~ Rev. N. Lhungdim
Kukite jong tukhang hin Bible/Theological De gree nei ahung tamjeng tan, machal na khat vang ilhung taove. Ajeh chu eima ho tah in a Simna ding Institution/College khat ibol doh thei jeh jong hi khat ahi. Ahin lah ka ven ahi le Bible sim atam cheh cheh le Pathen thu jong hi isuh tam jeng u hi tam? Bible simsang hon agel khoh ding u angaiye.

B.Th/ B.L/M.Th/D.Th-Doctorate ho hi mihem vet le Pathen vet dinga anem asang aumpon-thakhat ahi. Degree dang ho chu hinkho vetjui thei ahi ano hoi jep ding, mi seiset mai mai hi lou ding, jatah le Pathen a
akitah nao chu ima lam jousea muthei hi jing ding chu adoi ahi. Kaven, ahi le Degree hahsatah a aga lah u hi bai lam tah a apoh bang un kamun pha kasapoi. Hahsa tah a kilam doh chu gih tah le lultah a apoh ding uva dei um ahi. Hichu mihem dei jong ahin Pathen dei jong hi ding ahi. Thepna chihna hi mihem in ihol uva Pathen in eipeh u ahi jeh a Pathen jana nei tah a kipoh angaiye. Ka ven ahi le kon khat hin Kuwa le Jarda neh theina bep a Degree agalah un ka mun lunglhai aum hih hele. Degree nei jeh a 100% min na tahsan dingin kigel
dan Pastor hi jeh a 100% min na tahsan ding in kigeldan. Tahsan lhing tah na hi na dinga Neh le don na kitup angaiye.

Neh le don kitup lou chu mikitup lou ahin Bible/Theology Degree nei jong le 50% bou mi tahsan akipoh bep ding ahi. Pastorate a Pastor ho jong Lamkai ahi jeh uva koiman asei nom lou ahin -Neh le don a HUSAN akija jinge. Pathen a dinga hinkho theng dinga kipe doh ta a ahi vanga atheng lou HUSAN ki jajing thei hohi mivangpha ahi pouvin mivang se ahiuve. Chapang thusei akibang in ajeh chu chapang uma i-um jeh u ahi.

Mihem vang koima achamkim le alhing kei um pinnate ahinlah Neh le don bep a midang simmo le taimo chang thei hohi aphaloupen ahi Pastor jeh a Degree jeh a min na tahsan na chu 50 % bep hi ding ahin Neh le don thengsel na hi teng le min na tahsan na chu 100% hi ding ahi. Hiche jeh a tukhanga Houbung lhacha na tong hohi aman akihet theilou abah tahjong le ajite achate beh in na seipeh chehding un temna ahi. Koiman vang na thil neh jeh Kuwa le Khainee jeh in ka tahsanpoi vang natilomponte ahin la mihem khat chu midang khat in alungthim’a agelbeh na chu akamchanga aseisanga giljo ahi. Hiche jeh a chu koi Houbung kitipon Kuki Houbung ho lah a lhacha jouse Pastor hihen mihil College a Lecturer ho hijong le na toh chu atheng dinmun a um ihicheh uve.

Kiseitheng hih un na kiseitheng chan a nangma sapset kisamkhum na hi ding ahi. Pathen in atheng dinga na gon ahi tan atheng dinmun chu na kigel ding chu nangkin ahi.

Hiche hi mimal kigotna ahipon, Houbung lhacha chu Houbung athen banga ama jong thenna hinkho anei ding chu adoi ahin anei lou ium jeh uva hung kisei doh ahi. M.Th. Double degree nei in lang Doctrate Double Degree nei jong le chun na lolhom chu na tuhtang lou le seiset thei taimo thei dinmun na hi jing ding ahi. Min eiseise jong le kei vang ka lolhom hi ka thi pi ding ahi na ti tei teile vang nang thu ahi jenge.

Hiche jeh a chu tukhang hin Degree hoitahtah nei tam in ahin tahsan thei alhom e kiti thumal hi anung gin kit louna dinga keima jong Pakai lhacha lah a alhasampen hi jong le ka hin sephong ahi. Christian lamkai dinmun hi hetgilna le sei themna seh in akisimpon amavang hinkho a natoh le chonna joh ahi.

Neh le dona ching thei ute.

The writter is the Secretary  of Literature Kuki Christian Church Imphal, Manipur