Khosung kivaipohna Iti Semtoh ding ham?
1.“Haosa” le “Khochaga” titah lou ding; chusang’a “Haosa” le “Khomite” joh ti ding ahi. Haosa chu anaote/achaten ana tundoh jeh’a khochaga hung kiti ahin, hinlah tukhang’a seitah lou ding ahi.
2. Haosa toh kithokhom ding Thuching, Semang, Pachong,Lhangsam, Lom Upa, Lom Upa- Nu le adang tomun ho hi ahina bang tah’a min vopih ding chule amopoh nao bang’a mopoh sah ding ahi.
3. Kukite chonna toh kitoh louva koima khosem umlou ding, koitobang asem aum leh Kukite chonna sumang kigo ahi tia lah ding ahi.
4. Khothah thah sembe sang’a kho umsa ho pilhin sahna ding joh ngaito ding ahi. In 50 lhinglou kho jouse khonung changeiya mun poimo ding mun khat’a gopkhom ding, khomin ho chu Veng min hisah ding, chule Haosa jouse khosung vaihom’a pang dingu, kho Haosa ding hi phatbih neiya kilha diu ahi.
5. Athem, aching le ahao jousen eima khocheh’a ‘In –le –Lou’ neiding ahi. Hiche hi khomite ding’a kitil khouna keo hilouva, khonung’a Kuki Gam huhna ding’a pan la ihuve ti hi thah geldoh kit ding ahi.
6. Kho-le-veng khantouna ding’a government scheme hihen phatchomna dang dang ho hijong leh Khosung lamkai hon khomite toh kihoutoh’a langneina le sihneina neilou hella natohna anei dingu, Haosan acham cham natohna anei lou ding ahi.
7. Haosa le Khosung vaipo hon khomite nehding le chan ding asuh chavai thei lou diu chule Khosung’a sum-le-pai hihen tha-le-jung lutna ding le senna ding hijong leh inson’a tanggol’a donding ahi.
8. Khosunga um govt. department jouse khomite thaneina noiya umding, inchen-khochen machalna ding’a tohgon chom chom neiding ahi.
9. Kukite hina le gunna ho Puchon-pachon, Pulapala, Pulam-palam le Gollui thusim ho chintupna ding le choisangna ding’a khosung’a khangthahte kithem chuhsahna ding’a mopohna le tohgon neijing ding, chule Puchon-Pachon thona ding Von (Cultural dress) hihen Gosem, Pengkul, Dahpi, Gollui kichep le golseh ho hijong leh suhtup ding chule kithem chuhsah ding ahi.
Gam neidan iti semtoh ding ham?
1. Kho gam pumpi hi Haosa min’a umding, mipi thalheng’a gam chingtup hiding, khomite toh kinoptona
beiya midang kom’a agam pumpi hihen agam beh hijong leh ajoh thei lou ding ahi.
2. Khomite kiholtah’a achentheina diuva, Kho Haosan agam let le neo dungjuiya Inmun-loumun ding inson’a apehding, koiman anung lahpih thei lou ding ahi. Hiche inmun-loumun hohi koitobang in government’a kon hihen adang dang’a kon hijong leh phatchomna ho mutheina ding’a ngaichatna anei leh Haosan akholtoh’a, chule phalna (No Objection certificate) apeh thei ding ahi.
3. Kho jousen ‘Khotu’/‘Gamkheh’ neisoh keiding ahi. Chuban’a Haosa Gam sung’a ‘Gam beh khat’ khat khomite thaneina noiya um ding, khomiten thingkeh-songkeh hihen aadang dang hijong leh akhan letsah ding chule ngaichat dungjuiya khomite phatchomna ding’a manchah ding ahi.
4. Haosan koima khosung’a kon anodoh thei lou ding ahi. Koitobang’a khosung’a nodoh thei ding’a umho chu asopi/akinaipi ho hetsah’a puidoh sah joh ding ahi. Khomite koitobang alou thei louva kichou aum leh Inmun-loumun kipesa hihen asung’a akilam doh gou le thilkeo hijong leh khomite khat pen kom’a akijoh thei ding ahi.
