Imphal, Lhaphul 13 : National Highway 39 Imphal - Moreh lampi a lhai gari neo 12 NSCN-IM thingnoimi kahi ti hon apuimang uva thil kipo ho leh anei-agou u achom peh jeh un Imphal leh Moreh kikah a lhai gari jouse tunia kipat alhai tapouvin ahi. Thulhut kimu dungjuiyin gari 12 ho chu Sumo 5 leh Van 7 ahin Moreh apat Imphal jon a ahung nauva Molnoi MR post kom Thamnapokpi muna nilhah 7:10 pm vela chu ana lamtin uva apuimang u ahi akiti. Manchah choi melhet lou ho chun gari hochu Komlathabi mun a apui un asunga touho leh drivers ho mobile phone achom peh un passenger phabep in mobile phone akisel jeh un avo kit un ahi. Phat chomkhat jouvin gari hochu Chandel lampi a Liwa Sarei langa apui un passenger ho aum den sah un gari ho leh thil ho chu Chandel lang munthip a apui un thil kipo hochu ala lha un ahi.
Thil ho akho lhah jou un drivers hohenga lunghang hih un nangho chunga thilsoh hi thinglhang mite an ngolthei ahilou jeh a kabol u ahibouve atiuve. Chuleh masang jep a Chandel a dinga thil kipo Kakching leh Wabagai muna kiso lha jong alunglhai pouve ati.
Tupet a Manipur boina jeh a drivers ho chu hiche lampi a lhai lou diuvin jong gihna anei un ijem tia security escort puma lhai aum jong leh achunga gotna kipe ding ahi atiuve. Thulhut kimu in aseibe na a MR post komcha ahivangin security forces hochu imacha abol pouve ajeh chu security forces umho chu gari ho akon taxes lading bouva um ahiuve ati. Hiche taxes kilah jeh a hi Moreh a kon thil hung lut ho aman sang thei ahi akiti e.
NH-39 Imphal – Moreh lampi a gari kipuimang
