Agartala, Ellha 20 : Rickshaw tol a ana pang Haripada Das chu tuhin kipah tah in hinkho amang tai. Ajeh chu specially-designed rickshaw Indian Institute of Technology, Guwahati in asem doh chu ajang in chuleh mun len jep adol in nisa noi hihen go ju jong leh atol ho din boina aum tapoi. Das hin 2007 changeiya chu rickshaw atol a nikhat leh dangka 25 anapeh ji ahi. Agartala khopi a ama tobang mi 300 hon phatchomna anei tauvin ahi.

Das in aseina a Rickshaw Bank a niseh leh dangka 25 kapeh kum khat jouvin rickshaw thah chu kanei doh thei tai ati. Rickshaw thah chu 20 percent tobanga jang jep ahi jeh in atol anom chom in ahi ati. Hiche rickshaw thah hi Dr Pradip Sharma in agel chu IIT, Guwahati ahetsah akon a kisem doh ahijeh in amin
“Deep Bahan” akisah in ahi. Rickshaw tol hon hahsa tah a amu 20 percent tobang niseh leh anei ho apeh jiu chu kapo nalheh jenge tin Guwahati aum Sharmah in aseiye. Hiti a kum 16 lang rickshaw tol hon sum tampi moh seh a apeh doh jiu ahi ati.

Deficit School teacher ho’n Meghalaya Sorkar dateline hinpe
Shillong, Ellha 20(NNN) : Meghalaya deficit school teacher non-teaching staff association ho’n agangthei pen’a Phallha (Nov) nisim 15 masang a lha lo, tolop sorkar in apehdoh di’n temna ahin nei uvin ahi. Chule arrear jong Christmas masang’a ahopdoh teidi’n ngehna anei uvin ahi.

Hiche kiloi khomna vicepresident, Jinu Kharbuki in thuso miho kom’a aphon dohna achun sorkar in sum
le pai dinmun ahahsa’e, ati hi jou kisei ahi, ajeh chu teaching staff hobon peh-doh ahithei le non-teaching staff hohi kilhomjo ahi, hijeh achu sorkar in ajou seida henlang thumna le taona kinei hi eisan peh uhen, achuti loule college 15 sung’a non-teaching staff jouse’n kiphinna khou cheh cheh hung kinei ding ahi, ti’n phondohna aneiyin ahi.

Alangkhat a non-executive worker Power Grid Employees Union northeastern region injong, hitobang
lha lo tolop le arrear jeh’a kiphinna khoutah Leisemni(Tue) nikho achu aneiyu ahitai.

Jilkung kiphinhon banjom taloudiu
Shillong, Ellha (NNN): Meghalaya a kiphinna nei jilkung hon sorkar akon’a akiphin nalopen uh tukum Christmas masang ngeiya kihopdoh peh ding ahi tia thulhut amu jeh uvin phatchom khat adin kiphinnna avohai
tauvin ahi. Hiche thulhuh nahi Leisemni nikhoa Jaiaw mun’a Joint Action Committee kiloikhom, Khasi Hills Deficit School Teachers Association leh Garo Hills Deficit School Teachers Association in mipi kijotna akon’a ana kiphatsah uh ahi.

Assam gam’a Wildlife (Protection) Act khou chehta 
Guwahati, Ellha (NNN) : National park 5 leh Sanctuaries 12 umna Assam gam ah government in Wildlife (Protection) Act 1972 chu dan khoutah in sepphat ahina ban’a President phalna amutoh lhon’in Assam gam’a gamsa ho phatah a venbit ahiding tohgon chu lolhing theiding dinmun in aum tan ahi. Hitia President Pratibha Patil phatsah banga wildlife (Protection) ( Assam Amendment) Act 2009 a hi tading Act dungjuiya gamsa chunga themmo chang masapen hochu dangka 10,000 apat dangka 50, 000 joh a leusah hiding ahitai, chuleh songkul a kum 3 ana tang dingchu kum 7 tangden diu ahitai. Chuleh gamsa chunga guhchat lahchat khatvei a ngalou a nivei chan bolkit hochu ahinkho uva Songkul tangding chuleh dangka 25,000 hita louding dangka 75,000 joh a leusah ding ahitai. Chuleh hitobang Act dungjui ahi Forest guard hon gamsa gumang leh that amu uleh akap lih thei nadiu tha jong ape tan ahi.