Lekhasim leh college degree mu avaigei tih aum poi ti hi kum 94 a the nupi Hazel Soares in atahlang e.

Hazel Soares in a graduate degree chu student 500 vel toh Mills College degree pehdohna (commencement
ceremony) nikho May 15 a chu ana sanu ahi. Mills College hi Oakland (US) a um numeiho dia “coed graduate programs” themjilna liberal arts college ahi. Soares in upat nunga college degree amuna chunga, ‘Boi tah hinkho kimang ahi jeh in phat sot thim tah ka salut e. Tun ka molso tan, ka kipah lheh e’, ati. Soares hin tun cha gup leh tute leh tuson 40 anei tan, ama hi leiset pumpia ani channa a college graduate teh pen hi dinga tahsan ahi.

Achesa 2007 kum chun Kansas a um Nola Ochs in kum 95 alhinin Fort Hays State University ah graduate
ana hi tan ahi. Amin hi leiset a graduate teh pen tia Guinness Book of World Records a kijih lut ana hi
tai. Graduate ahi chungchona Nola Ochs, tua kum 98 hita, hin Fort Hays State University ma ma a liberal
studies asim chai toh kilhonin achesa Misemni (Saturday) chun master degree jong amu kit tan ahi. Kum 2020 teng United States hi college degree mu tamna pen gam hisahna ding Obama government in tohgon anei dungjuiin kum 90 leh 99 kikah miho (nonagenarians) hi lekhasim theina chance kipe ahi. Hiche tohgon apilhinna hi tun ateh kum 90 leh 99 kikah hon college degree amu uva kona hi muthei in aumin ahi.

1915 kuma Richmond (California) muna peng, Hazel Soares in alolhinna chunga aseina achun, 1932
kuma Roosevelt High School, Oakland a alekhasim ana chai chai chun college jop pai ding atha ana nomin, ahinla chu phatlai chu Great Depression ana um lai chu ahi tin alhasetna thu asei in ahi.

‘Kithopina umlouva chu phatlai a college kai chu ahi theilou thil ana hiín, ahin keiman lekhasim thanopna
chu kana nei jing e’, tin Soares in aseiin ahi.

Soares hin ji nivei ana nei in, chuleh cha gup ana vahkhang in ahi. College a lekhasim banjom ding tia akigellhuh masang chun Soares hi nurse leh event organizer khat in na ana tong e. Kum 85 ahi chun Chabot College, Hayward a course kum 6 ana simin, chuleh course achai toh kilhon in 2007 kuma chu Mills College
ah amin ana khumin ahi.

‘Kanu in teh nunga hitobang pachanna ahin nei hi kidang kasauvin, kipa jong kakipapi lheh uve. Hiche a
kolna kihilthei khat chu lekhasimna din koima avaigei aum poi’, tin Soares chate lah a alhum pen Regina Hungerford in aseiin ahi.

Gansemni degree pehdohna kin a chun keynote speech pe-a House Speaker Nancy Pelosi in atumbeh in Hazel Soares akipapi thu jong asei in ahi. Chu keu hilouvin, insungmi 40 val hung khomho leh a class chanpihon jong Soares chu akipapi lheh e. Tun alungtup pi pen college degree amu ahi tan, ahin art history a degree
mua Soares hin kichol ding ti lunggel anei nai poi. San Francisco Bay area museum a professor noi chet, docent khat a na toh ding lunggel anei nalai in ahi.

Soares in adamsotna chunga atahsan dan hitin gei dam lhung hi insunga koima aum pon chuleh ka damtheina ajeh jong kahe poi. Ahin, anche tam tah tah ka neh akon hinte ti tahsan aum e’. Tuchanin Soares hin gari atol nalai in, chuleh atahsa dinmun hetna dingin kum thum sehleh doctor akivetsah ji in ahi. ‘Lou ka ne kha poi’, tin jong Soares in asei e.

Ama akona midang hon jong college lekhasim agei tih aum poi ti ahin geldoh diu Soares in atahsan thu aseiin ahi. Soares chun, ‘College a lekha athah a sim ding ahitheilouna thu aum poi. Mi abang khat in ka geisang tai ahilouleh ka ong poi tin ahai ji tauvin, ahin college kai anop dan ahetlou mai theiu ahiî, tin jong aseiin ahi.