khomna muna 'Glory of India Awardî kiti tohphatman kipeh dohna India International Friendship Society hon agon uvachun Pu. Doukhomang Khongsai, Honourable MLA 46 Assembly Constituency, Saikul jong kipaman sangdin lhendoh in aum in ahi.
Hiche kipaman thilpeh agon uhi vannoiya Doctor minthangtah, Culture langa tohphat neimi, filmstar minthangho le Community dinga thipha bolho adia agonjiu ahi. Kumsih leh mi 100 tobang hiche thilpeh hi anei
jiu ahi.
Pu. Doumang in houlim aneina ah, hiche kipaman sangdinga eihin kou uchun Thailand gamsunga Red Shirts hon boina anasem laitah uchutoh ana kitoh khan ima jouse kaki gotchai nungchun Kolkatta muna Thai Consulate pan ima hihih jongle VIP khatna eihetdoh jalchun tourist visa din eina phalpon chulema ADC
election dingtoh akito khah jehchun kache theipoi, hinlah thilpeh chu ahung lhung thouve. Koiman eisei
pihpon chule koiman jong hiche a din nominate eibol khapoi ahinla vannoiyin eihet phah jal leh kanatoh chunga Pathen in eihet peh jalin kakipah lheh in ahi ati. Ka constituency sunga kanatoh doh aumnai hinla katoh ding jong atam nalaiye, term khat sunghin bulhit jou pong kate, hijehchun ahitheile nei tosot jing uvinlang kanatoh ding abangkhai ho molso gong kate tinjong temna aneiyin ahi. Hijehchun thakhat in dingkhom u hitin panlaute.
Tua kipaman kasan hi Manipur sungin midang jong umnante hinla vannoiyin Saikul MLA tia eihet uhi mipi ho jal ahi tinjong kipathu aseiyin ahi.
JE natna hise in Manipur sung lodimta
Imphal, Lhamul 17: Misemni chun District Malaria Officer (DMO), Churachandpur pahin aseina ah tulha kipat tilchun chapang 2 Japanese Encephalitis natna in athin chuleh mipi hin ahithei channa thoukang akipesah loudiuvin temna aneije. Chapang tenichu Tipaimukh a kon Lovejoy (12) RIMS Hospital a Lhamul nisim 7 nia thi ahin chuleh Loktah Project area a S. Sunamani chapa S. Naocha Singh (13) hi Lhamul nisim 3 nichun RIMS mama in athin, anihonna hi Churachandpur district akon ahi. Natna hitpihi vohcha a konna hungkipan ahijeh in vohcha vahon hoitah a avettupdiu, vohkul asuhthengdiu, ahitheileh vohcha jongchu kangkal akhaipeh diuvin Churachandpur DMO pahin atemmin chuleh fogging leh nat venna dinga natoh dang danghi kipanvah ding ahitai tin aseije. Hetding khatchu thoukangpe a konna Japanese Encephalitis leh malaria jehin Manipur mi 20 amollemtan achesa lhakhat sunga hin Manipur sung muntin aphatai. Manipur a hin Japanese Encephalitis natna hisehi alange tia official thuso kibolla ahitai.
Japanese Encephalitis hi viral natna ahin mihemleh gancha chunga achuh tengleh alhoh komvel hohi soudohji ahi, malaria hi plasmodium parasite hitpi jeh ahin, ani honnahi thoukang pe a konna kilamat ahi. Japanese
Encephalitis veihochu tisat,luchang nat, ngong nemtheilou, hichijou tengleh khohe louva kisa anei uve. Malaria vei hohi luchang natleh loh anei uve. JE natnajeh a mi 20 athilah ahin mi 4 hi Ukhrul leh Tamenglong district a kon ahi. Adamlou hospital munchom chomma kijenho jongkhu Japanese Encephalitis leh malaria jeh ahi tin kholchet ahitai
Jinei lai midangtoh kichen jeh’a arrest warrant kiphon khum
Imphal, Lhamul 17(NNN): Court of Judicial Magistrate, First Class in Police Deparment a natong Officer mi 2 chung ah "Arrest Warrant" aphonkhum tai ti thulhut akimun ahi. Arrest warrant kiphon khum teni hi tu-le-tu a Police Deparment aum P. Maheshwari Deputy Superintendent of Police (DSP) leh K. Bobocha Sub-Inspector (SI) ahi lhon'e. P. Maheshwari hi jineisa Khagempali khoa akon ahin Chuleh K. Bobocha jong hi jineisa ahi. Tunia Special court in Arrest Warrant issue abolna jeh ahile amani hi Daan banglou tah a chon honna tunaicha a chu ana kicheng lhon ahi. Amani hin sorkar natonghoa Employee Rules and Conduct (Service Rule) noiya daan apalkeh lhon jeh'a matdia Special Court in aphatsah ahi tai ajeh chu, amani hi tu-le-tu a jong ajii le cha hotoh chenghon ahi nalai honne. Hiche hi Sorkar Service Rule in aphal lou ahi. Special Court in amani hi Lhamul nisim 19 nikho leh, Court maiía kiphondoh na ahin neihon din hetsahna aneipai paiyin ahi.
Hiche thuso hi ahung sosal jeh hi Lilong khoa konna Maheswar Pasal S. Premananda in Chief Judicial
Magistrate, Special Court a case a file khum jeh ahi. Pu S. Premananda hi tu-le-tu a Doordarshan Gauhati a
Assistant Engineer a natonglai ahi.
26/11 kinokhum nadia kong chohna din ISI in LeT dangka 25 lakh ape e : Headley
26/11 Mumbai kibuluna a ISI apange ti photchetna khat chu Pakistan-American galguh bol David Headley in aseidoh tai. Headley in asei dung juiyin Karachi akon Mumbai chan kitol nadin Pakistan intelligence agency in Lashker-e-Taiba (LeT) ho kong choh nadingin paisa ape e ati. Achesa Phallha 26, 2008 nia Mumbai kibuluna a galguh bol mi 10 ho vetsuina nei ISI officer mi 2 jong Headley in koiahi aseidoh in ahi. Headley in asei dung juiya ISI hon LeT ho chu dangka 25 lakh apeuvin hiche sum chu Mumbai chena ding kong chohna dinga apeh u ahi ati e. Hinla LeT hon Indian ngaman kong "Kuber" kiti chu hunam in alahpeh un Mumbai chan ahung kitol uve ati.
Indian investigators hon jong ISI Chief Lieutenant General Ahmed Shuja Pasha leh Mumbai buluna a pang
Sajjid Mir akimuto lhon e ati. Sajjid Mir hi tupet a Pakistan songkul a um ahi. Hiche thu jouse hi India in Pakistan koma apeh lut soh ahi. Home Secretary GK Pillai in jong masanga pat a chu Mumbai buluna ahin ISI hon abul apat achai na geiyin pan ala uve tia anasei sa ahi. Tupet a US in amat Headley chu masangin in jong India ahung kholjin jingin chuleh Mumbai chu iti lama bulu ding ham ahung khol jing ahi akiti e.
AR hon gampammi mi 3 mandoh
Imphal, Lhamul 17: HQ IGAR(South) noiya um 26 Sector a 29 Assam Rifles hon gamsunga gampammi
lhatle ahet phat uvin Kharau Khunou muna operation abol nauva chun phalna neilou hella gamjon mi 3
aman doh uvin ahi. Amaho chu ahile Mr Yan, kum 23, Mr Thiken, kum 32, chule Mr T Ong, kum 35, ahiuve.
Amaho chengse hi Mintha kiti Myanmar gamsunga khokhat na chengcheh ahiuve tin thuphon ahin neiuvin ahi.
Jonglha phung jouva Pumton phung tamthi a kikholdoh
Imphal, Lhamul 16: Asian Long Horn Beatle, thingphung natnahin Manipur sunga jonglha akehkhat tobang atha chimit jouvin tuhin pumton, komla leh champra ahin suhkhah kit dingin akiseije. Entomology department na hetgilna nei senior assistant professor CAU, Dr. Ibobi hin thingphung natna hitpi hin amasatah a thingphung ajung asuhsetna thingbah leh thingna hon hinna a aneiju mineral hi lhung theilouva ahi, tin aseije. Tuhin pumton phungho jong ol ollin athipantai ati.
Professor pahin phat ageimasang'a masanga loubol mihon akom vella hetgilna neiho ahilouleh hichilang vesui sorkar natongho adoh diuvin temna aneije. Amasatah a kivenna dinga thingphung aphalou laihohi meija ahal diuvin ahilchah e.
Leitanpokpi kho a thuboi
Imphal, Lhamul 16: Lamlai police station noija Leitanpokpi kho achun KRA hon khosung mite komma dangka lakh 3 angeh jeh'un lungboi-lungjin aumtai tin thuso akimun ahi. Thulhut kimudung juijin sum angeh uhi khosung mitehin pan alahjeh uva KRA mi 2 hi athal hontoh 23 AR hon amatjeh u ahi, chuleh KRA hohin khosung mite kommah sum kaseijat uhi Lhamul nisim 17 kah a eipehlou uleh nachung uva action khoutah a kalahdiu ahi, tin akiseije. Thu asojouva pat hin 23 AR hon khosung mitehi sunle jannin KRA hon hinbullu khante tin aveng taove. Meira Paibis honjong janleh mivelhin apang jiuve. Sumhi Lhadou nisim 25 nia anathum mu ahidan injong aki seiyin ahi.
JE natna thua Indian Red Cross Society hon workshop bol
Imphal, Lhamul 17 : Misemni nikho nidan 11:00 c.m. donvel chun M.G.Avenue munah Indian Red Cross Society hon workshop lolhing tahin ana bol tauve. Hiche workshop a thugol ana chepi uchu ahile 'Awareness Program on Japanese Encephalitis Vaccination' ahi. Tunia workshop hi Red Cross Society noiya Imphal East
Branch ho makaina noiya ana chelha ahi. Hiche workshop hi Red Cross tetoh kitho a Department of National Vector Borne Disease Control Program (NVBDCP) hon ana bol uh ahin Red Cross akon volunteer mi 50 tobang ana pang uvin ahi. Dr.M. Lala Singh, General Secretary IRCS-Manipur, N. Amulkumar, Secretary I/E district branch of IRCS-Manipur leh Dr.H. Nimaichand Singh, State Malaria Officer, NVBDCP, Manipur honjong nasatahin ana kimang chauvin ahi .
Workshop muna kihoulim nau pipen chu Japanese Encephalitis(natna) akon dohdan, kiven dingdan chule loule ai kikap (vaccination campaign) dichu ahi. Japanese Encephalitis venbit nadia jong IRCS, Manipur State Branch in insecticide Treatment of bed nets kiti a tohgon chu Uchekon Khunou leh Uchekon muna Patheni
nisim 18 nidan 08:00 c.m. velleh ITBN Camp muna vetlhah sahna abol diu ahi. Hiche Camp a jaodia anom
chan tepna leh ngehna jong ana bol pai pai uvin ahi. Tunia workshjop hi Manipur State in angaichat penkhat ahi ajeh chu Japanese Encephalitis jeh'a dammona neihi Manipur gamsung ahin aniseh in akhan be cheh cheh'in ahi.
RUA in man beiya medical camp nei ding
Rural Upliftment Agency (RUA), Leimakhong in achesa Phallha nisim 22, 2009 nia one day Blood Donation Campaign abol bana Phallha 27, 2009 chun MACS, SBTC, RIMS leh 57 Mountain Division hotoh kitho khom in one day Blood Donation Camp anabol un, tun kipa umtah in Ambulance 1 jong achodoh tan ahi.
Mipi ho henga hetsah nom chu tu ahung lhung ding Lhamul nisim 22, 2010 nikho teng leh RUA in one day Health Care Awareness cum free medical treatment programme anei ding ahi. Hiche tohgon hi Irengbam Thamcha Devi Nursing and Health Care Reasearch Institute te toh kitho khom ding ahi. Hiche nikho teng leh
masanga one day Blood Donation Camp a ana pang ho certificate hopdoh na jong um ding ahi. Hiche nikho teng leh Leimakhong le akimvel a mipi hon pan ilah uva tahsa damthei nalam igelkhoh uva man beiya lou le ai kihom ho imu thei cheh nadiuvin hung soh kei hiute tin RUA founder General Secretary, Paoboi Hmar in
hetsahna le temna ahin neiyin ahi.
