Muntin’high school, college, office, houbung, khosung, daan inei uvin boldingleh bollou dingho kichentah in eiseipeh uve. Ithilbol chu adihlang hinam tihi daan kisemho tohin vetkah a kikhol chilthei ahi.
Mihem lungthim vanghin thildih bolding eiphal pouve. Ilungtup boldohna dinga lampi abailam jotding thanopna hi aum jingin ahi. Ithilbol uhi adih hinam tihi igeljing uva itoh dungjuija aga sang dinga jonghi ikigot diu ahi. Lungjat umlheh jongleh thil dihlou bolnading munna idin tengleh hichihi bolleng keileh kainsung mi chuleh kanam mite dinghin apha nadem tia kidoh masah aphai.
Ichennao gamhohi namdang ten thil dihlou bolna a ahinmanteng uleh imoh vetthim loudiu angaije. Eiho gam ahin, ichateu gam ahin chuleh ituteu gamjong hung hiding ahi. Igam houhi tukhanga sanga hoijo leh phajoa ichateu khang amu dinghi itup diuvin aphai. Hichina dinghin ibon chaovin mopohna ineisoh keijun ahi. Meilhei thingnoi mihon Chandel District, eimi chenna khovel hoa bomb akamjeh uva ikichat uva, ikisuhkhah uva ithipiu chuleh mi tamtah ajeh apol beija Myanmar gamma atollut uchu thil dihlou ahin, anatoh u adihpoi tichu India sorkar’n ahetthei nadingin Delhi tolpi’a eimi nungah gollhang tampin kijotna ana neijun, vangset umtah in mol athohban uvah mi 150 chu Tihar jail analutlo taove. Nungah gollhang mihangsan hohi ijem tia Kuki ten gamtum ihin neinao khat aumleh suhmil theilou tahchanu-tahchapa hung hidiu ahitai. Athoh gimnao manbei ahipoi tichu imu taove. Imiteu dammin ahung kilekit taovin chuleh meilhei thingnoimi hojong nodoh in aumtaove.
Meilhei thingnoi mi jouse chu aphapoi tina ahidehpoi. Mipha tampi umnao vinte. Akijah dachu igam u thil phalou bolna a ahungnei uchu ahi.
Abolnom uleh achennao phaitol sungah kibol uhen, ima kisei ponte. Hitobanga igamsung uva namdang ten thil dihlou ahungbol teng uleh Kuki chate hi idin khom jingdiu akulle. Tun Sadar Hills hoitah in gahve leuhen, Naga tetoh meilhei tehi akichu dannun akilange. Nagaten Southern Nagaland a jaosah teiding agouvin, meilhei hon jaosahlou natei dingin Imphal East District a kailutding agokit uve. Phat ahung chetoh lhonin tua hi Bishenpur Disrict hopsunga umsah ding lunggel anei u ginmo aumtan ahi.
Igamsung uva namdang ten thil dihlou lungput ahinnei kitnu ahitahleh idinkhom uva nathil bollu adihpoi tia sosal phat hikit talouham? NSCN(IM) tekhun avaikon, availhun seh uleh taona amang jiuve tin akiseije. 1991 kum vella tha matchaigam ding eina tilai ujongchun anatao teijunte. Nilhum keija khansetah a khohelou numei chapang gathat uva availhun uva ataoteng ulekhun ipimong mong asei nadiuvem? Athilbol houchu min adihnai atina theidiuva tao uvaham, ahilouleh amaholeh amaho kijoulhep uvaham? Amaho hi achommin koidoh tadileu hen, tun eiholah jong ahunglhung tai. Eile ei kikah a kivetda tona, kitha kimat ibol taovin, ilungtup uchu adihlou ahilaisea lungtup molso nadia itoh houjong chu lampidih khatcha aumpoi tihi sumil pou hite.
Kiletsah naleh kineosah theilouna hi lungthim phalou kipatna ahi. Eden honna gulpi chun Pathen toh nabahding ahi tia kiletsahna lungthim Adam lung thimma agah hetpeh tahchun Adam chu paidoh in aumtai. Kiletsah naleh chang kichoisang nahi satan akon ahibouve. Kineosah nabou hin mahthahna theija konin eihoidoh theije.
Amitakip chuleh inam pumpiu hin lungtup dihtah chu lampidih a imunathei tei diuvin kihabollu hite. Ajehchu, thil neochakhat masanga idin joulou uleh, bailam thetna ilhuh jengdiu ahi.
