Achesa Lhakao lha a South Korea warship "cheonan" kibulu a mi 46 anathi chu North Korea submarine akon kikapse ahi tia ngohna kinei ahi. Hiche jeh chun US in North Korea sanctions abol in chuleh North Korea lamkai pa sum mu ho jong lamdih lou a kimu ahi tin akhapeh tai. Yellow Sea a galmanchah tampi ahung um hi China in jong demna aneiyin ahi. Chutobang machun North Korea inaguh a gal kibol ding ahi tin US leh S Korea gihna aneiyin ahi. Hiche naval exercise hi ni 4 sung chelha ding ahin kong 20 val leh service personnel mi 8,000 val in pan alah diu ahi.
Lashker-e-Taiba hohi leiset chung’a kichat umpen khat ahitauve : Admiral Mullen
Islamabad, Lhamul 25 : Lashker-e-Taiba (LeT) hohi kichat umtah kiloi khomna khat ahin chuleh vannoiya gin umpen khat ahung hi tauve tin Admiral Mullen in aseiye.
Mullen hi US Joint Chiefs of Staff a Chairman tohmun anei ahi. Mullen in jong US Secretary of State, Hillary Clinton in Osama bin Laden leh al-Qaeda lamkaipa Pakistan a aumíe ati chu apom in ahi. Mullen inaseina a amani chu mun khat a phatah a kisel lhon ahin hijeh chun aholdoh lhon ahah-e ati.
Mullen in aseibe na a Pakistan western border a thinglhang miho umna lah ahi al-Qaeda ho pansa ahiuve ati. Aman aseina a Pakistan sorkar in Haqqani network ho suhmang nadin natoh aneipoi ati. Tupet a Afghanistan a US leh NATO sepai ho hin Haqqani network ho akon in nasatah in kidin tena leh buluna aum jingíe ati. Mullen in aseina a galguh bol ho suhmang nadin US leh Pakistan nasatah in apangkhom in hijeh chun US in Pakistan hi kithopi nathei channa akithopi ding ahi ati. Chuleh Afghanistan a hi chamna aum masangse a US military um jing ding ahi ati.
Afghanistan a US sepai mi 2 mang kihol jing nalai
Kabul, Lhamul 25 : Tuni chun American sepai mi 2 Taliban galguh bol ho hatna mun ah sepai hon huikong mangcha pum in ahol uvin ahi. Military officials sei dung juiya mi khat chu kithat hi tante tin agingmo un ahi. NATO International Security Assistance Force (ISAF) in thuso miho komma aseina a tuchan inamani akon in imacha thu akijapoi ati. Official khat in aseina a mi 2 chu amang ahilhon in chuleh koima cha akon inthu akihepoi, hijeh hun amani chung changthu imacha sei ding aumpoi ati. Hiche official pan aseibe na ah athi tai ahilou leh kipuimang ahi tin jong thulhut imacha akimupoi. Hinla thulam leng kija dan in mi 2 lah a khat chu athi tai akiti e ati. Amani chu Gansemni jan 8:00 vel'a chu ana kiholmo pan lhon ahitai. Chuban leh atouna lhon car hu aum nalou ding mun khat akon in akimu doh e tin official mi khat in aseiye.
Kabul lhanglam Logar mun'a local radio mangcha in amang teni lim le mel akiphong'in chuleh koi tobang amani umna he aum leh dangka $ 10,000 peh din jong akiseiyin ahi. ISAF in thuphon aneina ah amang teni chun aum nau compound sung akon apotdoh lhon chu hung kinungle lhon lou ahitai tin aseiye.
Mexico gam’a mi 51 kivuina kimudoh
Mexico City, Lhamul 25 : Northern Mexico gama achunga imacha kitah louna lhan mun 9 ah thilong 51 akimudoh-e tin official khat in aseiye. Mexico gama hi kham nathei a sumkolvei gang ho aphat seh leh kithakimat hi um jing jeng ahi.
Nuevo Leon State Monterrey khopi koma tu kal sung chun thilong tampi amudoh un, amaho chu akhut u akikan in chuleh bol genthei tah kibol gim'u hitei din investigators hon aseiye.
State prosecutor Adrian de la Garza in local television a aseina a tuchan in thilong 51 akimudoh-e ati. Hiche mi ho chu ni 15 masanga kithat uva hinte tin official hon aseiye. Authorities hon freezer trucks hoa hiche thilong hochu amonlhah lou nadin akoi un chuleh Monterrey vel'a mi mang um insung miten ahung kikhol thei nadiuvin akoi un ahi. Tukum sunga lhan khat a mi tamtah kivui kimudoh ani channa ahitai. Amasa chun southern State Guerrero mun'a Lhadou lha chun mi 55 kivui amudoh un ahi. Kum 3 val Mexico president Felipe Calderon in organized crime suhthip dinga aphondoh apat kham nathei jeh a thi hi mi 25,000 tobang alhing tai.
BP Company a lubohpen pa hai maithei ta
London, Lhamul 25 : Tupet a boina nei BP oil a luboh Tony Hayward chu nikhat ni 2 sung'a atohmun akon haina anei maithei ahitai tin Telegraph thuso chun aseiye. Hayward hin Gulf of Mexico mun'a thao aput jal chung changa nasatah a mipi hon demna anei ahi. Ahung lhung ding Leisemni teng leh BP Company in half-year natoh phondohna anei ding ahin hiche phat masanga hi Hayward amachamía hai ding ahitai tin thuso chun aseiye.
Thulhut kimu dung juiya Hayward hi ahung lhung ding kal sunga hi hai ding ahitai akiti-e ajeh chu hiche thao aput jal akon in BP Company in nasatah in minsetna aneiyin chuleh aminphat najouse amang soh tai tin akiseiye. BP Company hi Britain gamaía pansa ajiye. Sunday Telegraph in aseina a Hayward in amu ding sum 1 million pounds jong chu amulou maithei ahitai. Hinla BP in aseina a board leh management chun Hayward apanpi jing'e ahin thuso miho kom'a imacha thu aseidoh pouve.
