Tuchunga naval exercise hi masanga North Korea in South Korea warship akapset jeh a thaneina vetsah dinga kibol kigo ahi. Hiche South Korean warship alhum apat Korea teni kikah a hi kihet them louna sangtah umdoh ahi. Masanga chu hiche kichuhna hi lha masa achu Yellow Sea a nei dinga tohgon ana um ahin hinla UN Security Council in ipi lunggel anei ham ti jeh a phat chomkhat ana khongai ahi.
Ni masa nia Security Council in South Korean Warship kibulu na adem in hinla koima ngoh tum anei deh poi. Hiche warship kibuluna ahi mi 46 jong anathi ahi. Tua naval exercise nei dia kisei hi north Korea toh kidou ding tina ahipon hinla kivenna ding joh a kibol kigo ahibouve tin foreign ministry spokesman Kim Young-Sun in aseiye. UN thuphon na a warship kibuluna thu khum khana um tam tia adoh nauva Sun in hiche chu North Korea lunggel chunga kingam ahi ati. Hiche chung changa khonung teng North Korea invannoi kivaipohna dan ho phatah a ajui a chuleh mi dang jabolna anei din atem in ahi.
North Chile gama 6.2 magnitude a hat ling kihot
Santiago, Lhamul 12 : Northern Chile gama janhi chun ling akihot in hijeh chun South American gama mining natoh nasatah in atongkha in ahi. US Geological Survey in aseina a ling kihot chu ahat dan 6.2 magnitude a hat
ahin Calama akon 50 miles (80 kms) a gamla ahi ati. Hichu Santiago akon 1,260 kms a gamla north-east gamkai lang ahi.
Chile National Emergency office in aseina a koima akisukha ahilou leh athi-amang aumpoi ati. Hinla phat
chomkhat sung vang gam a chengho lungthim a kichat na aum in chuleh telephone jong phat chomkhat sung chu ahi thei poi ati. Tukum Bulte 27 nia South-Central Chile gama 8.8 magnitude a hat ling kiho na akon 100 kms val bep a gamla muna tuchunga chu athah beh a kihot kit ahi akiti e.
Egyptian pasal 1 in Indian nupi khat suminse
Dubai, Lhamul 12 : Egyptian pasal khat in Indian nupi khat hunam a asuh minset jeh in Sharjah Court in amapa chu kum 10 songkul tang din thutanna aneitai. Amapa chu amin tah akisei doh pon AO bou seh in akihe in ahi. Amapa hin numeinu koma lut thei na dingin municipal natong khat in akiseiyin chuin numei nu chu amu phat in avo in chujou chun hunam in asuminse in ahi.
Sharjah Sharia Court in kum 25 a upa pa chu kum 10 songkul tang ding chuban leh gam danga sol din aseiyin ahi. Police in aseina a tupet a Sharjah Central Jail a um pasal pa chun Appeals Court a ngaidam akithum ding
ahi atiuve. Numei dang khat jong achonset pi jeh a masang jep a chu amapa hi police hon amat u ahi.
Uganda gama World Cup veho lah a bomb pohkeh, mi 64 thi
e tin police in aseiyin ahi. Athi ho lah a American mi khat jong apangin chuleh akitongkha tampi aume.
Bomb masa chu Rugby Club mun khat a Spain leh Netherlands kichep chu TV screen len a avet pettah uva pohkeh ahin bomb ani channa chu Ethiopian restuarant muna pohkeh ahin, American mi 3 akitongkha in ahi. Kampalapolice chief in aseina a Somalia a galguh bol al-Shabab ho hitei din agingmo in ahi. Al-Shabab
ho hin al-Qaeda toh kikhut jop a Iraq, Afghanistan leh Pakistan a pansa ahiuve ati.
Police Chief Kale Kaihura in aseina a mi 30 tobang athi e atin hinla phat chom khat jouvin senior police official khat in mi 64 athi in, rugby club a 49 chuleh restuarant a mi 15 athi e ati. Hitobang boina ato na a White House spokesman Tommy Victor in Uganda in angaichat jouse a US in kithopina kipe ding ahi ati. Aman aseibe na a president Barack Obama in hitobanga bulu nahi nasatah in adem in chuleh athi-amang, akitongkha ho insung mite angailut na leh lunghem pina thuthot aneiye ati. Kenya foreign minister Moses M Wetangula in jong hitobang galguh bol ho hi Somalia a pansa hitei din aging mo in ahi.
Yemen a lha masa a buluna um chu Al-Qaeda in kiphonna nei
Sana, Lhamul 12 : Lha masa a Aden muna intelligence headquarters mun kibuluna a alhom penna mi 11 anathi na chunga Al Qaeda Yemini Wing in Pathenni chun kiphonna anei un ahi. Al Qaeda in the Arabian Peninsula (AQAP) in vang mi 24 athi e ati. AQAP in aseina a Lhadou nisim 19 nia intelligence headquarters kibuluna a security personnel mi 24 athi e tin asei unahi. AQAP thuphon dung juiya high-ranking intelligence officers mi 15, intelligence policewomen 6, natong 1 chuleh hihce nikho a security guards umjouse akithat un, office building meiyin akihal lha in, gari 6 akisuse in chuleh Israel-made automatic gal manchah ho akipodoh e ati. Hiche nikho a security personnel um jouse chu akithat soh keiyin amaho chu aban banna kithat uva ahi ati. Achesa Lhadou nisim 19 nia chu Aden khopi Tawahi muna political security agency office chu Al Qaeda galguh bol ho hin abulu uva numei-chapang ho jong atha u ahi tin official Saba thuso chun aseiye. Security personnel 7 kithat lah a 2 chu numei police officer ahi lhon e ati.
Clinton teni nupa in Westchester muna $ 11 mn mansion cho lhon ding
New York, Lhamul 12 : Bill Clinton leh ajinu Hillary Rodham Clinton in Westchester muna deluxe mansion khat achoh lhon ding ahi tin thulhut akimu in ahi. Hiche kom mun hi Bedford Hills muna suburban Chappaqua muna um ahin alet dan chu 20 acres vel a len ahin akom dunga chu New York a ahao ho tam hen uva ahi akiti e.
Paul Wallace hin Manhattan muna Broadstone Group real-estate firm hi ana phudoh ahin sum le pai kanei tapoi tia Westchester federal court a kum 74 a upa pa hin phondohna anei jouva pat Clinton teni nupa hin aphat seh a avil lhon ahi. Hiche 5-bedroom Compound hi phat sot louva achoh lhon ding ahitai tin tahsan umtah thulhut kimu chun aseiye. Clinton teni hin achanu lhon Chelsea hi tulha nisim 31 teng Marc Mezvinsky toh kicheng lhon ding ahin hiche masanga hi choh tei ding angaito lhon ahi akiti e.
