nagelsang lheh e tichu vetsah in. Itoh gimna chunga koiman eipachat louteng lehin ichanna pohnat umma hitam, ibon chaova ihetkhah sohkei diu ginchat aumme. Mikhat chu gimtah in kithopin lang, kakipah e hinti tahih behleh, phat pamaisah a ipi bepseu kabol hitam nati jengding ahi. Hibang chun, midang jong gelsah hih in. Min nangma phatchomna dinga nakithopi tengleh, nakipana chu navetsah tei angaije.
Kakipah e tihi mihemleh mihem kikahkeo hilouva houthu a jong iman diuva thilpha ahi. Pathen henga thil eipeh hojeh a hi kipathu seiding ahi. Natohna a promotion namu naham, nikho thah namusahjeh ham, cha naneijeh ham, kakipah e nati angaije. Pathen nin thil eipehhou aneopen geija geldoh in aphai. Nilhum keija lungimna tohlou hella iumteng lejong kipathu sei angaije. Pathen nin phatthei nabohna cheng pihi gah geldoh temmin. Kakipah e kitihin chonchan hoi avetsahkeo hilouvin ilungput dihdan jong akilangdoh in ahi. Kakipah e iti tengle hin ikipana chu midangho hettheijin akilangdoh jin ahi.
Inoija natonghon thilpha aboldoh teng pachat dinghi chena lhongpi khat ahi. Min atohphatna chunga pachat thu iseileh tohphatna chu avella hung umbe ding ahi. Pachat mai-mai sangin kakipah e tihi athaneijon ahi. Mi natonga goi abangkhat hin atoh mannu kipe a ibolla kipathu kasei diham tia gelloi aumme. Adihnachan aumthounai, natong hochu atohman sum kipe ahi. Ahinlah, tohman kipeseh sehhin na hoitah a tohna dingin
natongho lungthim achohthou joupoi. Ahatoh leh alhomtoh hon kibang chetnin tohman akisannun ahi. Mi natonga goiho mopohna chu natong hohin umchanhoi apohdoh jinguva natoh athanop naohi dailhalou hella aneisah jingding ahi. Hichina dinghin "kakipah e" ti thuchenghi angaichai.
Kakipah e tia lekha kithothi min eiphat bolnaho lethuhna dinga kilom loitah ahi. Min thilpeh napeh tengleh kakipah e tin lekha thotnin. Hichun athilpeh chu ichan geija nadeija nakipapi ham tichu ahetsah ding ahi. Thilpeh chu ipijeh a napeh hita jongleh ikipana lekhathotna lethuh dinga lomtah ahimonge. Kin naneina a hunglha hochu kipa vetsahna lekhathot peh angaije. Naji neina hihen, na birthday nikho hijongleh ahunglha hochu nahungjao kipa aumme tin lekha thotle chun phat mantamtah ahinlhe lhah uva nakinna ahungjao uchu amaho dingin jong lungna chim umlheh inte. Loile golhon eikithopi tengle jong kakipah e tia lekha thot dingin aphai. Kakipah e tihi aphat louva seilou dinjong aphai. Min thil imacha nabolpeh loulaija, kakipah e natichu aph- alou lamjoh hithei ahi.
Mikhat komma thilkhat eibolpeh in natiteng, nom diham nomlou diham akihepoi. Anop anoplou asei masangin kakipah e tilechun ama dinga kanompoi tiding ahahsatan, aboltei tei ngaidannin aumdoh jitai. Hichiteng lehin nathil boldinga natep hilouva namphu a nabolsah a alahding ahi. Hichi "style" hi ihabol lheh taovin, ahinlah chonchan hoibehseh hipon, bollouva pha ahi. Nathil boldinga chun onem heuchan temmin lang atohchai tenglebou kipathu seijin. Eimi tehi kakipah e kiti behsehlou, mi pachat bolbehseh lou akihin, adeh in tukhanga hin imalam jousea kitetna ngen ahiphat hin mijouse hi akiboi cheh chehtan, eima ngaichat suhbulhit dingbou akihagel tahjeh hin "kakipah e" tidinghi akinahsah mocheh dannin akilange. Kipa thucheng seina chung changa hin hetdia kilom thilthum gahveu hite: Amasan, kamphat ipito kimah em tinah vanga angaichat nalou munho geija kakipah e tihi thildih ahidehpoi. Kipathu jonghi lunglut loutah a iseija, ihasei behseh a chuleh avaigei nungsanga iseileh a ëvalueí adao lhajin ahi. Aninan, mikhat nin nakithopi jeh a kakipah e natiteng lehin nalung sunga lung bukimna khat neijin nate. Lung bukimna neinomjeh a kipathu seiding vang ahipoi. Hibangchun, kipathu nasei nahochun nang dinga thilpha avel vella abolnomdiu ahi.
Avella nakithopi ding deichatna a kipathu seidi jong ahisam kitpoi. Kipa thusei hi thildih ahin, thildih khat ahijeh a chubou bolding ahibouve. Athumnan, min atoh dinglom atohna chunga kakipah e tidinghi dihjou di hinam? Tia nagel maithei ahi. Ahinlah kipathu seija kul ahi. Numei hon bule me tuitah a ahonjeh uva kipathu nasei chun nathil bolhi kahin gelsange natina ahi.
Kakipah e ti thucheng hi ijah tengleh kagimna hi min eihetpeh nai ti akihen ilungna achimmin ahi. Aniseh lehin midang dingin thil tampi akiboljin ahinlah kipana thucheng ijah lounahi atamme. Insunga chatejeng jonghi pahchalou hella atohdiubou iseipehleh, kin suhlhah nading mai maijin atongun kihabolna hi alhasam cheh-cheh jiuvin ahi. Alang khatnah, nachaten atoh gimnaochu hetpeh inlang pahcha lechun na hatohcheh intin tohbe dijong angapchat lelloudiu ahi. Chate keo ahipon pilhing honjong igimna eikihetpeh a eiki pachat dinghi kingaija ahi. Nupa kikah chule loile gol kikah a jong kipachat tonahi angaije. Igimnaho eikihetpeh louteng leh kihet themtona jong alhasam jin ahi. Tumasanga kinel baotam leh kinahna a iji ahilouleh iloitoh hinkho ana kimang hijon- gleh, kipachatna hi ibolpanleh kihet themtona jong achammin ahung machal jeng theije.
