Imphal, Lhaphul.19: Manipur gamsung hahsat najeh’ a suhlhap natei ding ngaito najalía Union Home
secretary GK Pillai chu ahung lhungding Lhaphul 21 le anivei channa hung kholjin dinga kigong hinama jongle Tulah sehin dinmun aphajep in aum tan ahi.


Mun phabep holah’n kimanchah nading thilkeu lhasam lheh jongle theikham khamin mipin thilman hahsa nama Jongle kitou deltheina lunggel neiyin akalsong jingun ahi. Loule ai chule anchang ho niseh in huikong mangchan pohlut in aumjing nalai in ahi ti thulhut akimun ahi. Phat chomkhat sungsea hitia hi thil poimo tah ho kipolut ding ahi nalaiyin ahi.

Manipur gamsung ahi 6th Pay Commission chungchang thua achesa Tolbol 16 nikhoa patsa state sorkar natonghon kiphinna apat utoh kithoa tuchung Th. Muivah hungding jehía hichan a hi mipin genthei
athoh lo ahi.

Ahivangin lha 4 sungse kiphinna ana chepi chu Lhaphul nisim 19 nikhon Joint Administrative Council(JAC)
kiti kipun khomna khat All Manipur Trade Union Council (AMTUC) le All Manipur Government Employee Organisation (AMGEO) tia state sorkar natonghon aphudoh uchu kihou chamna khat asodoh jouvin kinop tona soi akai tauvin ahi. Hiche masang injong Lhaphul 15 nikhoa chu Manipur Secretariat a natonghon masang banga Anatoh namun akijot gam u ana hitai.

Hitobang thilpha sorkar vaihomhon ahin seiphong uhi athu keu hilouvin atah tah in aboldiu akiseilhah hohi bol joleu japi lunglhai nachang jodiu ahi ti lunggel akimun ahi. Hiche chungchon chun thilpo gari jatchom chom 176 jen kimanchah nadi thil poimo ho poding in Security venbit nanoiyin National Highway-53 chu ajon tauvin ahi. Hiho lahchun Truck 138 ahin, oil tanker 28 chule adang thilpo gari le inter-state bus 2, gari
dang 8 jong thilpo thei achen ahi.

Alangkhat ah National Highway-53 muna thilpo gari kitang denho jong hung kilhutvah dingu ahitai tin Minister ho akonin thuphon akimun ahi. Muntinna Kipunkhom na jatchom chom honjong hitobanga
kiphinna anei jeh uva japin genthei athoh jal in blockade hi alahdoh lou diuvin jong temna anei uvin ahi.