Thulai
Kukite hi Pile-Pute khang’a pat kivaipohna kituptah le Nampi jemho lhingset’a neisa, nam khat ahi. 1770s a patna Pupa-gam lahpihna ding’a Sapkangte tohgon hungche lhajing chu Kuki Nampi’n kitoh tah in vannoi het in kum thum (1917-1919) anakiting in ahi. Vannoi Galpi Nina (Second World War) laiyin jong Pupa-gam’a konna Sapkangte nodohna ding in Indian National Army (INA) min in India le Japan toh ana kipang khom kite. Hinla India, Burma le Pakistan (tua Bangladesh ) in Zalenna ahinmu’u chun Kukite Pupa-gam chu hopthum in ahin homkhan taovin ahileh kondohna le ngaina kibang, pao lam’a kihoumat thei sohkei Kukite chu asukhan taove. Hijongleh Chung Pathen sem dungjuiya thisan khat le chikhat-nam khat hina vang asumang jou deh pouve. Hijeh’a hi min luto khat neisa Kukite kipumkhat kitna, Pupa-gam kiledoh sah kit’a, Nampi jemho choisang’a, phung le chang, chi-le-nam datneilou’a thudih le chamdella kivaihom kitna ding’a Kuki Nampi’n kitoh tah’a Kuki Inpi hi June 29, 1993 a Kuki Inn, Imphal’a kichohing’a ahi.

Bung 1: Kuki Inpi

1. Kuki Inpi hi Kuki Nampi (Aimol a pat Zou chan) kijopmatna, Kukite chenna gam jouse hopsoh kivaipohna sangpen hiding ahi. Tu le khonung’a Kuki Nampi dinmun ding geltoh le seitoh’a pang ding, Nampi Dinmun toh kisaiya thilsoh ho chung’a Nampi min leh thalheng’a thuseina le natohna aneiding, Kuki Inpi hetpihna le phalna beiya koiman Nampi thalheng’a Nampi Dinmun thu aseithei lou ding ahi.
2. Kuki Inpi hi Nampi ding’a thutanna sangpen hiding ahi. Nampi sung’a thuneo hihen thulen hijong leh government court’a kihehto louva, Pupa chonna le ngaichat dungjuiya Kuki Inpi’n asemtoh dan ho noiya seitoh ding, chule Nam dang le government toh kikah’a thusoh hijong leh Nampi min leh thalheng’a thuseina le thutanna aneiding ahi.
3. Kuki Inpi Munpi (Headquarter) hi tu-le-tua Kuki tribe ho atamjo chenna le mihemjat tamna pen Manipur a umding ahi. Government kivaihomna gamkai dungjuiya (state level) Kuki Inpi Manipur, Kuki Inpi Assam, Kuki Inpi, Nagaland le adang dang hijong leh atum’a umtalouva Kuki Inpi’a kivaipoh soh keiding ahi. Mun chom chom’a atum’a Haosa min’a kiloikhomna ho (Chiefs’ Associations) jong umlouva khosung’a pat Nampi geiya Kuki Inpi min leh vaipohna noiya umsoh kei ding ahi.


4. Kuki Inpi noiya Lhang Inpi kivaipohna hi gam let le neo, mol-le-lhang lupdan, mihem tam le lhom dungjuiya Pile-Pute khang’a patna Kukite kihetna le minthanna kho le lhang ho min’a Kuki Inpi’n agontoh ding ahi.
5. Kuki Inpi chena lhongpi toh kikal’a chon, natong le thunit lou aum leh Nampi noise’a kilading, chule hitobang miho chu Haosa Inpi’a pat Kuki Inpi hihen Kuki Inpi’n ahetpih le anoiya kikhailha kiloikhomna ho hijong leh kum som sung’a lamkaiya pang thei lou ding ahi.
6. Kuki Inpi lamkai ho hihen Kuki Inpi’n ahetpih leh anoiya kikhailha kiloikhomna jouse’a lamkai ho hijong leh koiman ajeh beiya lhang phong’a ademthei lou ding ahi. Koi hijong leh Inpi lamkai ho natoh le tohgon chung’a lunglhai louna nei jousen Inpi Bulpi-Thuching (Secretary General) kom’a ajeh kichentah’a apeh lutding, Inpi’n seiding’a kilom ahileh asei ding ahi. Hitobang’a chu Kuki Inpi’n ahetpih le anoiya um kiloikhomna ho natohna le tohgon chung chang’a lunglhai louna nei jousen lamkai khatpen kom’a jihtho’a apehlut ding, gelding’a kilom ahileh gelkhom’a seitoh tho ding ahi.
7. Kuki Inpi phalna le hetpihna umlou’a koiman Kuki Nampi min le hopma kiloikhomna asem/aphudoh thei lou ding ahi. Koi hijong leh Nampi khantouna ding’a Nampi min’a kiloikhomna phudohna ding’a lunggel le tohgon nei jousen Kuki Inpi ahetsah ding, phudoh ding’a kiphatsahna aum leh Inpi hetpih leh noiya um kiloikhomna khat’a kisim ding ahi.
8. Kuki Inpi hi ngaichat dungjuiya tua aum louna khopi ho-a phudoh thei hiding, akiphudoh leh Lhang khat’a kisim ding, Lhang Inpi khat mopohna le dinmun dungjuiya kivaihomna hiding ahi. Hiche kiphudohna ding’a hi aumna ding khopi sung’a Kuki min’a kiloikhomna jouse kiphatsahna banna Kuki Inpi hetpihna le phalna’a bou kiphutdoh thei ding ahi.
9. Kuki Inpi kivaipohna Dan Lhongpi hi Pile-Pute khang’a patna hung kichepi jing Haosa Inpi’a patna Nampi chan kijotmatna kivaipohna ahin, alhangpi’a tulai khang toh kitoh’a kivaihomna chehoina ding’a kigoltoh ahin, abon’a sutdoh soh thei jong ahipon, akisundoh lou ho jong ngaichat dungyuiya kichepi jing ding ahi.

Bung 2: Ponlap, Logo le Nampi La
1. Nampi Ponlap (flag): Nampi ponlap hi Kuki tribe jouse kihetna thei le hopthei a sem’a hilchen ding, jana sangtah peh ding, Kuki Inpi Inpipu in bou Gari maiya atah thei ding, chule Kuki Inpi thupeh dungjuiya Kuki Nampi nikho jouse’a inson hihen mimal hijong leh tundoh/tahdoh thei hiding ahi.
2. Logo: Aumsa velvet’a ahoichehna ding ahileh semphat ding ahi.
3. Nampi La (National Anthem). Aumsa velvet’a nganse thei ahileh nganse ding ahi.

Bung 3: Doi-le-Tup

1. Min-luto khat neisa Kukite kipumkhat jingna ding;
2. Inchen-khosah lam’a khantouna ding le machalna ding;
3. Tu le khonung’a Nampi Dinmun geltohna le seitohna ding;
4. Chile-Nam datneilou’a thudih’a kivaipohna ding;
5. Nampi Jemho chintup’a chule pupa-gam dopsang jing ding;

Bung 4: Dinmun Lhongpi
1. Kuki tribe ho kikah’a datnei louva chamdella chenkhomma chule thudih’a kivaipoh jing ding hi Kuki Inpi Dinmun Lhongpi ahi.

Bung 5: Haosa Inpi

1. Haosa Inpi hi Kukite chonna dolla thepman, haoman le chihman’a kitungdoh thei hilou, penguiya kilason kisubei theilou ahi jeh’a khosung’a kivaipohna le thutanna sangpen hiding ahi. Haosa Inpi kivaipohna lhongpi hi chepi jing ding, khang kikhel dungjuiya machalna ding le khantouna ding’a Haosa Inpi kivaihomna hi velvet jing’a chule khintoh jing ding ahi.
2. Haosa Inpi’a Inpipu chu Kho Haosa hiding ahi. Haosa Inpi’a Inpipu toh vaihom ding’a mipin Thuching (Secretary), Semang (Kho Thusei), Pachong (Defence & Home), Lhangsam (Publicity, Public Relations & External Affairs), Lom Upa, Lom Upanu (Youth Affairs) le adang tomun ho kinoptona dungjuiya ki-umsah jouse alhen diu ahi. Haosa Inpi’n khosung kivaihomna lhongpi avettup ding ahi. Pupa chonna ngai bang’a kho khat chu phung-le-chang khat haosatna le tamna ahi’a chule hiche khosung’a chu phung chom chang chom cheng aumleh Haosa Inpi vaihomna’a tohmun khat alo ding ahi.
3. Haosa Inpi’n kho-le-veng venbitna ding le machalna ding’a lunggel le tohgon anei ding, kho-le-veng khantouna ding’a government le adang dang’a konna phatchomna ho govt. scheme hihen adang ho hijong leh khomite toh kihoutoh’a langneina le sihneina neilou hella natohna anei ding ahi.
4. Haosan ama sum le pai lutna achohna kho jouse-a gam pumpi hi Haosa min’a umding, mipi thalheng’a gam chingtup hiding, khomite toh kinoptona beiya midang kom’a agam pumpi hihen agam beh hijongleh ajoh thei lou ding, koitobang ajoh aum leh Kuki Inpi’n pha asah dungjuiya Haosa Inpipu’a kon haisahna ding chan geiya thulhuhna anei thei ding ahi.
5. Khosung khantouna ding le khomite kiholtah’a achentheina diuva, Haosan gam let le neo dungjuiya Inmun-loumun ding inson’a Haosa Inpi hetpihna le namdetna noiya apehding ahi. Hiche inmun-loumun ho hi alet le aneo dungjuiya Haosa Inpin aman ding atep ding, koi hijong leh akitep pihna dungjuiya pejouse chu Haosa Inpi tailou koiman anung lahpih thei lou ding ahi. Hiche inmun-loumun hohi koitobang in government’a kon hihen adang dang’a kon hijong leh phatchomna ho mutheina ding’a ngaichatna anei leh Haosa Inpi’n akholtoh’a, chule phalna (No Objection certificate) apeh thei ding ahi.
6. Achung’a kisei Inmun-Loumun hohi koiman namdang kom’a ajoh thei lou ding ahi. Haosa Inpi hetpihna le phalna umlou’a koiman khochom mi kom’a jong ajoh thei lou ding, khochom mi koitobang achonom aum leh khosung’a hung chengmasa ding ahi.
7. Koi hijong leh Kho le veng sung’a Haosa Inpi thupeh kijom’a thumvei nitlou hihen Lhang le Kuki Inpi toh kisai’a toding le pehding dol hijong leh kijom’a kumni pejom lou aumleh inmun-loumun kipedohsa hohi Haosa Inpi’n anung lahpih thei ding ahi. Haosa Inpi’n ateppih phat sung’a pehding le toding dolho ahinsuhto jou leh inmun-loumun hi nung chan kit thei ding ahi. Koi hijong leh avella Haosa Inpi dan toh kitoh lou’a chonkit aum leh kinungpeh talou ding ahi. Gelphah louva hahsatna le gentheina ahilou leh dammo veiset jeh’a toding le pehding ho sutojou lou ho Haosa Inpi’n ngaidamna apeh thei hiding ahi.
8. Khotoh kisai’a sum-le-pai hihen tha-le-jung lutna ding le senna ding hijongleh Inpipu jengseh nganse louva, inson’a tanggol’a donding ahi. Koitobang nat le sat, genthei le hahsatna jeh’a toding le pehding dol pejou lou aumleh Haosa Inpi’n ngaidamna ahilou leh ngaijangna apeh/agel thei ding ahi.
9. Khopi sung hihen thinglhang gam hijong leh Japi kithokhom’a kho kisemna jouse’a kinoptona dungjuiya achenghon Inmun-loumun hihen gambeh hijong leh ama mincheh’a aneithei dingu, mipi deilhen dungjuiya aphat tep’a kilhengdoh pen chu Inpipu hiding, Haosa Inpi noiya kivaihom ding ahi. Haosa Inpi phalna louva koiman inmun-loumun hohi namdang kom hihen khochom mi hijong leh ajoh thei lou ding ahi.
10. Thinglhang gam’a koiman In 50 lhinglouva khothah asem thei louding, asem nom hon akinai pipen’a umsa kho khat veng min’a bou asem theiding, Haosa Inpi chom atundoh thei lou ding ahi. Khothah thah sembe sang’a kho umsa ho pilhinsahna ding joh mano ding ahi.
11. Thinglhang gam’a khoneo jouse gamletna mun khat’a gopkhom ding, koi hijong leh agam tohdoh pan agam let le neo dungjuiya khomite ding inmun-loumun ding inson’a apeh leh Haosa Inpipu hiding, ahilou jong leh kinoptona dungjuiya Inpipu ding hi Haosa kigomkhom ho lah’a kum thum sih’a ding’a kilhah thei hiding, Inpipu’a panglou Haosa jousen Haosa Inpi’a tohmun alodiu ahi. Kigopkhomna kho ahilou leh kinoptona dungjuiya kigop khomna ding Kho min hi athah sahthei hiding chule khomin dang jouse veng min khatcheh’a semdoh ding ahi.
12. Khosung Inpipu le Haosa Inpi’a tohmun neijousen khomite hetlou le phalna lou’a acham cham’a vaihomna aneithei lou diu ahi. Haosa koi hijong leh khosung’a jong chenglou’a khomin’a phatchomna ho acham cham’a mang chavei le suchavai aum leh Haosa Inpipu hithei lou ding, Kuki Inpi’n achung thu asei ding, Haosa Inpipu ahina’a kon haisahna thei chan geiya thulhuhna aneithei ding ahi. Koi hijong leh Haosa Inpi’a pang’a khomite nehding le chanding suchavai aumleh khomiten ahaisah thei ding, hitobang miho chu Haosa Inpi’a kum som sung’a pangthei lou ding ahi.
13. Khosung’a kon Haosan acham’a koima anodoh thei lou ding, nodohna ding thu aum leh Lhang Inpi’n athu akhol masat’a, nodoh ding’a lom ahileh anodoh thei ding, akinodoh tah jongleh Inmun-loumun kipesa ho Haosa Inpi dan dungjuiya akijoh thei ding ahi.
14. Haosa Inpi’n Puchon-pachon, Pula-pala, Pulam-palam le Gollui thusim ho chintupna ding le choisangna ding’a khosung’a khangthahte kithem chuhsahna ding’a mopohna le tohgon aneijing ding, chule Puchon-Pachon thona ding Von (Cultural dress) hihen Gosem, Pengkul, Dahpi, Gollui kichep le golseh ho hijong leh lhingsetna asuhtup ding chule khangthahte kithemchuhsahna ding’a lunggel le tohgon anei ding ahi.
15. Haosa Inpi hin Lhang Inpi le Kuki Inpi ho-a kon ngansena dungjuiya khosung thalheng’a thuseina le natohna anei ding ahi.

Bung 6: Lhang Inpi

1. Lhang khat sung’a um Haosa Inpi jouse kikhailhahna le kigopna chu Lhang Inpi hiding, Lhang khat chu khosung khat bang’a vaihomna aneiding, Lhang sung’a kivaipohna le thutanna sangpen hiding ahi.
2. Kuki Inpi’a Lhang Inpi thalheng ding’a Lhang Inpi jousen Kuki Inpi Semang ding khat cheh alhendoh dingu, Kuki Inpi Semang ahinao banna akilhen dohnao Lhang cheh’a Lhang Inpipu hidingu ahi.

3. Lhang Inpi lamkai ding ho chu Lhang Inpipu,(Kuki Inpi Semang) Lhang Inpi Thuching, Lhang Inpi Semang, Lhang Inpi Pachong, Lhang Inpi Lhangsam, Lhang Inpi Lom Upa le Lom Upanu hidiu ahi. Lhang Inpipu tailou tohmun dangho hi ngaichat dungjuiya akop’a jong umsah/koibe thei hiding, mopohna jong kiphatsahna dungjuiya khintoh thei hiding ahi.

4. Lhang Inpipu hi Lhang Inpi luchang hiding, lhangsung’a kivaihomna lhongpi avettup ding; Lhang Inpi Thuching in lhangsung’a thu kisei le na kitongho avettup ding, kilolna ho tohdohna ding angaito ding; Lhang Inpi Semang in Lhang Ipipu atosot ding, Lhang Inpipu aum lou teng akhella pang ding, chule Lhnag Inpipu in phat lhin masang’a pohjom thei louna aneileh, phat kichai tokah’a ding’a Lhang Inpipu tohmun aloding; Lhang Inpi Pachong in lhang sung le mipi bitna ding le machalna ding angaito ding; Lhang Inpi Lhangsam in lhang sung’a phondoh ding le hetsah ding jouse chung’a mopohna anei ding; Lhang Inpi Lom Upa le Lom Upanu in lhangsung’a khanglaite machalna ding le kithem chuhna chom chom aneisah lhon ding ahi.

5. Gamkai (state) khat sung ahilou leh Lhang phabep sung’a thu-le-la dinmun dungjuiya Lhang Inpipu khatpen lamkaina noiya kihoukhomna anei thei diu, ngaichat dungjuiya Kuki Inpi lamkai dang ho toh kijamat diu ahi.

1. Lhang Inpi in Haosa Inpi akithopi’a akijahmatpi jing ding, chule Kuki Inpi’a kon a ngansena le ngaichatna dungjuiya pan alah ding, Haosa Inpi le Kuki Inpi kikah’a Palai hiding ahi.
2. Lhang Inpi lamkai hon gambih sung’a khojat le mihem chengjat akoi diu, kumseh’a kidong Inpi kai Haosa Inpi ho toh asuhtup diu, Kuki Inpi lamkai ho khut’a aphat kitep sung’a apeh lut diu, Kuki Inpi lamkai ho toh kihoumat jing diu chule ngansena dungjuiya pan alah jing diu, Haosa Inpi le Kuki Inpi kah’a palai hiding ahi.


Bung 7: Kuki Inpi

1. Kuki Inpi hi Haosa Inpi’a pat Lhang Inpi, Lhang Inpi’a pat Nampi kijopmatna ahi. Nampi thu’a Nampi sung’a kiloikhomna dangho toh kihoumat jing ding chule ngaichat dungjuiya toukhomna le kihouna akou jing ding ahi.

2. Kuki Inpi lamkai ding chu Kumpipu (President), Bulpi-Semang (General Vice-President) , Semang (Vice-President) , Bulpi-Thuching (Secretary General), Bulpi-Thuching Kithopi ( (General Secretary), Pachong (Defence& Home), Lhangsam (Publicity, Public Relations & External Affairs), Lom Upa le Lom Upanu (Youth Affairs) ho hiding’u ahi. Kumpipu, Bulpi-Semang, Bulpi-Thuching le Bulpi-Thuching kithopi tailou adangse hi ngaichat dungjuiya akop’a umsah/koibe thei hiding chule mopohna jong khintoh thei hiding ahi.

3. Kuki Inpi Kumpipu hi Inpi luchang hidng, kivaihomna lhongpi avettup ding, doi-le-tup ho amono jing ding, Inpi lamkai ho natoh le tohding ho ahilding, chule atohkhompi ho toh kihoutoh’a mopohna ho agontoh ding ahi. Inpi Bulpi-Semang in imalam jouse’a Kukpipu I atosot’a akijahmatpi jing ding, Kumpipu umlouna hihen chule Kumpipu’n phat lhing masang’a toh jomthei louna anei hijongleh phat kichai kahse’a ding’a Kumpipu hiding ahi. Bulpi-Thuching (Secretary General) in Nampi ding’a tohgon ho anei ding, Inpi thu-le-la ho asuhtup ding, phat kichai masang’a poh jomthei louna anei leh Bulpi-Thuching Kithopi’n phat kichai tokah’a ding’a Bulpi-Thuching tohmun alahding ahi.

6. Kuki Inpi Semang hi Lhang tam le lhom dungjuiya umding chule Lhang Inpi chung’a mopohna anei ding ahi.
4. Kuki Inpi Thuching (Finance) le Semang (Treasurer) in sum-le-pai achena le ahung lutna kitup tah’a avettup lhon ding, sum-le- pai muna ding lampi agon lhon ding, chule kijamat jing lhon ding ahi. Kuki Inpi kinoptona lou le dan toh kitoh lou’a sum-le-pai ahopdoh lhon lou ding ahi. Ngaichat dungjuiya mipi hetding’a sum hunglut le achena kicheh tah’a aphon doh lhon ding ahi.

5. Inpi Semang (Customary Law) in Kuki Nampi sung’a tribe chom chom ho chonna (customs) jouse akholding, asuhtup ding, chule Kuki Inpi kinoptona dungjuiya sutdohna ding’a lunggel le tohgon anei ding ahi. Inpi Thuching (Culture & Traditions) in Kukite (Aimol’a pat Zou) gollui thusim, Pula-pala, Pulam-palam le adang ho akholding, asuhtup ding chule achintup ding ahi.

6. Inpi Thuching (Welfare, Relief& Rehabilitation) in Nampi khantouna ding’a tohgon anei ding chule Nampi sung’a gal-le-tol jeh’a hahsetna le gentheina toh ho ngaichat dungjuiya kithopina ding tohgon anei ding ahi.

7. Inpi Pachong in Nampi sung’a mipi bitna ding le lungmon’a chenna ding angaito ding, Inpi Thuching (Home) in gamsung thu-le-la akhol jing ding, ngaichat dungjuiya thupeh le natohna anei lhon ding ahi. Inpi Pachong le Inpi Thuching (Gam-le-Go) kihoumat jing lhon ding, gamsung thusoh ho Kuki Inpi ahetsah jing lhon ding ahi.

8. Inpi Thuching (Customs & Traditions) in Kukite chonna le ngaina ho (Aimol’a pat Zou) akholding, asuhtup ding chule achintup ding ahi. Thuching (Welfare, Relief& Rehabilitation) in Nampi khantouna ding’a tohgon anei ding chule Nampi sung’a gal-le-tol jeh’a hahsetna le gentheina toh ho ngaichat dungjuiya kithopina anei ding ahi.

9. Inpi Lhangsam in gamkai sung’a thu-le-la alahkhom ding, phondoh ding’a ngaicha jouse aphon doh ding ahi. Inpi Lom Upa le Lom Upanu in khanglai ho kipohtupna ding le machalna ding’a lunngel le tohgon anei lhon ding ahi.

10. Achung’a kisei tohmun ho hihen mopohna ho hijong leh ngaichat dungjuiya kuki Inpi’n akhintoh thei hiding ahi.

Bung 8: Inpi Toukhomna

1. Kuki Inpi toukhomna hi alhompen’a kum khat’a nivei umding ahi. Kumbul Toukhomna hi January-February sung’a umding, chule Kumlhun Toukhomna hi September sung’a umding ahi. Ngaichat dungjuiya Thukin Toukhomna kouthei hiding ahi.
2. Haosa Inpi, Gambih Inpi le Lhang Inpi hon jong alhompen’a Kum khat sung’a toukhomna nivei aneidiu ahi. Kumbul Toukhomna hi January hiding chule Kumlhun Toukhomna hi September sung’a Kuki Inpi toukhomna ummasang hiding ahi. Ngaichat dungjuiya Thukin Toukhomna anei thei diu ahi.
3. Kuki Inpi Toukhomna hin Haosa Inpi, Gambih Inpi le Lhang Inpi jouse ahop ding, Gambih Inpi Toukhomna hin gambih sung’a Haosa Inpi jouse ahop ding chule Lhang Inpi Toukhomna hin lhang sung’a Haosa Inpi le Gambih Inpi jouse ahop ding ahi.
4. Kumbul le Kumlhum Toukhomna ding hi alhom penna ni som (10 days) masang’a phondoh hiding ahi. Kumbul Toukhomna hi alhangpi’a kum khat sung’a ding tohgon neina le seikhomna hidng chule Kumlhun Toukhomna hi alhangpi’a kumbul’a tohgon kitahdoh ho velvetna hiding ahi.
5. Kumbul le Kumlhun Toukhomna teni’a hi ngaichat dungjuiya Kuki Inpi’n ahetpih le anoiya kikhailha ho’a kon hihen, Inpi’a a kon hijong leh thudang seiding’a khoh jouse jong seithei hiding ahi.
6. Kumbul le Kumlhun Toukhomna jouse’a hi member lhin-le-lhin lou(quorum) kivelou ding, Thukin Toukhomna jouse’a vang alhom penna Inpipu ho banna lamkai dang hopthum’a hopni pang tei ding ahi.
Bung 8: Inpi Thuhom le Thuhom Kithopi
1. Kuki Inpi hihen Gambih le Lhang Inpi hijong leh kivaihom kitupna ding’a Thuhom le Thuhom kithopi (Speaker&Deputy Speaker) umsoh kei ding ahi. Haosa Inpi jouse’a vang Inpipu le Kho Thuching mopohna noiya thuhomna um ding ahi.

2. Thuhom le Thuhom Kithopi ding ho hi agam agam’a Inpi lamkai thah hon Kumbul Toukhomna masapen’a aki lhendoh diu ahi. Thuhom le Thuhom Kithopi ding hi Thuhom le Thuhom Kithopi luite ni ahilou leh khatjo sang lamkaina noiya Kumbul Toukhomna masapen’a aki lhendoh diu ahi.

3. Kuki Inpi Thuhom in Kuki Inpi Inpipu, Bulpi-Semang le Bulpi-Thuching toh kihoutoh’a Inpi toukhomna phat atepding, akouding, achelhah sah ding, Inpi toukhom sung’a kitup tah’a vai ahom ding ahi. Gambih le Lhang Inpi Thuhom hon jong Gambih le Lhang Inpipu ho le Thuching ho toh kihoutoh’a toukhomna phat atepding, akouding, achelhah sah ding, toukhom sung’a kitup tah’a vai ahom ding ahi.

4. Inpi Thuhom hon Toukhom sung’a mimal thusei le lunggel avettup ding, boina sem/paochang ngailou mangcha aumleh toukhomna a kon anodoh thei ding, toukhomna chung chang’a dan jeh’a kiboina aumleh thuchaina asemding koiman anelkal thei lou ding ahi.
5. Inpi Thuhom aum louteng Thuhom Kithopin Inpi thuhomna anei ding, Thuhom thaneina le mopohna jouse aneiding ahi. Inpi Thuhom le Thuhom Kithopi anigel lhon’a aum lou leh Kuki Inpi Inpipu le Bulpi-Thuching in Bulpi- Semang Inpi Thuhom ding’a ngansena anei lhon ding ahi.

6. Inpi Toukhomna sung’a kivaihomna ding dan hohi Thuhom le Thuhom Kithopi’n ngaichat dungjuiya asem thei ding, toukhom kipat masang’a toukhomna’a pang jouse hetding’a phon dohna aneilhon ding ahi.

7. Toukhom sung’a Lhacha dingho Thuhom le Thuhom Kithopi tenin Inpi lamkai ho toh kihoutah’a agontoh dingu ahi.

Bung 9: Inpi Thutanna (Judiciary)

1. Pupa-gam sung’a government court’a thu lhunsah lou’a Kuki Inpi Thutanna noiya seilhah ding ahi. Kuki Inpi Thutanna (Judiciary) hi anoiya bang’a hi dan 5 a umding ahi. 1. Khosung Inpi Thutanna, 2. Gambih Inpi Thutanna 3. Lhang Inpi Thutanna, 4. Phungpi/Tribe Thutanna le 5. Nampi Inpi Thutanna.
2. Haosa Inpi in khosung’a thuneo hihen thulen hijongleh thutanna anei ding, khosung’a ding’a thutanna sangpen hiding ahi. Haosa Inpi thutan lunglhai louna nei aumleh, Gambih Inpi kom’a velvetna ding’a ngehna aneithei ding, Gambih Inpi’n athu dungjuiya aseikhom’a achaina ding’a thulhuhna asem ding, koiman Lhang Inpi le Kuki Inpi kom’a ngehna aneithei tah lou ding ahi.
3. Gambih sung’a kho le kho kikah’a kihetkhelna, phung le chang chule Kuki tribe ho kikah hihen gambih sung’a thu-le-la dang seiding’a hunglut jouse hijong leh Gambih Inpi’n thutanna anei ding ahi. Gambih Thutanna’a pang ding chu Gambih Inpi lamkai ho le Haosa Inpi Inpipu 7 hidiu ahi. Koitobang Gambih Inpi thutanna chung chang’a lunglhai louna nei aumleh, Lhang Inpi kom’a velvetna ding’a ngehna aneithei ding, Lhang Inpi’n aseikhom’a thulhuhna asemding, Kuki Inpi heng’a ngehna anei thei lou ding ahi.
4. Lhang Inpi in lhang sung’a thu-le-la hunglut jouse chung’a thuneina aneiding, lhang sung’a ding’a thutanna sangpen hiding ahi. Lhang Inpi Thutnna’a pangding ho chu Lhang Inpi lamkai ho le Haosa Inpipu 7 (Gambih Inpi’a pang Hasao Inpipu ho hilou) hidiu ahi. Lhang Inpi thutanna chung chang’a lunglhai louna nei aumleh, Kuki Inpi kom’a ngehna anei thei ding ahi.
5. Pupa-gam sung’a phung khat le phung khat kikah/tribe khat le tribe khat kikah’a hihen kiboina dang hijong leh Phungpi le Tribe lamkai hon athu atanthei ding ahi. Phungpi le tribe lamkai ho thutanna chung chang’a lunglhai louna neijousen Kuki Inpi’a bou velvetna ding’a ngehna anei thei ding ahi.
6. Haosa Inpi, Gambih Inpi, Lhang Inpi le Kuki Inpi’n athu kitanna/kiseina ding’a sum-le-pai (Court fee) hi kiphatsah dungjuiya alah ding ahi. Gambih Inpi le Lhang Inpi’a Haosa Inpi Inpipu 7 cheh pang ding hohi Gambih le Lhang Inpi’n Toukhomna masapenna akilhen diu ahi.
7. Kuki Inpi hi Kukite sung hihen nam dang le government kikah hijong leh thutanna sangpen hiding ahi. Hiche thutanna’a pang ding ho chu Kuki Inpi Inpipu, Bulpi-Semang, Bulpi-Thuching le Lhang Inpi Inpipu 5 hidiu ahi. Kuki Inpi Inpipu’n ngaichat dungjuiya Kuki Inpi lamkai dangho le Kuki sung’a tribe hihen phung le chang lamkai ho hijong leh agom’ a mi 7 apansah thei ding ahi.

Bung 10: Inpi Kai

1. Kuki Inpi kivaihomna ding le Nampi ngailutna jalla Inpi kai (fund) hi kumkhat’a khatvei anoiya bang’a hi kidong ding ahi. Inson’a Dangka 100, Special Contractor ho Dangka 10000, MP/MLA ho Dangka 20000, Minister ho Dangka 30000, MDC ho Dangka 10000, IFS/IAS/IPS le group (A) jouse Dangka 10000, MCS/MPS le Gazetted Officer ho Dangka 7000, service boldang ho lhakhat tolop’a kon 4 percent hiding, kiphatsahna dungjuiya tamsah/lhomsah thei hiding ahi.

2. Hiche Inpi Kai hi nivei’a (two instalments) a peding loi hihen khatvei peh’a peding loi hijong leh Inpi lamkai hon agontoh thei diu, aphat kitep sung’a pehsoh kei ding ahi.

3. Khosung’a Inson’a kidong Inpi Kai hi hopthum’a hop khat khosung’a manchah ding’a Haosa Inpi mopohna noiya um ding, Inpi Kai adangse hi Kuki Inpi khut’a lutmasa ding, Gambih, Lhang le Kuki Inpi ding’a hoptoh hiding ahi.

Bung 11: Sum-le-Pai Kholchilho

1. Sum-le-pai hung lutna le achena kholchil ding’a khosung’a pat Kuki Inpi’n akholchil ding (Auditors) mi 3 cheh anei dingu, kholchilna nei ding’a kinamdet hon Kum khat sung’a alhom pen’a nivei kholchilna aneidiu, japi hetding’a aphondoh jing diu ahi.

2. Kholchilna neihon sum-le-pai akisuhchat vaina le akilep mangna amudoh uva ahile asuchavai le alepmang lamkai koi hijong leh aphat kitep sung’a alesah ding, Kuki Inpi dan dungjuiya achung thu kisei ding ahi.

3. Kholchilna neihon Kuki Inpi gou-le-thil, sum-le-pai chule Kuki Inpi min’a kilamdoh le kineidoh jouse ahiding bangtah’a kholchilna anei diu ahi.

4. Kholchilna neihon mabanna sum-le-pai kitup tah’a manna ding toh kisai’a ngaidan(Recommendat ions) apehthei diu, Inpi lamkai hon aseikhom uva, kiphatsahna aumleh akit’a kholchilna neihon ajui diu ahi.

Bung 12: Lamkai ho Gun

1. Haosa Inpi’a pat Kuki Inpi geiya lamkai ding ho chu lunggel pilhingsa, khosung, Lhang sung le Kuki Inpi kivaihomna hethem, puchon -pachon ngailu’a khohsah, tahsa lam’a kum 40 noilam mi hilou diu ahi.
2. Japi seiphat mi, gam-le-nam ngailu, Pathen ging mi, chihna le themna lam’a kisonpi umtah hiding hidiu ahi.
3. Haosa Inpi, Lhang Inpi hihen Kuki Inpi le Inpin ahetpih leh anoiya um kiloikhomna ho’a kipalsa mi hilou diu ahi.
4. Khosung’a vaipo ding ho hihen Lom Upa le Lom Upanu ding hijong leh akhoh dungjuiya tahsa lam’a kum 40 noilam mi jong hithei ding ahi.

Bung 13: Lamkai ho phat

1. Haosa Inpi’a (Haosa tailou) patna Kuki Inpi chan’a lamkai ho phat hi akilhen dohnao nikho a patna kum 3 (thum) hiding ahi. Lamkai koitobang in pohjom thei louna aneijeh’a akhella athah kilheng doh lamkai jouse jong Hiche phat hin ahop tha ding, phat (term) thah’a kisim lou ding ahi.

2. Haosa Inpi, Lhang Inpi le Kuki Inpi lamkai ho hi October sung’a lhendoh soh kei dingu, November 1 Kut nikho le alamkai nao mun cheh’a mipi le Pathen angsung’a Hou lamkai khat masang’a kitepna anei diu ahi.

3. Kuki Inpipu in aphat lhing masang’a pohjom thei louna anei leh Bulpi-Semang in phat kichai tokah’a ding’a Inpipu tohmun alah ding, chutobang’a chu Bulpi-Thuching in pohjom thei louna anei leh Bulpi-Thuching Kithopi in phat kichaito kah’a ding’a Bulpi-Thuching tohmun aloding ahi.

4. Lhang Inpi le Gambih Inpi Inpipu tenin phat kichai masang’a pohjom thei louna aneilhon leh phat kichai tokah’a ding’a Lhang leh Gambih Inpi Semang tenin akhel lhon ding, Lhang leh Gambih Semang ding’a Lhang le Gambih Inpi lamkai hon athah alhen diu ahi.

5. Gambih Inpi, Lhang Inpi le Kuki Inpi lamkai danghon pohjom thei louna anei’u leh Inpi lamkai hon amaho mopohna mun cheh’a akhel ding lamkai thah akilhen diu ahi.

6. Kuki Inpi hi phat lhin masang’a kisuhai thei lou ding ahi. Gelphah lou’a Nampi sung’a boina sangtah aum’a Kuki Inpi toukhomnan pha asah leh Kuki Inpi lamkai ho phat hi lha gup suhsaobe/suhchombe thei hiding ahi.

7. Bung 14: Lamkai ho Haisahna

1. Lamkai koi hijongleh Kuki Inpi doi-le-tup toh kitoh lou’a thusei le natong, lhang phong tah’a atohkhompi ho le Kuki Inpi demna thusei le thuso bol, kihoutohna le kingansena umlou’a Kuki Inpi thalheng’a natong le thusei, thuso bol, sum-le-paiya kitup lou, Inpi lamkai khat ding’a kilomlou tah’a hinkho mang aum leh Kuki Inpi’n achung thu aseiding, hopthum’a hopni anopleh lamkai ahina’a kon kikah ding, hitobang lamkai ho chu Kuki Inpi hihen Inpin’n ahetpih le anoiya kiloikhomna ho hijong leh kum 5 sung’a tohmun alo thei lou ding ahi.

2. Kuki Inpi Inpipu hihen Bulpi-Thuching hijong leh Kuki Inpi lamkai jousen tahsanlalna thu’a Inpi Thuhom kom’a suttho’a ahetsah uva, chule Inpi Thuhom in lekha hinpelut ho khatcheh’a thudohna aneiya chule adih ahileh Inpi kivaipohna dan dungjuiya kichelha ding ahi.

3. Kuki Inpi lamkai dang jouse hi atohkhompi lamkai hopthum’a hopni tahsanlalna thu-a kinoptona anei leh atohmun’a kon haiding ahi.

Bung 15: Kuki Inpi Danpi

1. Kuki Inpi kivaipohna Dan lhongpi hi Inpi Toukhomna’a mipi hopthum a hop nin (2/3) pha asah leh semphat thei, lahdoh le koibe thei hiding ahi. Hichena ding’a hi Inpi’n Danpi Velvet ding’a Committee khat asem ding, Inpi Toukhomna’a hopthum’a hop nin (2/3) pha asah le bou Inpi Dan Lhongpi’a kipansah thei bep ding ahi.

2. Akisundoh Danpi kithopi ding’a akisun doh lou dan hihen chonna le ngaina ho hijong leh ngaichat dungjuiya Kuki Inpi lamkai ho kiphatsahna le kinoptona dungjuiya kichepi ding, akisundoh Danpi toh akikale tia kila thei louding ahi.

Bung 15: Kilhen ding dan

1. Haosa Inpi’a Haosa toh vaihom khom ding hihen phat tepsung’a mipi deilhen dungjuiya Kho Haosa kilheng ho hijong leh khosungmi kum som le kum get chunglam jousen Kho Semang le Kho Thuching mopohna le lamkaina noiya alhen diu ahi.

2. Lhang Inpi lamkai ho hi Khosungmi thakhella Haosa Inpi’a pang jouse, Lhang Inpi lamkai ho, Lhang sung’a mimal’a Inpi Kai pejouse, le Lhang sung’a Lhang Inpi’n ahetpih le anoiya um kiloikhomna ho’a lamkai jousen alhen diu ahi.
3. Kuki Inpi Inpipu, Inpi Bulpi-Semang, Inpi Bulpi-Thuching le Inpi-Bulpi Thuching Kithopi ho hi Kuki Inpi’n ahetpih le anoiya um kiloikhomna ho’a lamkai jouse banna Haosa Inpi le Lhang Inpi lamkai ho le mimal’a Inpi kai pejousen alhen diu ahi.
4. Kuki Inpi Semang ho hi Lhang Inpi thalheng ding’a Lhang Inpi khat in Semang khat cheh alhen diu ahi.
5. Kuki Inpi Thuching, Pachong, Lhangsam, Lom Upa, Lom Upanu le adang mipin alhen lou panmun jouse hi Kuki Inpi Inpipu, Inpi Bulpi-Semang, Inpi Bulpi-Thuching le Inpi Bulpi-Thuching Kithopi in kihoutoh’a alhen diu ahi.

Bung 16: Kilhenna Vetupding

1. Lhang le Kuki Inpi lamkai ho lhenna ding’a Kilhenna Vetup ding (Election Commission) khat cheh um ding, Election Commissioner le Presiding Officer jaona’a ngaichat dungjuiya member dang pang thei ding ahi. Hiche Kilhenna Vetup dingho hi lamkai kilhenna ding lhani masang’a Kuki Inpi le Lhang Inpi lamkai hon alhen doh dingu ahi.

2. Kilhenna Vetupho mopohna ding ho chu; amopohnao gamsung cheh’a kisimna’a pangthei ding ho asuhtup diu, Kilhenna ding amun le anikho, Inpi lamkaiya pangnom ho min pehlutna phat le lahdohna phat ho atep diu chule kilhenna aboluva, aphondoh diu, akiphong dohsa lamkai ho chung’a koiman imacha aseithei lou ding ahi.

3. Kilhenna Vetup hon kilhenna boilou hella achelhahna ding’a lamkaiho toh kihou toh’a kilhenna ding Dan ho asemtup diu, kilhenna toh kisai’a kinel baotamna aumleh achaina thutanna aneidiu, koiman anelkal thei lou ding ahi.

4. Kilhenna kitup tah’a achelhah theina ding’a Haosa Inpi, Lhang Inpi le Kuki Inpi lamkai hon kilhenna’a kisimthei dingho akitsuh tup diu, koitobang amin panglou aumleh aumna gam Inpi lamkai ho ahetsah ding, aphat kitep sung’a akipelut lou jouse kisimna’a pang thei lou diu ahi.

Bung: 17 Nampi Lhacha ho Lo

1. Haosa Inpi’a pat Kuki Inpi sung’a Nampi lhacha jouse hi cholman hihen che le vale na’a cholam ding hijong leh sum le pai dinmun dungjuiya lhasih’a sempih ding chule aphat dungjuiya kalsah/lhomsah thei hiding chule Lhacha ho che le vale na’a acholam dingu jong sempih ding ahi.
2. Kuki Inpi Inpipu Dangka 5000, Bulpi-Semang Dangka 4000, Bulpi- Thuching Dangka 4500, chule lamkai dangho Dangka 3000 cheh hiding ahi.
3. Lhang Inpi Inpipu Dangka 2500 hiding, Lhang Inpi lamkai danghon Dangka 2000 cheh hiding ahi. Haosa Inpi Inpipu Dangka 1000 hiding, chule lamkai dangho Dangka 500 cheh hiding ahi. Lhacha ho che le vale na’a acholam dingu jong sempih ding ahi.
4. Kuki Inpi sung’a Lhacha dangho cholman le cholam ding hi Kuki Inpi’n asemtoh ding ahi.