Shillong, Lhaphul 26 : Meghalaya state a Nepali ho chunga boina aume tia thuso phabep a kisei chu Meghalaya a um Gorkha Welfare Centre leh Khasi Students' Union chuleh Megahalay sorkar in nasatah in demna anei un ahi. Kathmandu a um thuso in aseina a Meghalaya a um Nepali mi 17 miphalou hon athat e
chuleh mi sang a sim akino mange tia kisei chu adih ahipoi tin Meghalaya sorkar in aseiye.
Achesa Lhaphul 14 nia chu Khasi ho leh Nepali ho kinahna jeh in Assam police hon thal anakap un ahileh mi 4 anathi in ahi. Hiche boina mun hi Assam le Meghalaya gamgi Langpih kho ahin Guwahati apat 60 kms a sao
ahin Shillong akon 140 kms a gamla ahi. Hiche mun hi Assam le Meghalaya kichu jing na mun khat ahi. Het ding khat chu Lhamul 2008 nia Assam sorkar in health centre khat sah na dinga foundation song phuna anei a kipat boina hi ana um jng ahi.
Chief minister Mukul Sangma in aseina a Nepali 1 vang athi thu kahe in hinla mi 17 athi e kiti chu jou thu ahibouve ati. Khasi le Jaintia hon Nepali ho nodoh na dinga phat anatep peh nau thu a Sangma in koiman complain ahung bol lou leh iti kahet ding ham ati. Meghalaya Director General of Police SB Kakati in aseina a kum 70 a upa khat vang ahing changin meiya akihal lih in hinla mi 17 akithat e kiti vang kahepoi. Hiche thu hi mi kon khat lunggel dihlou seiphongna a kimang ahi ati. Alangkhatna Khasi Students' Union (KSU) president Samuel B Jyrwa in Assam police hon Khasi milham ho chunga thal alha jeh a kiphinna kinei ahi ati. Aman aseibe na a sorkar henga gamgi thu seitoh na aum loi nadinga ngehna kinei ahin hitobang thuso dihlou chu phamo kasa lheh e ati. Achaina a KSU supremo in Nepali ho hi foreigner ahiuvin hijeh achu North East Students' Organisation in Indo-Nepal Friendship Treaty hi northeastern gam ho a che sah lou dinga ngehna kinei ahi ati.
Nepalese ho chunga boina aume kiti chu Meghalaya in pomlou
