1. Achom lam tah'a seidin Thadou pao le Kuki pao tia iseijing uva ikinel nao hi anigella adihlou jeh ahi. Hinlah lamkai masahon phading ham tia lunggel thuhtah neiya anabol'u ahi tijong suhmil lou ding ahi. Pu (Late) Thangkhopao Kipgen kana kimupin, ama seidan in sopi adang dang hon tribe chom chom'a recognised ahin kibol'u leh eiho paokhat those chu
dalhah'a akium ding phatna Thadou hi phading ham tia ana kibol ahin, tua khangthah ten aphajo chehding'a nagel'u aum leh nangho mopohna ahi atin ahi.
2. Tun aphajo ding le ahoichehna ding deinan thu tampi seijong leo hen Thadou tribe hi recognised anahi lou
hileh tu'a sang'a ikikhentel diu ahi ti jong geldoh'u hite. Thil ana umsa khat chu geltoh louva mohsei neo lou
ahi.
3. Kuki pao tia hungkisei jong hi lamkai masa hon kihoutohna dungjuiya phading ham tia anabol'u ahin, Dr.
T. Lunkim in achang'a aboldoh dan in isei yiuvin, aphatlouna jouse ama ingoh jiuvin ahi. Hiche jong hi ana
umlou hileh tunia hi Kuki kiti min jong hi seidohnom louva, eima phungcheh ihaboipi joh maithei'u ahi.
4. Thadou pao/Kuki pao hihen tia anagelho jong hin tunia nang le kei gelbang'a aphatna ding leh ahatbe
chehna ding'a anabolíu ahin, kingohto/kidemto louva khonung'a phajo ding chu hagel joh ding angaie.
5. Khang kitol/kikhel dungjuiya ivet leh anigella dih lou ahi tihi inop uleh adihjo khat umding tina ahi. Amavang
hiche hi adih mong mong ahi tia ipan teng uleh adihlou anahiji ahitai.
Ipijeh'a Thadou pao dihlou ham?
1. Manipur context a seidin tribe dangho hi phungmin'a recognised kibol khatcha aum lou jeh hin aboina aum-
pon, anom nom chu hijeng thei ahi.
2. Thadou hi phungmin ahitah jeh in, pendolla Thadou kahipoi tiho ding'a chu apom hahsa ding mong ahin,
nahiuve tia seisang'a chu hetthempih joh aphai.
3. Jihtho'a imacha ana umlou jeh in Phunggui kisutdan hi akibang pon ahi. Thadou khatvei thisah loi/nivei
thisah loi ium un, ahin ijatvei thisah jong leo hen Thadou in tua paokhat those hi ahop joupoi ti hi inop soh kei diu angaie.
Ipi jeh'a Kuki pao dihlou ham?
1. Kuki chu tu'a pakhat tho ho jengseh kiseina ahilou Paothu'a kiboina seichet phat ahitai Dr. T.T. Haokip NEHU,Shillong jeh in Kuki pao akitithei poi. Tu'a eiho tho pao hi Kuki tribe jouse kiphatsahna louva Kuki pao ahi tia isei laiseova Kuki unity umthei lou ding ahi. Chuti louva tu'a paokhat thoho bouvin Kuki apomtan, adang hohi ipi kiboljongleh Kuki hiding nomta pouvinte tia ihetcheh u leh vang Thadou pao tisang'a Kuki pao tijoh chun eihon soh jep diu ahi. Hinlah hiche dinmun hi khonung leh kipelna hikit ding, tu'a sang'a kiboina sangcheh ito diu ahi.
2. Pao hi culture lah'a kikankhomna ding'a athupipen ahibang'a kikhentelna ding'a jong thanei pen ahi. Hijeh
a hi lunggel thuhtah neiding angaie ti hi Thadou pao le Kuki pao fanatic hon geldoh jing angaie. Igelkhel uleh
Kuki le Thadou hi isuhbei ding joh ahi. Iti igel diu hitam?
1. Pendolla seilouva Thadou chu tribe khat'a ana umsa ahitah jeh'a tu'a paokhat thojouse hi ihijeng'u
phading ham? Thadou khella achom beh khat semdoh kit ding kiti leh kum 50 val iboikit diu, Kuki unity titah
louía eiho pakhat tho ho jeng jong ikihentel cheh cheh nao hiding ham?
2. Phungmin chu idei mong mong'u leh Thadou pen masang'a phungmin tampi um ahin, hiche ho chu ivelvet
uva, ibon chaovin ihopsoh hel tahih jong leo ahahop thei pen khat chu ikisah diu ham?
3. Phungmin hilouva isopiu adangho bang'a mindang 'Khochungte' ikisah diu hi khonung changeiya ikitona pen'u hiding ham? Phungmin kikisah kit leh khonung leh keiho kapang thei pouve tia seiloi ihung um kit uva
iboikit joh diu ham?
4. Any Kuki tribes 1951 khu thah poh doh kit'a phading ham? Hiche hin Kuki ho chu adalhah le alahlut
umchom lou, Kuki ho chu Kuki hijeng ahi. Hiche na dinga hi tu'a tribe chom chom'a kiminvo ho toh kihoutohna aum masat angaie. Achuti lou leh tua tribe ho aum ngai bang bang'a aumuva, Any Kuki tribe(1951) chu achom'a aum leh tua Any Kuki tribe kisei tobang hiding ahi.
Ipi dinmun a ihung lhun diu ham?
1. Hiche thu hi aseichetna aum lou leh achaina leh Thadou le Kuki hi koima hung hinom talou ding, umjong leh lhomcha bou hung hiding ahi. Tun Mate jong tribe khat in aumkit tan, alamkhatna seidin Any Kuki tribe toh kibang dan in aumtai ahilou leh Mate chu Kuki ahitapoi tina a jong seidoh thei ahi. Iti kisei them jong leh Kuki tribe dangho chu tribe chom chom'a aumlaisea Any Kuki tribe aum chu Thadou hilou ho ding'a bou phachom ahin, Kuki unity dingía natna bulpi khat hithou thou ding ahi.
2. Chomkhat jou leh phung jousen tribe recognition ihin kidel diu, tribe chom cheh'a ihung um diu ahi. Tu'a
paokhat thoho kikhentelna ding chu gamla talou ahi. Phung khat le phung khat sung jengía jong kikhentel-
na hung um cheh cheh ding ahi.
3. Phung jousenTribe recognition ihinmu teng'u leh abang Zomi, Zo, Khul, Mizo le Chin tia ihung kithe
thang diu, iumna mun jouseova minority ihung hidiu hichu eiho dingía achaina hintin Zalengam/Kukiland
tia isei sei u jong hi umtaponte.
4. Lamka districtía Paite link language ahung hileh tumasang'a Thadou deilouna jeh'a tribe chom chom'a
anabeh ho Lhungdim, Baite, Mate, Khongsai, Touthang, Haokip etc etc jousen iponaovin ahi. Ipi phachom am? Hiche hi alamkhat'a seidin Paite ho achom beh in kisei jong leo insungkhat thu ahin, namdang toh ikikah uva hiche tobang hi ahungso teng ipi isei diu ham? Vaigei talou ding ham?
4. Ipi kisei hen lang kitong jong leh hiche boina hi aseichetna aum lou leh eiho paokhat thoho sung'a
chamna le kitona umlou ding, sopi danghon jong eihin beldeh deh lou diu ahi. Ajeh chu amaho ding'a belthei
kihilou ding ahi.
5. Hiche kiboina hi iseichet teng'u leh vang Meilhei le Naga hon eihin kichaovin tin, sopi danghon jong tun
ipi seijong leo thisan in hinkou taovinte.
Achaina
Thilkhat isei jiuvin, ikinahlo jiuvin achaina le imacha lou beh in ichaiji taove. Hiche jeh'a hi phat sotthimpi
imacha jong kaseinom lou ahitai. Khonung ding gella thusei kithem chuh ham ham uhite. Nampi sung'a
lamkai (thingnoi hihen overground level hijong leh) hiche chung chang'a hi kihouna khat ahin gon uva iseikhom diuvin tem ahiuve. Hiche hi iseichet lou uleh jat le nam ding in ipi seijong leo hen changvai lah'a jun kitha ibah jing diu ahi. Hiche thu hi themchanna ding le themmo kichantona ding'a velouva Nampi khonung ding gelpumía isei diuvin kahin temuve. Seikhel aum leh kihethem uhite
