Pate nikho athupi nahi paten insung dingleh society dinga akipehdoh nahou eigeldoh sah theije. Pate nikho imanleh chate din apateu alungset naoleh ajanao aphongdoh thei uve. Mi phabep chun kipa thilpeh semhohin athillu alhahna theidiuva Pate nikho hi ahin semdoh u ahibouvin, abul dettah a ahung kiphudohna thusim aumpoi atiuve. Hitia seihohin Nute nikho manding vang khoh asapouvin - nute, pite leh Chanute dinga thilpeh achohpehji vangun pate, pute leh chapaho dinga vang chohlou ding ahi atiuve. Ahinlah, hitia lungel hohi alhomcheh chehtai.

Pate nikhohi Nute nikho sanga chapang jochu ahinai,hijongleh abul abal umlouva hung kimangpan ahisampoi. Henry Jackson Smart jinu hi achaneina'h athitan, athinunga acha miguphi H.J. Smart hin achanga ahin khoukhah ahi. Achanu Ms. Sonora Dodd hin 1909 kumma Nute nikho ajaochun nute akigeldoh bangahi pate jong geldoh a lomtah ahi atin chua patchun Pate nikho tahsotei nadin kichol ngalou hellin na atongtai.
1924 kumchun US President nin Pate nikho chu hetpehna aneitai. Tuhin, leiset pumpia chapang jousen Pate nikho lehin apate henga kipathu seinan amang taove.

Angaina a chatehi anuteuvin ahin khoukhah ahijeh hin Sonora Dodd in Pate nikho manding tia ahinseihin mihon anuisat uve. Nuten insung avetkoldan uhi asang behseh in pate thilboldoh hohi nahsahmon aumjitai. Ahin, ihet bangun nu ingaichat banguhin pajong ingaicha sohkei uve. Chate hin akhandoh nadiu leh sumle paijin apa chungah akingai uve. Chanute dia apaohi pasal lah a apachatpen uleh achamkim pennin amu uvin, chapa tedin apaohi ahat penleh akisonpi pennu ahi. Angaina a patehi insunga nehle chah chuleh sumle paihol ahivangin tukhanga punchatah a chenkhom akihabollou phathin pate mopohna jonghi akikhel deotai. Nute sumlo a natong atamphat hin chate khoukhahna a nulepa panmun hi akibangtai. Tunihin, naovon khelpeh, naopoh hi pate koiman jachatnan anei tapoi. Hijehchun,pate leh chate kikah a kilungset tona asangcheh in hichun insunga kingailutna apunsahben ahi.

Paten ihinkhou semna dinga na atohdoh uhi thupitah ahi. Lung igellhah theilou teng ipateuhi eilam kaijin apangun, lungthim thahatna eipeuve. Chaten displine aneithei nadiuva patechu abang komleh akhoh angaijeh hin chaten ahetthem louphat atamjin ahi. Pate nikho kiman danhi gamchom chomma akibahlou vangin pate jana vanghi akipesoh keije. Hichi nikho lehin chaten apateuvin adeithei thilpeh apejiuve.

Napahin ahinkho saopihi nang khoukhahna dinga aman ahi. Ahin ama panmunhi akihetpeh jipoi. Paten lungset naleh khotona napeh jinghi hedohkhel ponnate. Pate nikho ahin kahinkhohi nang jalla hichan kaphahthei ahi tia seina dinga kilem petcha phat ahi.

Pate nikho imanteng pate hin atohgimnaohi society leh insung min ahetpeh danhi amudoh theijun, alung sungu kithang atnan alodimji e. Hichi nikho kimanjehhin chatejong apate kom ahungnai thei uve. Chapang tampihin nulepa lungset nahi ahiding mong ahi tin alajiuvin, Pate nikhojeh hin apateu thohgim danhi ahedohbe jiuvin, hichun apatetoh gamchengin akinai sahbe jiuvin ahi. Pate nikho a hi chate sehin alungthim pumpiu abuhlhah uva apateu chunga kipathu asei diuva kul ahi. Napa chun thilpeh holeh pahcha sangin nalungthim giltah a neihepina chungah kakipah e natichu akipapi joh ahi. Pa neilou nahikhah jongleh lunglhahih in thil jouse hung kipatna, loupina a dimset chunga Pa inei jingun ahinai. Pate nikhohin chunga um Pathen geldohna din phat peu hitin-ilungel, nopnaleh hahsatna seipeh u hitin, chutengleh aman ipi eiseipeh nom uham lunglim gehchan ngaileuhen lungmonna thucheng eiseipeh teijunte.