Kughalu Molatonu hin mitcholom tobanga Naga Milhamlom jousen Thuingaleng Muivah nui ajui jehuva Naga Milhamlom ho thepmo ana chan ahi. Pu Kughalu Molatonu in Pu Thuingaleng Muivah hi tolthat ahi jeh’a Naga hoa dia phatchomna ding imacha aboldoh lou ahi ana tin ahi. Pu Thuingaleng Muivah in Somdal Kho vilding ana ti jong hi, athanop jeh ahipoi. Thanop malah, milham ho hinkho ichan kalah bethei ding ham tia lunggel
neiya natong ahi ati. Pu Thuingaleng Muivah kin ahileh, jat kah chuleh Nam kah a boina leh sosalna ding
hol ahi. Ama jeha Naga te keu hilou, Manipur gamsung ahi thinglhang mi jousen hesoh genthei atou ahi tai. Manipur thinglhang mite damna dia Pu Thuingaleng Muivah hi thip behcha a aum angaiyin ahi tin jong Pu Molatonu in alunggel thuso mite henga sei phongna aneiyin ahi. Pu Molatonu in jong tuleh tuhin Naga Reconciliation (FNR) lamkaina noija Indo- Naga peace process kihoulimna jong hi ichan hama machalna aneija ahi jehin, hitia Pu Muivah aum jeng hi pilhinna aneilou jeh ahi tin jong a taimo na thu jong aseiyin ahi. Pu Thuingaleng Muivah hin Naga politics hi imacha ahetlou keu hilou, amahi Meilhei tephatchom nadia kipei ahi tinjong aseiyin ahi.